Свет
Зголемен бројот на загинати во земјотресот во Мароко – 820 лица го загубија животот, речиси 700 се повредени

Мароканското Министерство за внатрешни работи соопшти дека бројот на загинатите во разорниот земјотрес кај Маракеш се искачи на 820, а најмалку 672 лица се повредени.
Во соопштението се наведува дека 205 лица се тешко повредени. Спасувачите се уште се на терен и се очекува да се зголеми бројот на загинати и повредени.
Министерот за внатрешни работи Абделуафи Лафтит на брифинг со новинарите изјави дека се верува оти многу од жртвите се во оддалечените области на планините Атлас, каде што е епицентарот на земјотресот.
Тој додаде дека има информации за семејства затрупани под урнатините на нивните домови, а апелира до жителите да даруваат крв за повредените, како и да не се враќаат во своите домови, поради што повеќето луѓе ноќта ја поминаа на улица.
Предизвикана е голема материјалната штета.
Претходно беше соопштено дека загинале околу 630 лица.
Прелиминарната проценка на Американскиот геолошки институт е дека земјотресот што се случи синоќа во 23.11 часот бил со јачина од 6,8 степени според Рихтеровата скала, а Националниот центар за научни и технички истражувања со седиште во Рабат соопшти дека земјотресот бил со јачина од седум степени, според Рихтеровата скала и дека неговиот епицентар се наоѓа во провинцијата Ал Хауз, југозападно од Маракеш, популарна дестинација за странските туристи.
Земјотресите со јачина од 6 до 6,9 степени според Рихтеровата скала се карактеризираат како силни, можат да предизвикаат штети во населени места на 160 километри од епицентарот, а околу 120 од нив се случуваат годишно во светот.
Оштетена е џамијата Кутубија од 12 век во Маракеш, една од најпознатите знаменитости на градот.
Мароканците објавија и видеа на кои се гледаат оштетени делови од познатите црвени ѕидови што го опкружуваат стариот град Маракеш, кој е под заштита на Организацијата за образование, наука и култура на Обединетите нации (УНЕСКО).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Рекорд – Американка повеќе од четири месеци живееше со свински бубрег

Педесетгодишна Американка повеќе од четири месеци живеела со свински бубрег, но трансплантираниот орган морал да ѝ биде отстранет бидејќи нејзиното тело почнало да го отфрла, што сепак претставува рекорден период на живот со органот, соопшти болницата во Њујорк каде ѝ била направена трансплантацијата.
На Тована Луни од Алабама, САД, кон крајот на ноември минатата година ѝ беше трансплантиран генетски модифициран свински бубрег, практика која сè уште е многу експериментална, но дава надеж за решавање на хроничниот недостиг на органи.
Охрабрувачки е фактот дека органот ги исполнувал своите функции 130 дена или повеќе од четири месеци, што е рекорд. Досега ниту еден пациент не успеал да преживее повеќе од два месеци по ваквата трансплантација.
„За прв пат од 2016 година можев да уживам со моите пријатели и семејството, без да морам да планирам сè околу третманите за дијализа“, рече Луни во изјавата споделена од болницата NYU Langone во Њујорк.
Луни ѝ донирала еден бубрег на мајка си во 1999 година и била на дијализа осум години откако компликација од бременоста ѝ го оштетила преостанатиот бубрег. Не можејќи да најде соодветен донатор, добила дозвола да добие генетски модифициран бубрег бидејќи нејзиното здравје се влошило.
„И покрај охрабрувачките првични резултати, на почетокот на април таа доживеа пад на функцијата на бубрезите поради акутно отфрлање“, рече нејзиниот хирург Роберт Монтгомери.
„Причината за оваа епизода на отфрлање по долг период на стабилност е под истрага“, објасни тој.
Свет
(Видео) Авион се урна на Флорида, тројца загинати

Мал авион се урна на автопат во Бока Ратон, Флорида, при што загинаа три лица, јавија локалните медиуми.
Пилотот на Цесна 310Р пријавил „механички проблеми“ при обидот да слета на аеродромот. Податоците за летот покажуваат дека авионот кружел неколку пати набргу по полетувањето од аеродромот Бока Ратон.
Tragic Crash in Florida! A Cessna 310R (N8930N) crashed in Boca Raton at ~10AM, en route to Tallahassee. Three were aboard the twin-engine plane, which hit near Military Trail, sparking fires. Video shows grim wreckage—survival unclear. #AviationSafety #BocaRaton pic.twitter.com/XGaT2ibamO
— Fahad Naim (@Fahadnaimb) April 11, 2025
Локалната полиција ги повика граѓаните „да ја избегнуваат областа“, затворени се два автопати и надвозник во близина на местото на несреќата. На патот, како и на блиската железничка пруга имало расфрлани делови од авионот.
Свет
Застрашувачки вирус ги затвора границите на Европа со страв дека може да биде „биолошки напад“

Шап и лигавка, која не е откриена во Унгарија повеќе од половина век, се појави во земјата, принудувајќи ги соседните Австрија и Словачка да ги затворат своите граници, објави „Мирор“. Вирусот се шири во Европа, а постојат стравувања дека можеби станува збор за „биолошки напад“.
Илјадници грла добиток се колат по појавата на шап и лигавка во Унгарија – прва во повеќе од 50 години. Како одговор, соседните Австрија и Словачка затворија десетици свои гранични премини за земјата, според Светската организација за здравје на животните.
Унгарскиот портпарол на владата, Гергели Гуљас, рече дека болеста, која првпат била откриена на фарма за добиток во близина на северозападната граница, можеби била „вештачки конструирана“.
Тој додаде дека не можат да исклучат дека вирусот е резултат на биолошки напад.
„Во оваа фаза, можеме да кажеме дека не се исклучува можноста вирусот да не е од природно потекло, можеби имаме работа со вештачки конструиран вирус“. Сепак, тој не даде информации за тоа кој би можел да биде одговорен.
Животинските власти прегледаа речиси 1.000 фарми низ Унгарија и открија позитивни резултати од шап и лигавка на четири локации.
Гуљас тврди дека сомнежот е заснован на информации добиени од странска лабораторија, а наодите сè уште не се целосно докажани.