Македонија
Основното училиште „Лазо Ангеловски“ во Аеродром доби пристапен лифт за децата со попреченост

Основното училиште „Лазо Ангеловски“ во oпштина Аеродром, кое е едно од најголемите училишта во Македонија, добива нов пристапен лифт наменет за учениците со попреченост, со што се финализира уште еден важен циклус на инвестиции со кои ова училиште станува целосно инклузивно, со еднаков пристап за сите ученици, извести Општина Аеродром.
Градоначалникот Тимчо Муцунски на својот фејсбук-профил напиша дека инвестициите во образовната инфраструктура се реализираат со средства од буџетот на Општината и настојуваат почетокот на учебната година да биде одбележан со поквалитетни и современи услови за реализација на наставата.
„Голем дел од учениците во Македонија се соочува со пречки во образованието затоа што се разликуваат од другите. Преку инвестициите во унапредување на образовната инфраструктура настојуваме да ги отстраниме сите тешкотии со кои се среќаваат и да создадеме пристапен образовен процес преку кој ќе се исполни потенцијалот на секое дете“, напиша Муцунски.
Во ова основно училиште во изминатиот период се реализираа низа инвестиции, кои го подигнуваат нивото на инклузивност и овозможуваат еднакви услови за сите. Со поставувањето на овој лифт се заврши инвестицискиот циклус, во кој училиштето доби инклузивни тоалети, пристапни рампи, тактилни патеки и знаци, додаваат од Општина Аеродром.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Герасимовски: Пристигнаа првите ученички униформи, во тек е дистрибуција до сите основни училишта во Центар

Општина Центар за прв пат обезбеди училишни униформи за сите ученици во општинските основни училишта. Првите униформи пристигнаа во ООУ „Киро Глигоров“, а во тек е нивна дистрибуција до сите основни училишта на територијата на Центар, соопштија од општината.
„Денеска започна дистрибуцијата на првите ученички униформи во основните училишта во Центар. Униформите се со одличен квалитет, со лого на општината и со име на секое училиште поединечно. Во понеделник, сите ученици ќе ги добијат униформите на првиот училишен ден, верувам дека тие ќе бидат среќни и горди што ќе ја носат оваа униформа“, изјави градоначалникот Горан Герасимовски.
Со оваа активност, како што е нагласено Општина Центар го подигнува квалитетот на основното образование, што вклучува и инвестиции во училишна инфраструктура, дигитализација и безбедност.
Македонија
Мицкоски: Има раст на откупот на земјоделски производи, земјоделците со добра заработка, продолжува поддршката

„Колку повеќе произведуваме, толку помалку увезуваме. Македонија во минатото беше позната како земја производител и извозник на храна, посебно на земјоделски производи“, вели Христијан Мицкоски претседател на Владата на Република Северна Македонија одговарајќи на новинарско прашање.
Мицкоски потенцираше дека согласно Државниот завод за статистика во вториот квартал има околу 60 милиони евра повеќе споредено со она што беше во минатото.
„Во вториот квартал имаме околу 60 милиони евра повеќе споредено со она што беше во минатото. Имаме над 26-27% повеќе откупени земјоделски производи споредено со истиот период минатата година коишто како количина се за 7% повеќе споредено со истиот период лани. Земјоделците се еден од приоритетите на оваа Влада, тоа го покажавме изминативе 14 месеци. И очекувам во таа насока да продолжиме и во иднина затоа што производството на храна ни е исклучително важно“, додаде Мицкоски.
Македонија
На ГП Табановце се чека 30-ина минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори, се бележи зголемена фрекфенција на возила, на ГП Табановце времето на чекање за излез од државата е 30-ина минути, а на другите граничните премини од македонска страна нема подолги задржувања за влез и излез од државата.
АМСМ препорачува приспособена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде што има можност од појава на одрони. Ова особено се однесува за делниците Катланово – Велес, Маврово – Дебар – Струга, Виница – Берово и Кочани – Делчево.