Македонија
ВМРО-ДПМНЕ: Власта не е Европа, тие се обични измамници со куп криминали, кои ги нема во Европа

„Власта на Ковачевски тврди дека тие се Европа, а врска немаат со европски вредности и принципи. Тие се обични измамници“, велат од ВМРО-ДПМНЕ.
„Дали се европски вредности сопругата на премиерот да добива државно земјиште по едно евро за квадрат со цел да тера милионски бизнис со фотоволтаици во време на официјална енергетска криза? Дали е Европа, кога во три големи трагедии страдаат 70-тина граѓани, во автобуската несреќа Ласкарци, ‘Беса транс’, и модуларната болница во Тетово и со години се водат судски процеси и никој не одговара за тоа?
Дали е Европа кога граѓаните имаат доверба во правосудството едвај 1 %, кога за Уставни судии и членови во Судски совет се бираат партиски послушници на СДС и ДУИ? Дали е Европа кога никој жив во државата не знае каква биографија има првиот обвинител за гонење организиран криминал и како е избран? Дали е Европа кога од земјоделска земја се претворивме во земја која е целосно увозно зависна од храна?
Зарем е Европа земја која е рекордер по корупција и се наоѓа полошо и од африканските земји? Дали е Европа држава која нема универзитет ни меѓу првите 1.900 на шангајската Листа? Зарем е Европа земја во која наркомафијашите си пукаат меѓу себе, а полицијата беспомошно гледа од страна затоа што е полна со кртови кои работат за мафијата? Зарем е Европа земја која издава 215 пасоши на светски мафијаши, убијци, терористи, наркодилери и белосветски криминалци“, прашува ВМРО-ДПМНЕ.
„Има ли земја во Европа која среде 3 официјално прогласени кризи, со рекордна инфлација, со 500 илјади граѓани во сиромаштија, со најнизок раст на БДП ги зголемува платите на функционерите за 78%, а на работниците и на пензионерите им нуди 5% зголемување?
Дали е Европа кога внукот на Ахмети добива третина од уделот во трговски центар, без да плати денарза тоа? Европа тоа го нарекува корупција, а кај нас тоа се смета за „претприемачки дух“?
Зарем е Европа ако за најголемиот инфраструктурен проект вреден милијарди се ангажира надзор фирма која до вчера произведувала гаќи?
Дали е Европа земја што две години не може да испечати учебници за своите деца?
Дали е Европа власт која 4 години гради 2 километри автопат кон Блаце, а 7 години не може да заврши автопат од Кичево до Охрид?
Дали е Европа власт која не може да обезбеди терапија за болните од рак, за болните од дијабетес, која не може да обезбеди доволно антибиотици?
Дали е Европа земја во која семејството на првиот вице премиер стекнува луксузен деловен простор на централната улица во главниот град по багателна цена?
Дали е Европа земја во која на истиот вицепремиер му палат возило кое тој го “позајмил“ од фирма која на мистериозен начин стекнала хотел под сомнение за злоупотреба на функција и влијание?
Дали е Европа власт која на студентите им дава по 140 денари за оброк, а во исто време дава милиони евра на блиски фирми за организирање на апсурдни настани, прослави и саеми?
Дали е Европа кога за навреда на функционер упатена на социјалната мрежа ФБ сторителот експресно се открива и казнува, а за тешки кривични дела, убиства, коруптивни скандали никој не одговара?
Зарем е Европа земја во која директор на Фонд за здравство е фатен како полни торби со снопчиња пари и власта го остава да си замине од државата без да одговара?
Дали е Европа пола влада да се занимава со производство и трговија со струја, а другата половина со производство на марихуана и притоа власта да ја користат да обезбедат подобри бизниси?
Зарем е Европа земја која основните потреби ги задоволува со земање кредити и која го удвоила вкупниот долг за само 6 години?
Зарем е Европа земја во која министер во владата дава збор дека една фирма ќе може да влезе во село за да вклучи или исклучи корисник на електрична енергија, а притоа да не биде претепан?
Зарем е Европа земја во која има општини што немаат одделение за даноци и не наплаќаат даноци од граѓаните?
Зарем е Европа земја во која синот на претседателот на Собранието полага правосуден испит пред да го заокружи високото образование и потоа станува обвинител?
Зарем има земја во Европа во која претседател на собрание еклатантно крши деловникот и устав или јавно ќе пцуе и навредува службеници и после тоа се „прави на Тошо“ и не поднесува оставка?
Можеме до утре да набројуваме скандали, афери и катастрофи поврзани со оваа власт која тенденциозно вели дека ТИЕ биле Европа. Тие од Европа знаат само за евро валутата во која ги пресметуваат процентите, наместените тендери и коруптивниот ќар. Тие од Европа немаат никаква врска.
Народот им ги памти овие, но и стотици други скандали и ќе ги казни многу скоро. Изборите се решение за Македонија. Власта на ДУИ и СДС може да бега, ама нема да избега од три работи, од соочување со народот на избори, од пораз и од одговорност.
Овие прашања погоре, но и слични на овие ќе бидат единствените прашања на кои актуелнава власт треба да подготви одговори, а за сѐ друго едноставно не е важно што мисли бидејќи никој веќе и не ја прашува“, се наведува во соопштението на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Четворица пациенти со тешки телесни повреди се примени на хируршките клиники во Скопје

