Свет
Палестина: Израел уби деветмина на Западниот Брег; ИДФ: Жителите пукаа во војници

Најмалку девет лица загинаа, а 15 се ранети во денешната израелска воена операција во Џенин на Западниот Брег, соопшти палестинското Министерство за здравство.
Израелските одбранбени сили (ИДФ), пак, објавија дека за време на операцијата, со дрон биле нападнати вооружени жители на бегалскиот камп во Џенин. Тие им се заканувале на израелските сили пукајќи кон војниците и фрлајќи експлозивни направи, соопштија израелските сили.
Џенин се смета за упориште на палестинските милитанти и постојано бил напаѓан од израелските вооружени сили. Ситуацијата на Западниот Брег значително се влоши откако започна војната меѓу Израел и исламистичкиот Хамас кој владее со Газа.
Палестинското Министерство за здравство соопшти дека 174 Палестинци се убиени на Западниот Брег од почетокот на војната по бруталните напади на Хамас на 7 октомври.
Исто така, има се повеќе извештаи за насилство од израелски доселеници врз Палестинците. Од почетокот на 2023 година, 370 Палестинци се убиени во израелските воени операции на Западниот Брег, главно во судири, а некои и во сопствени напади. Ова е најголема бројка во последните 15 години, според организациите за човекови права.
Израел ја презеде контролата врз Западниот Брег и Источен Ерусалим во 1967 година. Палестинците бараат територии за независна држава со главен град со источен Ерусалим, во кој доминираат Арапите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Труење со хлор во бања во Унгарија: 14 лица хоспитализирани, околу 120 евакуирани

Поради труење со хлор, 14 лица се итно хоспитализирани, а 120 се евакуирани од бањата Туркева во Унгарија.
Адам Немет, портпарол на Дирекцијата за управување со катастрофи на округот Јас-Наѓкун-Солнок, изјави дека мешањето на две хемикалии за прочистување на водата предизвикало формирање на токсичен гас, кој предизвикал гадење кај капачите.
Унгарските медиуми објавија дека 14 лица морале веднаш да бидат однесени во болница.
Хлорниот гас е жолтеникаво-зелен по боја, има силен мирис и може да предизвика труење дури и во мали количини. Во повисоки концентрации, може да доведе до смрт, според написите.
Експертите појаснуваат дека труењето со оваа состојка е скриена, но реална опасност во домаќинствата, како и во индустријата. Гасот може да се појави како резултат на мешање на различни средства за чистење.
Хлорниот гас прво ги напаѓа дишните патишта. Вдишувањето може да го иритира носот, грлото, очите и белите дробови на краток рок. Дури и при ниски концентрации, може да се појави гребење во грлото, солзење, кашлање и течење на носот.
Во случај на умерени количини, симптомите се влошуваат: пациентот може да почувствува чувство на задушување, притисок во градите и главоболка.
Високите концентрации се особено опасни: може да се развие белодробен едем, кој често не се појавува веднаш, туку дури и неколку часа подоцна, предизвикувајќи сериозен недостаток на кислород и состојба опасна по живот.
Труењето е особено опасно за децата, постарите лица и лицата со хронични белодробни заболувања.
Фото: принтскрин
Свет
Песков: Се користат големи ресурси за да се претстави Русија како непријател на Европа

Кремљ ја забележа вчерашната изјава на претседателот на Соединетите Американски Држави, Доналд Трамп, за нов рок за прекин на огнот во Украина, изјави портпаролот на Кремљ, Дмитриј Песков.
Во понеделникот, Трамп го скрати претходно утврдениот рок од 50 дена за прекин на огнот на 10 или 12 дена, наведувајќи го недостатокот на напредок во решавањето на конфликтот, објави РИА Новости.
Исто така, Трамп се закани дека ќе воведе секундарни санкции и царини за земјите што соработуваат со Русија, наведувајќи дека таквите мерки би можеле да вклучуваат „100-процентни царини“.
„Вчера ја добивме изјавата на претседателот Трамп“, изјави Песков пред новинарите, коментирајќи ја најавата на Трамп, но не прецизираше каков ќе биде понатамошниот одговор на Кремљ на тие изјави.
Исто така, Песков ги негираше извештаите за можна средба меѓу рускиот претседател Владимир Путин и Трамп, наведувајќи дека такво прашање дури и не било на дневен ред и сè уште не е.
Кога беше прашан за сегашните односи меѓу Русија и Европа, Песков рече дека работата за создавање слика за Русија како непријател во Европа продолжува, „за што Москва жали“.
„За ова се користат големи ресурси, а оваа работа продолжува, на наше големо жалење. Ова очигледно не е во интерес на народите на европските земји“, рече Песков.
Тој повтори дека Русија останува посветена на мирно решавање на конфликтот во Украина, нагласувајќи дека „специјалната воена операција продолжува“, но дека Москва сè уште се стреми да го реши конфликтот преку мирен процес, а воедно да ги обезбеди интересите на Руската Федерација.
Фото: принтскрин
Регион
Србија им препорачува на граѓаните да не патуваат во Хрватска на почетокот на август

Министерството за надворешни работи на Србија им препорача на граѓаните на Србија да се воздржат од патување во Хрватска во периодот од 1 до 10 август.
Во соопштението Министерството им советува на граѓаните што ќе бидат на територијата на Хрватска во тој период да избегнуваат собири и други јавни собири, кои може да носат ризик од инцидентни ситуации.
Во тој период – на 5 август, Хрватска ја одбележува годишнината од воено-полициската операција „Бура“. Прославата се одржува на денот кога завршила акцијата. Во Србија годишнината од „Бура“ е на 4 август, денот кога почнала, како ден на сеќавање на жртвите и протераните Срби.