Активистите од здружението „Здрава котлина“ ѝ порачаа на Владата да размисли добро да одлуката што ќе ја донесе денес, а се однесува на концесиите за рудникот во Иловица.

„Ова не е нешто што така ќе ви помине! Бидете свесни дека за почеток ќе предизвикате експлозија на наталожен револт, граѓанска непослушност, масовни блокади и протести“, велат од „Здрава котлина“.

Со години бегате од тешките прашања, велат активистите до Владата, но ние остануваме зашто немаме друг избор.

„Јасни ни се сите игри, сите играчи и сите механизми, но бидете на чисто дека со ова нема играчки. Впрочем, ќе се уверите многу бргу ако донесете погрешна одлука. Јавниот интерес на граѓаните е многу над приватниот интерес на елитите во партиите. Рудник нема да има“, додаваат.

Владата денеска на седница се очекува да расправа за концесијата за рудниците „Иловица-Штука“, а министерот за економија, Крешник Бектеши, пред министрите ќе реферира за сите правни постапки што се преземени за овие рудници почнувајќи од 2012 година.

Од Министерството за економија сметаат дека давањето позитивно мислење за спојување на концесиите ќе спречи компанијата „Еуромакс ресоурцес“ да поведе арбитражна постапка против државата.

Од компанијата, пак, уверуваат дека нема никаква основа за грижа за здравјето на граѓаните и животната средина. Велат дека долготрајната негативна кампања насочена против реализација на инвестицијата преку манипулирање со чувствата на луѓето и пласирањето невистини предизвикала неоправдан страв и загриженост на широката македонска јавност.

„Еуромакс ресоурцес“ ги охрабрува сите граѓани, во духот на партиципативната демократија, засилената улога на граѓанинот и организираните форми на граѓанско здружување по прашања за заштита на животната средина – втемелени во Архуската конвенција – преку дијалог да се информираат за сите процеси, кои на кој било начин предизвикуваат вознемиреност во јавноста.