Свет
(Видео) „Ги слушнавме децата, пукавме додека не замолчеа“, Израелците објавија признание на припадник на Хамас

Војската на Израел објави снимка од сослушувањето на човек за кој велат дека е член на Хамас вклучен во нападот врз Израел на 7 октомври. Човекот на видеото го опишува убиството на израелските деца во Кфар Аз, израелски кибуц на границата со Газа.
„Нашата единствена мисија беше да убиваме, а не да киднапираме. Да го убиеме секој човек што ќе го видиме и да се вратиме во Газа“, му рекол Амер Абу Гоша, член на Нукба, командоска единица на Хамас, на испитувачот.
Тој рече дека неговата група се упатила кон Кфар Аз со џип и влегла во кибуцот откако еден од нив ја отворил вратата со експлозивна направа. Кога влегле во градот, оделе од куќа до куќа, ги палеле, пукале со „калашникови“ и фрлале гранати врз сите на кои ќе налетаат.
Во еден момент Абу Гоша опишува како влегол во куќата и слушнал гласови на мали деца што плачат внатре во безбедната соба и пукале кон вратата од собата. Тој вели дека гласовите на крајот престанале, па заклучил дека децата умреле.
Абу Гоша и дел од неговата група подоцна влегле во вооружен конфликт со војниците на ИДФ, кои влегле во куќата преку прозорците и биле принудени да се предадат.
На прашањето зошто убивале жени и деца, Абу Гоша одговара: „Ни рекоа дека сите доселеници биле војници“.
На прашањето која е разликата меѓу Хамас и ИСИС, тој вели дека испитувачите му покажале видеа од некои од ужасите што ги извршиле терористите на Хамас врз израелските цивили по што тој искоментирал: „Нема разлика. Сум видел видеа што се полоши од ИСИС“.
Израел ја напаѓа Газа повеќе од три недели како одговор на најтешкиот масакр во неговата историја, кој на 7 октомври го извршија терористи од Хамас и други екстремистички групи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израелски војници забележани во градот Газа

Палестински очевидци тврдат дека во градот Газа забележани се израелски војници.
Според нив израелските војници биле забележани во населбата Сабра, во близина на зграда во која порано се наоѓало училиште.
Израелските војници наводно се заблежани во градот Газа откако израелскиот премиер Бенјамин Нетанјаху одобри план за преземање на градот, во кој живеат околу еден милион луѓе.
Израелската армија не ги коментираше палестинските наводи, истакнувајќи оти не ги открива позициите на своите војници.
Претходно Израел соопшти дека планира да евакуира околу еден милион жители од градот пред офанзивата, која се очекува да почне најрано во септември.
Свет
Зеленски вели дека постои вистинска можност да заврши војната во Украина

Претседателот на Украина, Володимир Зеленски синоќа најави дека следните денови ќе бидат готови безбедносните гаранции за неговата земја.
Тој, по телефонскиот разговор со премиерот на Холандија, Дик Шуф, на платформата Икс објави дека „во моментот тимови на Украина, САД и европските партнери работат на решение“.
Според Зеленски постои „вистинска можност да се заврши оваа војна“, додавајќи дека Украина е „подготвена за конструктивни чекори што можат да доведат до вистинскиот мир“.
– Русија од своја страна не покажува намера за мир и продолжува да ги гранатира нашите градови. Сите сигнали што доаѓаат од Москва овие денови ги толкуваме на ист начин. Ни треба притисок за промена на нивниот став, како и состанок на највисоко ниво за да се разговара за сите прашања, посочи Зеленски.
Свет
Северна Кореја тестираше нови ракети

Северна Кореја вчера истрела два нови противвоздушни проектили за уништување на различни воздушни цели, меѓу кои дронови и крстосувачки ракети. Тестирањето на новото оружје го надгледуваше севернокорејскиот лидер Ким Џонг-ун.
Како што јави Корејската централна новинска агенција (КЦНА) новото оружје има „супериорна борбена способност“ и користи „единствена технологија“.
Тестирањето на ново оружје се одвива во време на зголемени тензии со Јужна Кореја. Официјален Сеул вчера соопшти дека на 19 август јужнокорејски војници отвориле предупредувачки оган кон припадници на севернокорејската армија, кои накратко навлегле во Демилитаризираната зона.
Исто така во регионот се одржува заедничка воена вежба помеѓу Јужна Кореја и САД, а за утре е предвидена средба на американскиот претседател Доналд Трамп со новоизбраниот јужнокорејски претседател Ли Џае-мунг.