Свет
Германија одобри десеткратно зголемување на извозот на оружје во Израел

Германската влада одобри домашни компании да доставуваат оружје и воена опрема за Израел со вредност речиси десет пати поголема отколку во цела 2022 година, покажуваат податоците на Министерството за економија.
До 2 ноември Владата издаде дозволи за извоз на оружје во Израел во вредност од речиси 303 милиони евра, покажуваат податоците што дпа ги доби денеска од Министерството за економија.
Сумата е речиси 10 пати поголема отколку во цела минатата година кога беше одобрена испорака на оружје во вредност од околу 32 милиони евра.
Речиси 85 отсто од 218-те извозни дозволи, од кои 185, беа издадени по нападот врз Израел на 7 октомври од страна на палестинската милитантна група Хамас.
„По терористичкиот напад на Хамас врз Израел, германската влада, со оглед на актуелната ситуација, дава приоритет на барањата за извоз на воена опрема во Израел и нивно решавање“, соопшти Министерството.
Министерството за економија мора да одобри извоз на оружје во договор со Министерството за надворешни работи и Канцеларијата за контрола на извозот (БАФА). Во особено чувствителните случаи, во постапката е вклучен и германскиот Совет за безбедност.
Според доставените информации, проектилите и артилериските гранати сочинуваат околу шест отсто од одобрениот извоз, со вредност нешто помала од 19 милиони евра, наведува агенцијата дпа.
Најголем удел во извозот има опремата како оклопни возила, воени камиони и заштитно стакло, со вредност на испораките од околу 284 милиони евра.
Во принцип, владата не објавува детали за испораките или конкретни информации за извезените производи, делумно со цел да го задржи идентитетот на производителот во тајност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Орбан: Унгарија успеа да се спротивстави на притисокот од Брисел

Орбан нагласи за унгарскиот јавен сервис дека владата со двотретинско мнозинство, која беше избрана во 2022 година, е клучна за зачувување на независноста на Унгарија во односите со Европската Унија.
„Европските бирократи вршат голем притисок врз земјите-членки да овозможат почеток на преговорите за пристапување со Украина, со поддршка на повеќе од 30.000 бирократи. Унгарија, сепак, стои цврсто затоа што народот создаде стабилна влада“, рече Орбан.
Тој нагласи дека, додека многу европски влади имаат коалиции што го отежнуваат постигнувањето обединета позиција, Унгарија ужива политичка стабилност што ѝ овозможува да се спротивстави на надворешните притисоци.
Унгарскиот премиер нагласи дека оваа стабилност е најважната предност на Унгарија во меѓународната конкуренција и рече дека земјата продолжува да се спротивставува на сите обиди за доведување во прашање на нејзиниот суверенитет.
Орбан, исто така, ја поздрави победата на Карол Навроцки на претседателските избори во Полска, нарекувајќи ја фантастичен резултат за Унгарија, што, според него, е продолжение на маршот на патриотите.
Тој додаде дека „Вашингтон експрес штотуку пристигна во Варшава“, алудирајќи на растечкото влијание на САД во регионот.
Свет
Трамп назначи 22-годишен градинар за шеф на канцеларијата за спречување на тероризам

