Македонија
Meџити на средба со синдикатите и ФЗО: Од 1 септември 10 oтсто поголеми плати

Покачувањето на платите за вработените во јавниот сектор, кое ќе почне од септември оваа година, беше тема на денешната работна средба помеѓу министерот за здравство, Фатмир Меџити, претседателот на Самостојниот синдикат за здравство, фармација и социјална заштита, Љубиша Каранфиловски, претседателот на Синдикатот на Клинички, Предраг Серафимовски, и претставници на Фондот за здравствено осигурување.
Тие на состанокот разговараа за начинот на имплементација на покачувањето на платите и пресметките што треба да бидат подготвени пред тоа да се реализира.
„Повисоките плати, кои набргу ќе ги добијат здравствените работници, се од големо значење кога станува збор за испораката на здравствените услуги. Ние се стремиме да имаме мотивирани здравствени работници, кои посветено ќе работат и ќе обезбедат квалитетна здравствена заштита за пациентите“, истакна Меџити.
Меџити за време на средбата потенцира дека покачувањето на платите покажува дека трудот на здравствените работници е вреднуван и ценет и дека тоа ќе влијае на привлекување професионалци во македонскиот здравствен систем, што е од големо значење за целата држава.
Покачувањето на платите ќе се реализира како дел од новиот Општ колективен договор за вработените во јавниот сектор, кој неодамна беше склучен помеѓу Владата и Сојузот на синдикатите на Македонија. Со него се предвидени и исплата на регрес за годишен одмор за 2023 година од 10.000 денари, кој ќе биде исплатен до крајот на годината, како и нова методологија за пресметка на плата, која ќе стапи во сила од март 2025 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.