Македонија
Со скандалот на Онкологија најбрутално се погазени човековите права, вели ВМРО-ДПМНЕ

„Скандалот на Клиниката за онкологија не е од вчера. Се предупредуваше, но им требаше многу време на надлежните да реагираат. Пропустите и несоодветното работење на членовите на Владата на СДС и ДУИ имаат висока цена, цената се плаќа со човечки животи“, вели ВМРО-ДПМНЕ.
„Со овој скандал најбрутално се погазени човековите права и вредности во здравствената заштита за чие спроведување, покрај ресорниот министер, директно се одговорни и првиот човек на Владата и Владата во целина. Зошто? Затоа што член 30 од Законот за Владата вели: ‘Владата врши надзор над работата на министерствата и другите органи на државната управа и управните организации’“.
Оттука, јасно е дека власта не презела ништо! Непостапувањето носи директна одговорност на Владата на СДС и ДУИ и на Димитар Ковачевски и одговорните за скандалот имаат име и презиме.
Или Ковачевски како премиер е лично одговорен, бидејќи не презел ништо, а во конкретниот случај е одговорен за работа на министрите за здравството.
Одговорни се Беким Сали и Фатмир Меџити. Одговорни се и Венко Филипче и Арбен Таравари.
Дополнително, постои сомнеж дека Обвинителството, предводено од Љубомир Јовески или Ислам Абази ,нема да спроведе ништо во насока на откривање на вистинските виновници. Или едниот чека власта да го избере за уставен судија, а на другиот целата јавност виде дека на врат му е цела партија“, се вели во соопштението на ВМРО-ДПМНЕ.
„Одговорните имаат име и презиме!
Вклучените на кој било начин во овој мегаскандал треба да одговараат политички, но и кривично. Мора да има разрешница и да се стави крај на расипничкото владеење, кое чини човечки животи.
Овој скандал е уште еден показател дека што побргу треба да замине оваа одродена власт за да почне рестартирање на здравствениот систем!“, се додава во соопштението на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.