Германија ќе ја поддржи Украина во производството на ракети со долг дострел, беше соопштено по средбата на германскиот канцелар Фридрих Мерц и украинскиот претседател Володимир Зеленски во Берлин.

„Сакаме да овозможиме оружје со долг дострел. Сакаме да овозможиме и заедничко производство“, рече германскиот канцелар Фридрих Мерц (Христијанско-демократската унија ЦДУ) на заедничката прес-конференција по средбата со украинскиот претседател во Берлин.

Мерц конкретно не ги спомна испораките на германските крстосувачки ракети Таурус, но спомна заедничко производство на соодветно оружје.

„Министрите за одбрана на Германија и Украина, Борис Писториус и Рустем Умеров наскоро ќе потпишат писмо за намери“, рече Мерц.

Нагласи дека станува збор за производство на ракети без ограничување на дострелот, кои Украина ќе може да ги користи против воени цели лоцирани далеку од нејзината територија.

„Во моментов не можеме да откриеме повеќе детали, но можете да тргнете од фактот дека руското отфрлање на примирјето и водење преговори сега ќе имаат последици“, рече Мерц, додавајќи дека тоа е „нова форма на воено-индустриска соработка“.

„Ќе продолжиме да и помагаме на Украина и ќе ја прошириме таа помош“, рече Мерц.

Володимир Зеленски објасни дека станува збор за финансирање на постоечки воени проекти во самата Украина и соработка на ниво на воена индустрија.

Во исто време, украинскиот претседател изјави дека Украина „се уште се надева“ на испорака на крстаречки ракети со долг дострел од типот Таурус.

„Што се однесува до ракетите со долг дострел од Германија и производството на други земји, тие сè уште ни се потребни и секако дека ќе продолжиме да разговараме за ова прашање“, рече Зеленски.

Истовремено, тој нагласи дека Украина сака мир и дека за таа цел украинскиот министер за одбрана разговара со неговиот руски колега.

Германија веќе подолго време разговара за испорака на ракети Таурус во Украина. Поранешниот канцелар Олаф Шолц го одбил од страв да не ја вовлече Германија во војна.

Канцеларот Мерц по средбата со Володимир Зеленски најави и дека германските министри оваа година ќе одржат заеднички консултации со украинската влада.

Мерц рече дека Германија и Украина се зближиле од почетокот на целосната руска инвазија на Украина во 2022 година и дека германските и украинските власти тесно соработуваат.

Најмалку пет лица загинаа, а шест се водат за исчезнати по силната експлозија во хемиска фабрика во источна Кина вчера, соопштија локалните власти. Експлозијата исфрли огромна колона од сив и портокалов чад и ги скрши стаклата на околните згради, а беше започната и голема спасувачка операција.

Несреќата се случила во фабрика во градот Гаоми, провинцијата Шандонг, неколку минути пред пладне по локално време, објавија локалните медиуми. Причината за експлозијата не е соопштена. Локалните власти соопштија дека 19 лица се здобиле со полесни повреди.

На кинеските социјални мрежи беа објавени снимки на кои се гледа како густ чад се издига над зградите во индустриската зона. На некои ниски згради во близина им беа скршени прозорците. Противпожарните и спасувачките служби на терен испратија 55 возила и 232 лица, а Министерството за вонредни состојби испрати работна група и дополнително засилување, се вели во соопштението на Министерството.

Вработена во хотел лоциран на околу три и пол километри од фабриката изјави за Си-Ен-Ен дека ја слушнала експлозијата околу пладне.

„Беше многу гласно. Траеше само еден момент“, рече таа, додавајќи дека хотелот не е оштетен.

Работничка од фабрика оддалечена околу шест километри изјавила дека прво слушнала силна експлозија, а потоа почувствувала тресење и „силен налет на ветер“.

„Тој силен налет толку многу ме исплаши што немав храброст да ја напуштам канцеларијата“, вели таа. „Се искршија вратите и прозорците на фабриката“.

Компанијата „Шандонг Јудао Хемикал“ е во сопственост на корпорацијата „Химил груп“, која ја поседува и компанијата „Химил Механикал“, чии акции вчера попладне паднаа за речиси четири отсто, пренесува Ројтерс.

Шандонг Јудао Хемикал е основана во август 2019 година, зафаќа повеќе од 46 хектари во Хемискиот парк Гаоми Ренхе и вработува повеќе од 300 луѓе, според веб-страницата на компанијата.

Компанијата, според нејзината веб-страница, се занимава со развој, производство и продажба на пестициди, фармацевтски производи и хемиски меѓупроизводи.

Кремљ реагира откако американскиот претседател Доналд Трамп вчера го предупреди рускиот претседател Владимир Путин дека „си игра со оган“, по руските беспилотни и ракетни напади врз Украина.

На платформата „Тру соушал„, Трамп рече: „Она што Владимир Путин не го сфаќа е дека, да не бев јас, на Русија веќе ќе и се случеа многу навистина лоши работи, и мислам на навистина лоши… Тој си игра со оган!“

На прашањето за таа изјава на американскиот лидер, портпаролот на Кремљ Дмитриј Песков рече:

„Очигледно е дека американската страна прави значителни напори да промовира мировно решение и дека претседателот Трамп сака што е можно поскоро да се постигне договор.

И сакаме да повториме дека сме му благодарни на претседателот Трамп за неговите напори за посредување.

Истовремено, има голем број нијанси кои не смеат да се игнорираат и кои ниту една страна нема да ги жртвува на сметка на своите национални интереси.

Исто како и САД, Русија има свои национални интереси кои се од критично значење за нас. Во моментов се подготвуваме за следната рунда преговори со украинската страна и ќе ги продолжиме контактите со Американците“, се вели во соопштението на Песков.