Македонија
Михајлов: Одлуките на Владата се нереални, пивото е со заштитена цена, а во луксузни ги стави основните прехранбени производи
„Нашиот сектор има улога од производство, увоз, дистрибуција и малопродажба претежно на храна и пијалоци. Сектор кој што во последните години е зафатен од сериозни проблеми, кои што се затекнати и започнати уште од корона кризата, кога се отежна транспортот на стоки и набавката на стоки, кога инфлацијата започна да расте во нагорна линија, двоцифрена инфлација не затекна. Потоа исто така конфликтот во Украина имаше голем импакт врз нашиот бизнис. И згора на се тоа, во нашата држава беа донесени одлуки започнувајќи уште од март 2020-тата година, тие одлуки беа донесени буквално преку ноќ и не беа во склад со моменталната ситуација во нашиот сектор и со пазарите во светот“, истакна стопанственикот Бојан Михајлов на денешната дебата насловена „Економски политики за достоинствен живот и ЕУ интеграција“ во рамки на кампањата „Важно е! Од тебе зависат промените“.
Михајлов додаде дека со погрешните одлуки на власта дојде до празни рафтови и до отсуство на основни прехранбени производи.
„Нашиот сектор е директно поврзан со секојдневието на секое едно семејство, бидејќи според сите анализи и статистики дури 45% од семејниот буџет одат за трошоците за храна и пијалоци. И ако тука ги додадеме и 6,7 па и 8% за хигиенски средства кои што исто така се набавуваат во нашиот сектор, ќе дојдеме дека дури и половина од средствата граѓаните ги трошат во нашиот сектор“, појасни Михајлов.
„И одлуките кои што и сега се носат се исто така се донесени без консултација на нашиот сектор, без консултација на производителите и увозниците на храна. Па и така се доведовме во една ситуација кога имаме гарантирана цена, заштитена од државата на пиво, а од друга страна во луксузни производи ни се ставаат основни прехранбени производи кои што секојдневно ги конзумираме“, нагласи тој.
Тој посочи дека гневот кај купувачите е очигледен бидејќи секој ден се менуваат цените поради одлуките на власта.
„Еве ќе дадам пример, кај што една од одлуките вели да се намали цената на јајца, ориз и ред други производи, за да после три дена да добиеме измена на одлуката и вели цената на јајцата да не се намали од први август за 10% туку да се земе референтна цена од 01.09. За да наредниот ден да добиеме измена да се земе референтна цена од 15.09“, укажа Михајлов.
„Одлуките се носат денес попладне, за да важат од утре наутро. Што е реално неодржливо и невозможно да се смени“, рече тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДИК ги соопшти местата на кои ќе се прегласува на 22 мај
Државната изборна комисија (ДИК) денеска, на 105. седница, едногласно го усвои предлогот да се повтори гласањето во Изборната единица (ИЕ) 5 на избирачките места 1470/1 и 1470 во Општина Долнени, 1.194 и 1.202 во Општина Крушево, 1844 во Општина Струга и 1272 во Општина Охрид, како и во ИЕ 6 на избирачкото место 2101 во Општина Желино. Гласањето ќе се одржи идната среда, на 22 мај 2024 година.
ДИК на седницата ги разреши и претседателите на избирачките одбори, членовите и нивните заменици во избирачките места 1470/1 и 1470 во Општина Долнени, 1194 и 1202 во Општина Крушево, 1844 во Општина Струга, 1272 во Општина Охрид и 2101 во Општина Желино.
Со оглед дека се кратки роковите за избор на нови избирачки одбори, за да биде регуларно прегласувањето, општинските изборни комисии (ОИК) ќе треба да ангажираат некои од веќе постојните избирачки одбори, или од најблиските избирачки места или некои други, и за тоа ќе треба да достават известување до ДИК.
Кампањата за повторното гласање ќе трае до понеделник, 20 мај, 00.00 часот. Притоа, ќе важат истите листи за болни и немоќни лица, ќе нема можност да се пријавуваат нови.
Според ДИК, има можност за измени и предлози за овластени претставници на кандидати. Тоа важи и за членовите на избирачките одбори кои се предложени од политичките партии.
Македонија
Кацарска ја чува обезбедување, денес добила закани дека „страшно ќе одговара“
Непознато лице денеска напладне во близина на ТЦ „Рамстор“ во центарот на Скопје вербално и се заканувало на претседателката на Уставниот суд, Добрила Кацарска. По инцидентот интервенирало нејзиното обезбедување.
„Полициски службеници од полициската станица Центар денеска во 14:00 часот го лишиле од слобода В.П.Г. (57) од Богданци, постапувајќи по претходна пријава дека во угостителски објект во трговски центар на подрачјето на Центар во Скопје упатил закани кон Д.К.(67) од Скопје со зборовите ‘ќе одговараш, страшно ќе одговараш’. Лицето било задржано во полициска станица и по целосно документирање на случајот во координација со јавен обвинител против него ќе биде поднесена кривична пријава по член 144 од Кривичниот законик“, соопшти МВР.
Пред неколку дена во подземна гаража на зграда во Центар пронајдени се импровизиран кревет и кујнски нож на гражаното место на Кацарска.
Од МВР потврдуваат дека известен е јавен обвинител, предметите се подигнати за вештачење и се преземаат мерки за расчистување на случајот.
Македонија
Утре затворени неколку улици во Скопје
Утре од 08.30 до 12.30 часот, поради одржување на натпревар „Стопански триоги триатлон”, со стартно-целна позиција кај Спортскиот центар „Борис Трајковски” во дел од градот ќе има изменет режим на сообраќај, соопшти СВР Скопје.
Посебниот режим на сообраќај ќе опфати дел од уличната мрежа околу СЦ „Борис Трајковски” и дел од булеварот Илинден (десна коловозна лента), потоа на потегот од крстосницата со булевар 8 Септември до крстосницата со улицата Никола Парапунов и обратно.
Утре исто така со почеток во 09.45 часот, поради одржување на спортско-рекреативен настан „Прв до врв” ќе има посебен режим на сообраќај во делот од градот каде што ќе се реализира манифестацијата.
Настанот почнува пред Музеј на град Скопје – улица Св.Кирил и Методиј, потоа лево по булеварот Св.Климент Охридски, во продолжение право по булеварот Мајка Тереза, па лево по улицата Тодор Александров и по локалниот пат за Средно Водно до врв на Водно („Милениумски крст”).