Македонија
Грковска: Во време на дезинформации и поларизирачки наративи во јавноста тешко пробиваат теми поврзани со демократските вредности
„Прашањата на довербата во институциите и довербата во медиумите се многу тесно поврзани. Во подигнување на севкупните стандарди во општеството, не само во поглед на борбата со дезинформациите, ние мора да бидеме заедно. Некои битки се заеднички за целото општество и затоа мора да имаме широк општествен консензус за теми што нè засегаат сите и што го допираат секој граѓанин“, изјави заменичката на претседателот на Владата задолжена за политики за добро владеење, Славица Грковска, на панел-дискусијата организирана од Институтот за медиуми и аналитика, во чии рамки беше промовирана публикацијата: „Во(н) фокусот на медиумите: Демократски институции, владеење на правото и реформи во јавната администрација“.
Вицепремиерката во своето обраќање истакна дека со оглед на политичкиот и медиумскиот пејзаж во земјата, кој е обременет со поларизирачки наративи, во јавноста тешко пробиваат теми поврзани со демократските вредности и со потребата од јакнење т.н. меки вештини, а кои се клучни за да се подобрат човечките капацитети во институциите. Токму отсуството на свест за штетноста на неодговорното, непрофесионалното и незаконско однесување е една од причините за високата толеранција кон корупцијата во општеството, изјави Грковска додавајќи дека паралелно со реформите на полето на владеење на правото мора континуирано да се работи и на менување на светогледот.
„Имаме добра стратешка насоченост на реформите, а пристапувањето кон ЕУ е носечката сила за да ги спроведеме. И секој што останува слеп на тој факт сметам дека не може да се нарече патриот и дека и мисли добро на својата земја. Реално е да има сили во општеството, кои сакаат да остане статус кво затоа што тоа одговара на нивните интереси. Но, реална е и можноста да се издигнеме над тоа и да ги забрзаме подобрувањата во секојдневието“, изјави вицепремиерката Грковска и истакна дека на европското партнерство не треба да се гледа како на камшик што нè тера со сила напред, туку како на водич кон посредена и поефикасна држава во поглед на испораката на квалитетни услуги на граѓаните.
На настанот организиран од Институтот за медиуми и аналитика се обрати амбасадорката на Швајцарија, Вероник Хулман, а на панелот, модериран од Петрит Сарачини, покрај вицепремиерката Грковска, учествуваа и директорот на Македонскиот центар за меѓународна соработка, Александар Кржаловски, директорката на Институтот за општествени и хуманистички науки, Катерина Колозова, и раководителот на истражувања во ИМА, Жарко Трајаноски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
За јакнење на јавната доверба и углед на судството: општите седници на Врховниот суд ќе бидат јавни
Општата седница на Врховниот суд на Република Северна Македонија денеска на предлог на претседателката на Врховниот суд, Беса Адеми, донесе измени на Деловникот за работа на Врховниот суд со кои се овозможува јавност на Општата седница.
Во новите измени на Деловникот за работа на Врховниот суд се пропишува дека општите седници на Врховниот суд на Република Северна Македонија се јавни, а јавноста во работата на Општата седница се обезбедува и со присуство на претставници на средствата за јавно информирање.
Претседателката на Врховниот суд на денешната Општа седница истакна дека значењето на Врховниот суд од уставен и законски аспект, како и значењето на прашањата кои се разгледуваат пред Општата седница од правен аспект, а воедно се од интерес за граѓаните, ја наметнуваат потребата од јавност.
„Измените на Деловникот за работата на Врховниот суд се во согласност со темелните уставни вредности, законските начела и меѓународните принципи. Со предложените измени на Деловникот, ќе се даде значаен придонес за јакнење на јавната доверба и углед на судството и на Врховниот суд како највисок суд во државата.
Со предложените измени се предвидува јавност во работата на Општата седница и остварување на јавноста во работењето на судот преку нормативна новина која ќе ја унапреди и соработката и комуникацијата на Врховниот суд на Република Северна Македонија со медиумската заедница и со пошироката заинтересирана јавност.
Предложените измени се засноваат на уставните и законските начела за јавност на судството, највисоките меѓународни правни норми интегрирани во домашното законодавство, принципите на Европската конвенција за заштита на човековите права и стандардите на Европскиот суд за човековите права, европските стандарди и меѓународните документи од областа на судството и заложбите и активностите на Советот за отворено судство“, образложи претседателката Адеми.
Македонија
Мицкоски од Брисел: Бевме понижувани многупати, ние не можеме повеќе да прифаќаме ултиматуми
Денеска до сега, до овој момент имав две значајни средби. Првата беше работниот ручек кој што го организираше старо-новата претседателка на Европската Комисија Урсула Фон Дер Лајен, на кој што беа присутни и останатите пет лидери од регионот на Западен Балкан, а потоа и средба со претседателот на Европскиот Совет Шарл Мишел, информира од Брисел премиерот Христијан Мицкоски.
