Македонија
(Видео) Димитриеска-Кочоска: Бизнисот ништо добро не очекува од Влада која носи мерки што не даваат резултат – затоа крајните цени само растат

Најголемата криза во Македонија е што СДСМ е на власт. СДСМ и ДУИ направија во Македонија да има поголема криза отколку што е кризата било каде на друго место во Европа и во светот, рече Гордана Димитриеска – Кочоска, потпретседател на ВМРО-ДПМНЕ на денешната дебата во рамки на кампањата важно! Од Тебе зависат промените што се одржува во Неготино.
Власта не знае што прави, оцени потпретседателката и додаде дека немаат идеи и оти ние имаме поголема инфлација од било каде во регионот. Таа објасни како стигнавме до тука.
„Постојано зборуваме за инфлацијата , а они многу често ја врзуваат со кризите. Меѓутоа во уште во мај 2021 година кога никој не зборуваше за инфлација јас имав текст во кој кажав дека веќе почнува да расте инфлацијата во Македонија и тоа беше период кога инфлацијата во Македонија беше повисока од онаа во ЕУ и беше знак дека нешто се случува’, кажа Кочоска.
Кочоска се осврна прво на законот за минимална плата каде како што рече минималната плата не ја пратеше продуктивноста.
„Легитимно е секоја влада да носи мерки, за поздравување е да се зголеми минималната плата, но знаеме дека мора да ја следи продуктивноста. Во 2019 година донесоа еден закон со кој придонесите на приватниот сектор ги субвенционираа нешто што потоа го укинаа и сега наместо паралелно со законот за зголемување на минимална плата требаше да внимаваат на продуктивноста на компаниите или требаше и мерки да му помогнат на секторот да ја зголеми продуктивноста, ама ги немаше. Така овој пораст на плати се прелеа на крајните цени“, кажа Кочоска.
Според неа и во земјоделието откако се на власт, субвенционирањето или го намалуваат или е на исто ниво.
„И така ќе видите дека помошта што ја добиваат од година во година е помала и од статистика ќе видите дека од година во година увозот на земјоделските производи расте, има се помало производство на млеко, пченица и ако ова не беше знак не знам што повеќе требаше само соодветно да реагираат“, кажа таа.
Кочоска укажа и дека зборуваа за прогресивно оданочување, за сузбивање на сива економија па додаде дека донесоа мерка или дефиниција дека не може да има плаќање во готово повеќе од 500 евра.
„Па и тоа го сменија и во суштина во континуитет го менуваа начинот на однесување што создаваше една непредвидливост кај приватниот сектор и сето ова ги менуваше очекувањата и тој сектор почна полека да ги зголемува своите цени на финалните производи“, кажа Кочоска.
Според неа ова е првата фаза кога влеговме во висока инфлација. Таа укажа дека клучно е и тоа што цената на електричната енергија расте, а расте зошто ЕСМ го проби дното во најмало годишно производство на електрична енергија.
„И кога во се се намалува производство почнавме рано да одиме кон растење на инфлација. И потоа се почна со задоцнети мерки, потоа почна војната во Украина“, кажа таа.
Вториот момент, додаде Кочоска, кој исто беше задоцнет и непредвидлив е тоа што ја замрзнаа трговската маржа.
„А кога ќе ги прашате што значи, никој нема да ви каже, сложена проблематика е. Кога видоа дека тоа не функционира почна да замрзнуваат цени, а кога ќе ги одмрзнат почнуваат многу да растат. И ако ги видиме бројките на инфлација за 2022 јули, август и како растела во однос на просекот во 2021, тој просек ќе ви каже дека јули 2022 сме имале пораст на инфлација или 23,4 проценти, во август 27 проценти. И ова е исклучиво на храна и се гледа дека мерките не дале резултат, ама пак го прават истото замрзнуваат цени“, заклучи таа.
Оттука, кажа Кочоска, бизнис секторот ништо добро не очекува од Владата и тоа го вметнува во крајните цени.
„Не може секој ден да им менувате мерки, менувате ДДВ, носите прогресивен данок и слично, а од друга страна им растат и каматите на кредитите значи фирмите имаа само непредвидлива околина.. Притоа повеќе од 80 посто од платата граѓаните ја трошат на храна“, кажа Кочоска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре сончево време со температура до 20 степени

Времето утре ќе биде сончево со мала до умерена локална облачност. Ќе дува слаб до умерен ветер од јужен правец. Минималната температура ќе биде во интервал од 1 до 8, а максималната ќе достигне од 14 до 20 степени, информира УХМР.
Во Скопје, сончево со мала до умерена облачност. Ќе дува слаб до умерен ветер од југоисточен правец. Минималната температура ќе се спушти до 4, а максималната ќе достигне до 18 степени.
Следува период на променливо облачно време со сончеви периоди и со слаб до умерен јужен ветер. Во среда ќе има локални врнежи од дожд, а од четврток дневната температура ќе биде во пораст.
Македонија
ДИК: До 15 часот гласале 31,16 отсто од гласачите

