Македонија
Левица бара одговорност од Бочварски за колапсот на железничкиот сообраќај
„Најфреквентната железничка линија Скопје-Велес-Прилеп-Битола од среда ќе остане само со еден воз во денот од постоечките три. Менаџментот на МЖ-Транспорт не дава објаснување за причините за најновото укинување на овие патнички линии, а ниту министерот Бочварски е посебно загрижен.
Железничкиот патнички сообраќај во Македонија со години е во колапс. Во јануари беа укинати и линиите Скопје-Куманово-Табановце-Скопје. По укинувањето на овие линии, беше дадено образложение дека има недостаток на машиновозачи во МЖ-Транспорт, а во меѓувреме, во јуни 2023 година се вработија 40 машиновозачи на неопределено време. На ова укинување претходеше укинување на релациите Скопје-Кичево-Скопје и Скопје-Кочани-Скопје од мај 2021 година. Веќе неколку години нема воз и на релацијата од Скопје кон Белград и Солун.
Додека Србија гради современа железничка инфраструктура, македонската железничка структура буквално се распаѓа. Додека претпријатието трпи загуби од 4 до 6 милиони евра годишно, а железничарите молат за плата, менаџментот си определува безобразно високи плати. Македонските железници одбележаа јубилеј од 150 години со возови кои имаат просечна старост од 50 години, вагони без греење, стари и небезбедни пруги и долгови од над 30 милиони евра.
Корумпираната спрега СДС-ДУИ, наместо да работи на модернизирање на железницата што ќе овозможи брз транспорт како во повеќето европски држави, го запоставува и тоа малку што остана од македонската железничка инфраструктура и опрема. Левица повикува на одговорност од министерот поради колапсот на македонскиот железнички сообраќај!
Додека актуелната политичко-криминална и клиентелистичка власт декларативно се залага за поврзување со Европа, граѓаните се принудени да живеат во изолација поради катастрофалната сообраќајна инфраструктура“.
Соопштение на Левица
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Пожарникарите извлекоа паднат човек во реката Драгор
Регионалниот ЦУК Битола информира дека пожарникарите од ТППЕ Битола од 18.45 до 19.35 часот, со четири пожарникари и едно противпожарно возило интервенирале на извлекување паднат човек во река Драгор кај месноста „Сали Мост“.
Паднатото лице не било повредено.
Од ЦУК апелираат за голема внимателност при појава на локалните нагли метео промени, да се избегнува движење во засеци во природата, суводолици и многу блиску до речни корита… и особена внимателност при грмежите и молњите, односно при силните електрични празнења: да не се престојува на отворен простор и под осамени дрвја, внимателно возење, особено на патиштата низ котлините, речните долини и клисурите, каде што има можност од појава на помали одрони при вакви променливи метео услови.
Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Сите итни случаи се пријавуваат на Единствениот повикувачки број за итни случаи 112 во ЦУК, особено кога граѓаните имаат животозагрозувачки ситуации. Истовремено, ЦУК информира дека е потребно и е корисно да се следат препораките и информациите од медиумите за превенција, а и за реагирање при итни случаи.
Македонија
Променливо облачно со повремени локални врнежи од дожд
Времето денеска ќе биде променливо облачно со повремени локални врнежи од дожд. Попладне на повеќе места ќе биде нестабилно со пороен дожд и грмежи локално во форма на краткотрајно невреме со интензивен пороен дожд, силен ветер и изолирана појава на град. Минималната температура ќе биде во интервал од 12 до 16, а максималната ќе достигне од 22 до 27 степени.
Во Скопје променливо облачно со повремен дожд. Попладне во делови од котлината ќе биде нестабилно со пороен дожд, грмежи и услови за појава на краткотрајно невреме. Минималната температура ќе се спушти до 16, а максималната ќе достигне до 26 степени.
До среда ќе се задржи нестабилно време, претежно во попладневните часови со локален пороен дожд и грмежи. Наместа ќе има услови процесите да бидат поинтензивни во форма на краткотрајно невреме, со засилен ветер, обилен пороен дожд за кратко време и изолирана појава на град. Во четврток ќе има услови за краткотраен дожд, претежно во планинските подрачја, а преодно стабилизирање на времето се очекува во петок.
Температурите ќе бидат без значителна промена.
Скопје
Делови од три скопски општини денеска без струја
Според добиеното известување од ЕВН Македонија, Регионалниот центар за управување со кризи информира дека поради реконструкција денеска без снабдување со електрична енергија ќе останат делови од три скопски општини.
Во периодот од 09:00 до 15:00 часот без напојување ќе останат корисниците на дел од село Долно Лисиче, реонот околу чаталот, ул.10 во општина Аеродром.
Во периодот од 10:30 до 14:30 часот без напојување ќе останат корисниците дел од улица 16, на патот кон Визбегово во општина Карпош.
Во периодот од 13:00 до 14:30 часот без напојување ќе останат објектите на градинката Росица, на улица Мечкин Камен, број 45А. во општина Ѓорче Петров.