Четворица пациенти со тешки телесни повреди беа примени денеска на хируршките клиники во Скопје по вооружена пресметка на улиците во Тетово.
Како што соопшти Министерството за здравство на КАРИЛ е примен 32-годишен пациент со прострелна рана во предел на граден кош, тешка телесна повреда. На Детска хирургија е примено 12-годишно дете со прострелна рана во предел на десна натколеница. На Торакална хирургија е примен 37-годишен пациент со прострелна рана во предел на граден кош. На Трауматологија е примен 60 годишен пациент со скршеница на десна потколеница.
Сите пациенти, нагласува МЗ, се згрижени и им се укажува соодветна медицинска помош.
Едно лице е почина, а повеќе беа ранети во вооружена престрелка која се случила денеска напладне во Тетово. Од МВР соопштија дека во 12:30 часот на крстосница од улица ,,Илинденска” со улица ,,Благоја Тоска” во Тетово се случила вооружена пресметка помеѓу лица од две возила, при што се случила и сообраќајна незгода по што двете возила го напуштиле местото, од кои едното се упатило кон улица „113“, а додека другото во непознат правец.
-Од добиени сознанија од граѓани и очевидци на местото на настанот, добиена е информација дека возилото кое што се упатило кон ул.” 113″ дека се работи за патничко возило ,,форд фиеста” со тетовски регистарски таблички. Од извршената проверка било констатирано дека се работи за одјавени регистарски таблички од истото возило, сопственост на лицето Е.М.(19) од с.Гајре, тетовско. При преземање мерки, на крстосницата од улица ,,Благоја Тоска” со улица „107″ било пронајдено патничко возило ,,фолксваген голф” со тетовски регистарски таблички, сопственост на Ф.Р.(46) од Тетово, додека во возилото пронајдено е едно починато лице со прострелни рани од огнено оружје. За настанот е формиран тим со кој раководи дежурен јавен обвинител при ОЈО-Тетово и увидна екипа од СВР Тетово, се наведува во полициското соопштение.
Според МВР, во Клиничка Болница -Тетово биле пренесени три лица со повреди од кои едно малолетно девојче од Тетово со повреди од огнено оружје која е задржана на опсервација, а другите две лица О.О.(34) и Р.Т. со прострелни рани, како итни случи се пренесени во Комплексот клиники “Мајка Тереза” во Скопје. Во престрелката од возилата повреден е и еден пешак А.С.(60) од Тетово, кој бил случаен минувач и бил пренесен во клиниките во Скопје.
Во моментот полицијата врши увид и се преземаат мерки за расветлување на мотивите и околностите околу вооружената пресметка која предизвика сериозни последици по животите и здравјето на лица во Тетово.
Македонија
Попладнево избувна голем пожар кај ресенското село Долно Дупени

Попладнево избувна голем пожар кај ресенското село Долно Дупени, во непосредна близина на Преспанското Езеро. Благодарение на брзата реакција на екипите на Територијалната противпожарна единица Ресен, викендиците и куќите од селото се спасени од огнената стихија. Моментално, огнот се движи кон непристапен терен, каде што гаснењето е отежнато.
Два ер трактори на Дирекцијата за заштита и спасување веќе се вклучени во акцијата, а поради високите температури, полициски хеликоптер ќе се приклучи во 16:30 часот. На терен се и жители од селото, кои помагаат на пожарникарите во локализацијата на пожарот.
Ситуацијата е под контрола во делот каде што има објекти. Нема опасност по куќите и викендиците, но борбата продолжува на непристапниот планински терен. Авијацијата ни помага значително, а апелирам до сите граѓани да бидат внимателни и да не предизвикуваат нови пожари – изјави директорот на ДЗС, Стојанче Ангелов.
Македонија
ДСЗИ ќе врши вонреден надзор откако пациентка на 30 години почина во болница

Министерството за здравство инфомира дека иницира инспекциски надзор до Државниот санитарен и здравствен инспекторат во врска со случајот со починатата пациентка во Инфективното одделение во Општата болница во Тетово.
„Јавноста ќе биде навремено известена по завршувањето на постапката за утврдување на фактичката состојба. Министерството за здравство останува посветено на транспарентноста, одговорноста и обезбедување на квалитетна здравствена заштита за сите граѓани“, се вели во соопштението од МЗ.
МВР претходно информираше дека денеска во 03:20 часот во СВР Тетово, Ј.С. од село Копанце, тетовско, пријавил дека на Инфективно одделение во Клиничка болница Тетово била хоспитализирана С.С. (30) од с.Копанце, член од неговото семејство и набргу починала.
„Според пријавеното, таа била примена на болничко лекување, претходниот ден во 19.00 часот и наводно, според негово кажување, не ѝ била укажана соодветна лекарска помош, по што починала. Полициски службеници од СВР Тетово излегле на местото и по однос на пријавата бил формиран тим за испитување на настанот, кој ќе го води дежурен јавен обвинител во содејство со екипа од СВР Тетово“, се вели во соопштението од МВР.