Од податоците добиени од 3.167 избирачки места, односно 91,16 отсто од вкупниот број, до 15 часот гласале 31,16 отсто од гласачите или 515. 069, соопшти Државната изборна комисија.
Најголема излезеност има во Берово, Богданци, Валандово, Гевгелија, Градско, Дебарца, Демир Капија, Дојран, Зелениково, Кратово, Крушево, Лозово, Македонски Брод, Новаци, Пробиштип, Росоман, Старо Нагоричане и Чашка.
Најмала излезеност има во Центар Жупа, Радовиш, Маврово и Ростуше, Гостивар и Врапчиште.
Во Град Скопје до 15 часот излезноста е 31,16 отсто.
Во Аеродом гласале 31, 50 отсто од избирачите, во Бутел 33, 01, Гази Баба 27,82, Ѓорче Петров 30,11, Карпош 33,37, Кисела Вода 31,58, Сарај 36,33 во Центар 34,40, Чаир 35, 30 и во Шуто Оризари 21,99 отсто.
Од ДИК информираа дека досега нема пристигнато приговори за неправилности на избирачките места.
На едно избирачко место во Карпош се преминало на стариот начин на гласање со УВ лампа и спреј затоа што се заглавила СИМ картичката на уредот за биометриска индентификација.
Македонија
На новинарка сакале да ѝ го земат телефонот, интервенирала и полицијата

Здружението на новинарите на Македонија (ЗНМ) апелира до Државната изборна комисија (ДИК), општинските изборни комисии, и Министерството за внатрешни работи да продолжат да обезбедуваат непречен пристап и услови за работа за новинарите и медиумските работници на сите избирачки места. Професионалното, навремено и точно информирање на јавноста за текот на изборниот процес е од суштинско значење за довербата во изборите, велат од ЗНМ.
„До ЗНМ утрово беа пријавени неколку случаи на попречување на работата на новинарските екипи:
Скопје: Општина Карпош, (ИМ 2626) на новинарката Елида Зулбеари обид за одземање на мобилниот телефон и непристоен однос од страна на заменик претседателот на комисијата, по што имало интервенција од МВР, за што ќе побараме од ДИК да преземе санкции за службеникот.
Охрид (ИМ 1270): На екипа од јавниот сервис ѝ беше оневозможен пристап во раните утрински часови со образложение дека, покрај новинарската легитимација, треба да поседува и „акредитација од ДИК“. По реакција на колегите и интервенција на лице место, пристапот беше овозможен и работата продолжи.
Тетово: Новинар беше попречен да земе изјава од страна на членови на избирачкиот одбор, со упатување на „недостиг на акредитација“.“, се наведува во соопштението.
ЗНМ апелира до ДИК и МВР итно да ги известат сите избирачки одбори и службени лица дека не е потребна акредитација од ДИК за новинарите, со цел да се избегнат нови недоразбирања во текот на денот.
„Ќе продолжиме да ги следиме случаите, да реагираме институционално и да информираме за исходите.
Укажуваме дека за новинарите и медиумските работници во Македонија, освен новинарска легитимација од медиумот за кој новинарите известуваат, не е потребна посебна акредитација од ДИК за присуство и известување на избирачките места. Затоа, избирачките одбори, полициски службеници, набљудувачи и / или други чинители немаат основ да ја условуваат нивната работа со дополнителни дозволи. Истовремено, ЗНМ повикува на почитување на изборниот ред: новинарите имаат право да снимаат општ амбиент и изјави, без нарушување на тајноста на гласањето и без оневозможување на текот на постапката“, велат од ЗНМ.
Од таму ги повикуваат избирачките одбори од сите изборни места да овозможат непречен влез на новинарските екипи со видлива новинарска легитимација; да дозволат снимање и изјави во просторот каде што тоа не се загрозува тајноста на гласањето; при недоразбирања, прво да побараат насоки од ОИК/ДИК, наместо да го ограничат пристапот.
„Ги охрабруваме и новинарите, фоторепортерите и снимателите: секогаш да ја носат новинарската легитимација и да се претстават доколку тоа е побарано; да ги почитуваат насоките на одборот, кога истите се однесуваат на тајноста на гласањето; при какво било попречување, веднаш да го евидентираат случајот (време, место, избирачко место, лица) и да се обратат до ЗНМ.
За правна и практична помош, новинарите, снимателите и фоторепортерите можат да се обратат до регионалните координатори на ЗНМ во Штип, Струмица, Битола, Охрид, Тетово и Куманово, како и до контактите на ЗНМ во Скопје.