Култура
Костадиновска-Стојчевска за 11 Октомври: Херојската борба на партизаните е најсилната борба за остварување на сонот за сопствена држава
„Народ задоен со борба за слобода никогаш не умира!“ е пораката на „Споменикот на паднатите борци 1941-1945“ во село Лавци, Битолско за зачувување на богатата историја на нашата држава и почитување на македонските херои од НОВ.
Овој споменик како и „Могилата на непобедените“ во село Могила и спомен обележјето кај Песјобрдце, Прилепско се дел од успешните проекти за превентивна заштита на спомениците од НОВ, на Министерството за култура.
Селото Лавци има емотивна нишка со министерката Бисера Костадиновска-Стојчевска, бидејќи е родно место на нејзиниот дедо, првоборецот Пецо Гудовски, носител на Партизанска споменица 1941. Посветеноста на Гудовски, како и многу други Mакедонци во тој период, се доказ за издржливоста и решителноста за Македонија да биде слободна денеска.
„Како горда внука на мојот дедо Пецо Гудовски, пораснав со неговите емотивни раскажувања за настаните и подвизите на партизаните и за нивната херојска борба против фашистичкиот окупатор. Веројатно затоа, за мене борбата на партизаните е најсилната асоцијација на борба за слободна на македонскиот народ“, истакна министерката Костадиновска-Стојчевска.
Инаку, проектот за превентивна заштита на спомениците од НОВ вклучуваше опсежно чистење на спомениците, хортикултурно уредување на околината, обнова на патеките, промена на оштетените плочи на постаментите, комплетирање на натписите на самите споменици, а ревитализирана е и Алејата на народните херои во Могила.
„Од суштинско значење е да се потсетиме и да ја почитуваме пожрвтвуваноста направена од нашите предци. Превентивната заштита на спомениците во Лавци, во Могила и во Песјобрдце не е само почит кон борците, туку и симбол на нашата посветеност за зачувување на богатото историско наследство за иднте генерации“, рече Костадиновска-Стојчевска.
Нашата држава утре ја одбележува 82-годишнината од народното востание – 11 Октомври, како почеток на Народноослободителното движење. Иницијативите како оваа дополнително ја истакнуваат важноста на сеќавањето на минатото и неговото значење во обликувањето на иднината, затоа минатото се памети, историјата се почитува, а иднината се гради.
Министерството за култура продолжува да дава приоритети и да инвестира во проекти кои го нагласуваат значењето на македонското културно-историското наследство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
MINТ Fintech Group – сребрен партнер на Интернационалниот фестивал на филмската камера „Браќа Манаки“
MINТ Fintech Group со гордост објавува дека е сребрен партнер на 45-то издание на престижниот Интернационален фестивал на филмската камера Браќа Манаки. Овој значаен настан, кој ја слави уметноста и визионерството во светот на кинематографијата, претставува платформа на која креативноста и иновациите одат рака под рака.
Како компанија што ја става иновацијата и технолошкиот развој во фокус, MINТ Fintech Group верува во поддршката на културните и уметничките иницијативи што го збогатуваат општеството. Нашата посветеност на финансиските иновации и современите технолошки решенија се одразува и во нашето партнерство со фестивалот, кој ја истакнува важноста на инспирацијата зад секој филмски кадар.
MINТ Fintech Group гордо го поддржува креативниот процес на филмската индустрија и продолжува да гради мостови меѓу финансиските иновации и уметноста.
ПР
Култура
„Бизнисот на задоволството“ почнува со прикажување во кината во целата држава
Политичкиот трилер „Бизнисот на задоволството“, на режисерот Гоце Цветановски, од четврток, 19 септември, почнува да се прикажува во киносалите во Македонија.
Македонската кинопремиера ќе биде во „Синеплекс“ по што филмот ќе стане дел од редовниот репертоар за скопската публика. Од следната недела ќе се прикажува и во киното „Киноверзум“ во Кисела Вода.
На 19 септември проекции ќе има и во домовите на културата во Пробиштип, Богданци и во Свети Николе, како и во киното „Мис Стон“ во Прилеп. В сабота, 21.9., ќе стигне и во Домот на културата во Кочани, во присуство на дел од екипата, а на 22, в недела, ќе биде прикажан во „Киноверзум“ во Штип и во Велес.
Термините за другите градови ќе бидат дополнително објавени и можете да ги следите на фејсбук-страницата на „Бизнисот на задоволството“.
Филмот во својата меѓународна фестивалска година заобиколи пет континенти, се закити со 32 селекции и доби 10 награди, од кои пет за најдобар филм.
Трилерот на Цветановски ја следи приказната на новинарка, која опседната со исчезнувањето на најдобрата пријателка подготвува тајна операција со цел да разоткрие мрежа за трговија со жени. Но, како што нејзините соучесници се приближуваат до шефот, ситуацијата излегува од контрола.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Филмот е финансиран од Агенцијата за филм.
Култура
Љутков: Македонското културно наследство е скапоцен дел од европското богатство
На денешната конференција на Европските денови на културното наследство, министерот за култура и туризам, Зоран Љутков, ги поздрави учесниците истакнувајќи го значењето на конференцијата, која е еден од најшироко прифатните културни настани што ги обединува луѓето од целиот европски континент.
„Македонската култура е симбол на континуитет и еволуција, која го збогатува заедничкиот европски идентитет со својата автентичност, прикажувајќи го нашиот народ како чувар на своите традиции, но и како учесник во создавањето една нова, модерна и креативна Европа“, рече министерот Љутков говорејќи на темата на конференцијата, „Македонското наследство на вмреженоста и поврзаноста“.
Министерот Љутков порача дека со зачувувањето на европското културно наследство ние го чуваме и нашиот идентитет, учиме од минатото и ја цениме различноста што нè обединува. Во тој контекст министерот додаде: „Македонското културно наследство е скапоцен дел од големиот мозаик на европските вредности, со вековна традиција, која ги отсликува нашата историја, уметност и духовност. Нашите археолошки наоѓалишта, црковни споменици, традиционални обичаи и уметнички дела сведочат за длабоките културни врски со вековите и го претставуваат нашиот уникатен придонес во европската културна ризница“.
По усвојувањето на Европската културна конвенција на 19 декември 1954 година од страна на Советот на Европа, како документ кој има цел да ја промовира културната соработка меѓу европските земји и да го зачува и да го заштити заедничкото културно наследство на европските народи, Деновите на европското наследство се широко прифатен настан, кој се одбележува со илјадници активности во цела Европа.
На темата „Македонското наследство на вмреженоста и поврзаноста“ во нашата земја оваа година ќе бидат организирани настани во 14 града и села, со учество на 20 музеи, невладини организации и други институции, кои се ангажирани на полето на културното наследство.
Министерот Љутков ја изрази посветеноста на Владата и на Министерството за култура и туризам за унапредување на состојбите во заштитата на културното наследство како врвен приоритет, кој овозможува афирмација и промоција на нашата држава во Европа.
На отворањето на конференцијата учесниците и присутните гости во Порта „Македонија“ ги поздравија и Викторија Трајков, заменик-министер за европски прашања; Штефен Худолин, шеф за соработка во Делегацијата на Европската Унија; Весела Честоева, директорка на Управата за заштита на културното наследство.
На конференцијата, на повеќе панел-дискусии, свои излагања ќе имаат дваесетина експерти од земјата и странство.