Економија
„Скопјани ќе имаат парно“ – Бислимоски уверува дека нема да има ценовни шокови
Скопје и со постојната инфраструктура со двете топлани и без кој било цевковод може да се снабдува со топлинска енергија и ќе нема никаков проблем. Да не се шири фама дека Скопје би останало без топлинска енергија, изјави првиот човек на Регулаторната комисија за енергетика (РКЕ), Марко Бислимоски, за монтирањето на новиот топловод под мостот „Беласица“.
„Поентата на сето тоа е што повеќе топлинска енергија да ни дојде од ТЕ-ТО за да ги намалиме трошоците на целиот систем. ТЕ-ТО е важен оти ни дава топлинска енергија, која е за два и пол-трипати пониска од цената на топланите во градот Скопје“, рече Бислимоски. Регулаторната комисија инсистира тоа да биде со многу пониски трошоци и уверува дека нема да отстапат од таа цел.
Бислимоски појасни дека од ТЕ-ТО ќе се добие 60-70 отсто од топлинската енергија за да сочува ценовната стабилност.
„Нема да дозволиме ценовни шокови“, дециден е Бислимоски.
За одлуката за цената на парното греење, првиот човек на РКЕ рече дека ќе ја донесат одлуката кога ќе добијат цврсто уверување во врска со поставувањето на новите цевки под мостот „Беласица“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
МЕПСО ги прекинува сите донации и спонзорства до крајот на годинава
На седница на Управниот одбор на АД МЕПСО, предводен од Генералниот директор Бурим Љатифи, едногласно била донесена одлука да се прекинат сите видови на донации и спонзорства до крајот на оваа година.
„Заеднички заклучок е дека трошоците и издатоците по оваа основа треба да се стопираат до следната 2025 година, кога овој процес ќе продолжи и понатаму да функционира, но на транспарентен начин и со детално почитување на критериумите предвидени за оваа намена“, соопштија од МЕПСО.
На ваков чекор Управниот Одбор се одлучил по анализа на долгата листа на донации и спонзорства и паричните средства кои биле доделени од почетокот на годината па се до доаѓање на новото раководство.
„Сеопфатниот преглед на нашите служби покажа дека во првите седум месеци од 2024 година претходното раководство на Друштвото, кое наводно делувало согласно Законот за донации и спонзорства во јавни дејности, ја пречекорило финансиската програма за оваа година за речиси 10 милиони денари. За новиот менаџерски тим единствен приоритет останува вложувањето исклучиво во продуктивни инвестиции кои се во насока на градење и управување на стабилен и доверлив електропреносен систем на најтранспарентен начин и отчетно“, пишува во соопштението на МЕПСО.
Економија
(Видео) Тренчевска: Власта најавува нова кошничка што ќе ги намали цените за 0.1%, ова е навредувачки и потценувачки за граѓаните
Цените на основните производи растат, куповната моќ опаѓа, а многу семејства едвај врзуваат крај со крај, кажа на прес-конференција Јована Тренчевска, пратеничка на СДСМ.
„Мерката на Владата со замрзнување на маржите или така наречената есенска кошничка не даде никаков ефект и цените не се намалија. Државниот завод за статистика го потврди тоа, цените на мало во месец октомври се намалиле само 0.1%. Но, наместо да се откаже од нови погрешни мерки, го слушаме премиерот Мицкоски како најавува нова нова кошничка. Овојпат ноговодишна, којашто ќе ги намали цените пак за 0.1%. Ова е крајно навредувачки и потценувачки за граѓаните. Власта покажува голема неспособност и води политика на инает врз грбот на народот“, рече Тренчевска.
Според неа, предлог Законот предложен од СДСМ за укинување на ДДВ на храната е вистинско и одржливо решение кое власта требаше да го прифати а не го игнорира.
„Со укинување на ДДВ на храната на основните производи ќе поевтинат веднаш 250 категории производи. Реална заштеда кај граѓаните и до 2.000 денари што значи повеќе пари во нивните џебови. Дополнително, воопшто нема да биде товар за компаниите и трговците не може да ја изиграат. Игнорирањето на Владата на Мицкоски на ова добро решение е игнорирање на потребите на граѓаните и нивниот животен стандард. Граѓаните не треба да бидат жртви на политичкото его на Мицкоски. Бараме Владата да се откаже намерата од нови мерки со 0.1% ефикасност и да го прифати законското решение на СДСМ за намалување на ДДВ на храната“, истакна Тренчевска.
Економија
„Зимата ќе биде предизвикувачка“ – Мицкоски нема информации за можно поскапување на струјата
Премиерот Христијан Мицкоски рече дека до овој момент нема информација за евентуално поскапување на струјата. Состојбата ја оцени како стабилна и конслидирана, а Владата, и покрај сите предизвици, навреме преземала мерки за да нема ценовен шок и да има електрична енергија.
„До овој момент немам информација дека ќе има зголемување на цената на електричната енргија. Зимата ќе биде предизвикувачка, имајќи предвид со што се се соочува Европа и какви се временските прогнози. Затоа презедовме мерки за да не дојде до ценовен шок и до поскапување на струјата. Како тоа на крај ќе заврши, зависи и од Регулаторна комисја за енергетика“, истакна премирот.
Тој кажа дека оваа Влада го почна мандатот со одлуката од претходната, која обезбеди 85 отсто од потребите на граѓаните од 1 јули до 31 декември.
„Веќе сме средина на ноември, ние ја зголемивме количината на 100 проценти, а притоа не дојде до поскапување на струјата. Компанијата се консолидира, ја посетивме РЕК Битола, околу 200 – 250 илјади тони имаме на депонија, на греда, таа состојба беше на нула, имаме парче кое се ископува од 1,5 милиони, се увезува јаглен по 10, 15, 20 отсто пониски цени, режиските трошоци се намалени за 15 отсто. Заштедата ќе биде околу половина милијарда денари кога ќе заврши целиот процес“, подвлече тој.
Мицкоски, одговорајќи на новинарски прашања, за идната недела најави „пријатно изненадување“ поврзано со енергетиката и сигурноста во снабдувањето со енергенси.