Свет
Се воведува европски СОС за лекови, земјите ќе разменуваат залихи во случај на недостиг

Се воведува европски СОС за лекови, што значи дека доколку на една земја од ЕУ ѝ недостасува лек, а го има во друга, залихите ќе бидат веднаш испратени, пишува Јутарњи лист.
Пандемијата на корона ја соочи Европа со низа проблеми кои произлегуваат од фактот дека „старата дама“ со децении работеше напорно за да ја уништи сопствената фармацевтска индустрија, потпирајќи се, особено кога станува збор за суровините, на Азија. Колку тоа беше кратковидно покажа сè почестиот недостиг на лекови во земјите на ЕУ, дури и на основни како антибиотици.
Со цел да се намалат штетите и да се обезбеди снабдување и да се избегне недостиг, Европската комисија неодамна усвои низа мерки, па така на пример ХЕРА (комисија за подготвеност и одговор на здравствени кризи) и ЕМА (Европска агенција за лекови) утврдија кои се клучните антибиотици за за кои ризикот од недостиг се предвидува на почетокот на зимата.
Во последната комуникација, од крајот на минатиот месец, се прецизирани дополнителни мерки за спречување на „критичните недостиг на ниво на ЕУ“ и методи кои треба да го спречат и недостигот на снабдување во ЕУ за оние лекови чија достапност мора постојано да се гарантира.
Се очекува лансирање на Европскиот доброволен механизам за солидарност за лекови преку кој една земја-членка ќе сигнализира дека и е потребен одреден лек, а другите потоа треба да и понудат лекови од нивните залихи.
Исто така, до крајот на оваа година ќе биде креирана листа на „критични лекови“, што ќе биде прв чекор во анализата на синџирот на снабдување на одредени лекови, која ќе биде завршена до крајот на април следната година, а што ќе биде основа за новите неопходни мерки. Најавена е и регулаторна флексибилност на земјите-членки кои ќе можат да применуваат исклучоци за пациентите да можат навремено да добијат лек. Ќе биде можно, на пример, да се продолжи рокот на траење или побрзо да се одобрат алтернативните лекови.
Новите насоки на ЕУ за јавните набавки треба да бидат објавени најдоцна до почетокот на 2024 година и тие треба да ја зајакнат безбедноста на снабдувањето. Заедничката набавка на антибиотици и лекови против респираторни вируси ќе започне следната зима, пишува Јутарњи лист.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Пожар во затвор во Сплит, неколку затвореници хоспитализирани

Неколку затвореници се повредени во пожарот во сплитскиот затвор Билице, кој е изгаснат, соопшти денес Сплитскиот противпожарен оперативен центар.
Како што е наведено, затворскиот персонал го изгаснал пожарот што избувнал синоќа, а пожарникарите ги евакуирале затворениците, од кои неколку побарале медицинска помош поради вдишување чад и биле пренесени во сплитската болница.
„Добивме дојава за пожар во една од ќелиите на затворот околу 21:30 часот, а по пристигнувањето на пожарникарите затворскиот персонал веќе го изгаснал пожарот во најголем дел, а пожарникарите веднаш ги евакуирале затворениците“, изјавиле за Хина од Противпожарниот центар.
Свет
Фицо: Не повикувам на укинување на демократијата, но ЕУ треба да размисли за промена на системот

За време на вчерашната посета на Узбекистан, словачкиот премиер Роберт Фицо посочи дека авторитарните држави можат да бидат економски поефикасни од демократиите и повика на преиспитување на европскиот демократски модел.
Фицо рече дека Европа треба да размисли за реформирање на својот систем на управување базиран на слободни избори за да остане глобално конкурентна. Тој ги пофали земјите како Узбекистан, Кина и Виетнам за нивната способност да дејствуваат порешително по економските прашања.
Кога новинарите го прашаа, Фицо појасни дека не повикува на крај на демократијата, но тврдеше дека вклучувањето премногу политички партии во донесувањето одлуки ја ослабува способноста на државата да дејствува.
„Ако имате сто политички партии, не можете да се натпреварувате“, рече тој.
„Ако владата се состои од четири политички субјекти, не можете да се натпреварувате“, додаде тој.
Фицо, кој се врати на власт во 2023 година за да го преземе својот четврти мандат, се соочи со масовни протести во последните месеци, а критичарите го обвинуваат за авторитарни аспирации и водење проруска надворешна политика.
Свет
Орбан: Дипломатите мора да ја преземат контролата од генералите, оваа војна не може да се добие

Унгарскиот премиер Виктор Орбан изјави дека на Украина ѝ е потребно примирје, преговори и мир, како и дека „дипломатите треба да ја преземат контролата од генералите“. На состанокот на парламентарната група „Патриоти за Европа“ во Европскиот парламент, рече дека политичарите кои се залагаат за војна сакаат луѓето да веруваат дека војната мора да продолжи, објави унгарската агенција МТИ.
„Ве уверувам дека оваа војна не може да се добие, нема решение на бојното поле, само мртви, страдање и уништување“, истакна тој. Унгарскиот премиер, исто така, рече дека неговата земја е „црна овца“ на Европската Унија и кошмар за Брисел, додека претставува надеж за европските патриоти.
„Не сакаме Брисел да воведе воена економија под изговор на војна, не сакаме да зема огромни кредити, да ги федерализира парите на земјите-членки и да ги вовлекува нашите земји во трка во вооружување. Ве молам да ги запрете“, им рече Орбан на учесниците на состанокот.
Според него, Брисел ѝ се заканува и ја уценува Унгарија со финансиски санкции затоа што не ги пушта мигрантите во земјата, но Будимпешта попрво ќе им плати отколку да им дозволи на мигрантите да ја уништат безбедноста на унгарските градови и улици. „Се бориме за нашите семејства и татковина, дури и ако треба да се соочиме со целата бирократија на Брисел“, заклучи унгарскиот премиер, пренесува Танјуг.