„Она кое што можев да го кажам таму е дека мора процесот на интегрирање во рамките на Европската Унија и за нас, но и за регионот да се темели на процес каде што ќе се оценуваат постигнувањата, а не на билатерализација, односно на билатерални прашања, кои што ќе бидат одлучувачки фактор.
За жал, ние речиси две и пол децении откако го започнавме овој интеграционен процес, откако го потпишавме Договорот за асоцијација и стабилизација, сме жртви на билатерални проблеми, односно на билатерализација на претпристапниот процес. И она што таму го кажав е дека ние сега се бориме да започнеме преговори во кои што ние ќе ги зајакнеме институциите и ќе ги збогатиме капацитетите. Не зборуваме за полноправно членство во рамки на Европската Унија. Ние поради билатерални прашања, поради прашања кои што се поврзани од средниот век не можеме да се развиваме како држава за 21, 22 век, а камоли пак да зборуваме за нешто повеќе“, изјави Мицкоски.
Уште еднаш потенцирав, нагласува Мицкоски од Брисел, дека ние не можеме повеќе да прифаќаме ултиматуми.
„И за нас принципот тие се таму, вие сте надвор, ако сакате да бидете таму треба тоа да го прифатите, простете, но ние такво нешто не можеме да прифатиме. А од друга страна ни велат дека има желба да бидеме како држава, членка во Европската Унија. Мојот одговор на таа теза е, ако има желба, тогаш има и начин. Ние сме тука да бидеме конструктивни, да останеме фокусирани на исполнување на оваа стратешка цел. Остануваме фокусирани да предлагаме решенија, и ако навистина има желба, тогаш има и начин“, вели премиерот.
Појасни дека за време на ручекот еден од присутните споменал дека се потребни жртви да се направат во овој процес на интегрирање на регионот во рамките на Европската Унија.
„Јас само потенцирав дека правење жртва можеби за нас е и добар збор и политички коректен збор, бидејќи ние бевме жртва на многу понижувања во минатото. Пожртвуваност е нешто друго. Но, ние бевме понижени многу пати. Ќе ве потсетам во името на европските вредности променивме знаме, променивме банкноти, неколку пати Устав менувавме, менувавме име, што не направивме за да покажеме дека навистина сакаме да бидеме дел од европското семејство. И некој кога ќе ми каже ама тоа е rule of unanimity или правилото на еден глас, ве молам, тоа е ултиматум.
Не се тие европските вредности во кои што мојата генерација се вљуби. Јас сум подготвен со секого да разговарам, колку е тоа потребно, со секој буквално да разговарам додека не најдеме вистински пат, кој што овој пат нема да биде понижувачки. Да ни дозволат да ги јакнеме институциите и да ги збогатиме нашите капацитети како држава, тоа е она што го барам. Дали е многу? Јас мислам дека не е многу“, додава Мицкоски во изјавата од Брисел.
Македонија
Ѓорѓиевски на средба со НДИ – Борбата против корупцијата е приоритет
Во просториите на општина Кисела Вода, градоначалникот и претседател на ЗЕЛС, одржа состанок со претставници на НДИ, кои го раководат проектот за борба против корупција на локално ниво.
Проектот е финансиран од Швајцарската амбасада и треба да трае 8 години. Основната цел на проектот е да се изнајдат механизми со помош на кои максимално ќе се намали корупцијата на локално, општинско ниво.
За таа цел, тие на средбата сакаа да слушнат што се основните цели во поглед на децентрализација на ЗЕЛС, како се одвиваат процесите на дигитализација на локално ниво, но и каква е соработката на ЗЕЛС со централните власти, односно што очекуваме брзо да се реализира при преговорите со Владата, информираат од кабинетот на Ѓорѓиевски.
„Ѓорѓиевски ги извести за меморандумот што пред месец дена го склучија ЗЕЛС и Владата, но и за систематизираните ставови, кои ги подготвуваме секоја година и после консултација со членките и усвојување на седница на Управен одбор на ЗЕЛС, ги доставуваме како најитни барања до Владата.
Стана збор и за лошата состојба со финансиите со кои се соочува, речиси секоја општина и нашите барања до Владата, тоа да се промени во позитивна смисла.
Претставниците на НДИ пак, не известија дека поминала подготвителната фаза на нивниот проект и дека очекуваат во ноември да го потпишат договорот за почеток на реализацијата на проектот, кој треба да трае 8 години. Известија дека, по потпишување на нивниот договор со Швајцарската амбасада, сакаат да потпишат договор со ЗЕЛС, за соработка и заедничка реализација на истиот“, се истакнува во дописот.