Американскиот претседател, Доналд Трамп, назначи 22-годишник за раководител на главниот центар за спречување на тероризам на Министерството за внатрешна безбедност. Тој претходно работел како градинар и продавач во маркет.
Кариерата на Томас Фугејт тргна во миг. Само една година по дипломирањето, 22-годишникот без видливо искуство во националната безбедност сега е службеник во Министерството за внатрешна безбедност на САД, задолжен за главната владина агенција за спречување на тероризам.
Белата куќа го назначи Фугејт, кој претходно работеше во кампањата на Трамп и беше практикант во десничарската Фондација Херитиџ, на позиција во Министерството за внатрешна безбедност, која подоцна беше проширена за да го вклучи и Центарот за програми и партнерства за превенција (CP3). Канцеларијата ги води националните напори за спречување на злосторства од омраза, пукања во училиштата и други форми на целно насилство.
ProPublica известува дека назначувањето на Фугејт е најновиот шок за канцеларијата која е практично уништена откако Доналд Трамп се врати во Белата куќа и започна со ревизија на политиката за национална безбедност, фокусирајќи се речиси исклучиво на имиграцијата.
Веста за назначувањето предизвикува загриженост кај експертите за борба против тероризмот и непрофитните организации финансирани од CP3. Неколкумина признаа дека морале да побараат информации за Фугејт на LinkedIn – бидејќи никој во индустријата не го познавал.
Според неговиот профил, тој работел во супермаркет во Остин дури до август 2023 година како „член на тимот со повеќе функции“.
„Вршам разни задачи во секој оддел од продавницата, исполнувајќи клучни должности што придонесуваат за работењето на продавницата“, напишал Фугејт во своето CV.
Неговата прва работа во 2020 година била уредување на пејзажи. Тој напишал дека работи за своја компанија и дека неговата работа вклучува „косење тревници, корнење плевел, рабови на тревници и чистење на остатоци“.
Фугејт, исто така, завршил четиримесечен стаж во 2023 година во Фондацијата Херитиџ, конзервативен тинк-тенк кој стои зад контроверзниот „Проект 2025“, визија за целосна реконструкција на федералната влада.
Висок функционер во Центарот за програми и партнерства за превенција изјави за ProPublica дека на Фугејт „привремено му се дадени дополнителни лидерски одговорности поради неговиот успех“.
„Тоа е признание за неговиот ентузијазам за работата и неговиот успех на работното место“, рече функционерот.
Сепак, истражувачите за борба против тероризмот наводно се загрижени за назначувањето на Фугејт, со оглед на неговото неискуство.
„Можеби е чудо од дете. Можеби е како Дуги Хаузер и има што е потребно за да води канцеларија на 21 година. Но, тоа веројатно не е случај. Звучи како да поставиле практикант на чело“, изјави еден истражувач за ProPublica.
Свет
Русија го нападна Киев со ракети и дронови, погодени воз и станбени згради

Русија изврши интензивен ракетен и беспилотен напад врз украинскиот главен град Киев, во текот на ноќта, при што загинаа четири лица, соопштија украинските власти, додека моќни експлозии одекнуваа низ целиот град.
Нападот следеше по предупредувањето од рускиот претседател Владимир Путин, пренесено од американскиот лидер Доналд Трамп, дека Кремљ ќе возврати за нападот во кој украинските беспилотни летала уништија неколку стратешки бомбардери во напади во Русија.
Градоначалникот на Киев, Виталиј Кличко, изјави дека 20 лица се повредени, од кои 16 се во болница, а четири лица починаа.
„Градското метро беше нарушено од руски напад што погоди и оштети воз помеѓу станиците“, соопшти воената администрација на Киев.
„Во населбата Соломенски, руски дрон погоди станбена зграда, оставајќи огромна дупка и трага од оган“, изјави фотограф на „Ројтерс“ на местото на настанот.
Порано таа вечер, новинарите на „Ројтерс“ го слушнаа звукот на руските беспилотни летала, заедно со звуците на украинската воздушна одбрана.
Сведоци на „Ројтерс“ пријавија серија продорни експлозии доволно силни за да ги потресат прозорците далеку од местото на ударот.
Некои жители на Киев побараа засолниште во метро станиците или подземните гаражи.
Украинските воздухопловни сили соопштија дека градот бил цел на беспилотни летала и крстосувачки ракети „Калибр“.
Во еден од најсмелите напади од почетокот на војната меѓу Украина и Русија, Украина минатиот викенд уништи некои од руските стратешки бомбардери на земја користејќи беспилотни летала скриени во дрвени куќи.
Кремљ најави одмазда за украинскиот напад врз руските воздухопловни бази, рече Трамп по телефонскиот разговор со Путин во средата.