Свет
(Видео) Ѝ го грабна микрофонот на Грета Тунберг: „Дојдов за климата, а не за политички ставови“

Говорот на Грета Тунберг на големиот протест за климата во Амстердам вчера беше прекинат од маж што упадна на бината.
Човекот рече дека „дошол овде за демонстрации за климата, а не за политички ставови“ додека се обидувал да ѝ го одземе микрофонот од рацете на Грета Тунберг.
Непосредно пред инцидентот од толпата се слушнаа извици „Палестина ќе биде слободна“. Претходно на собирот, организаторите го прекинаа говорот на една активистка кога таа ја употреби фразата „Од реката до морето, Палестина ќе биде слободна“, пренесува новинската агенција „Ројтерс“.
Многу еврејски групи велат дека слоганот, користен на протестите во светот, е повик за уништување на Израел. Пропалестинските активисти тврдат дека повеќето луѓе што го користат бараат да се стави крај на израелската окупација на Западниот Брег и на блокадата на Газа, а не на елиминација на самиот Израел.
Кога човекот беше отстранет од бината, Тунберг се придружи на толпата во скандирањата: „Нема климатска правда во окупирана земја“.
Минатиот месец шведската активистка за климата беше на удар на критики откога сподели пропалестински пораки на социјалните мрежи, при што некои ја обвинија дека не покажува поддршка за израелските жртви во нападите на Хамас.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израел денеска ги врати телата на 15 Палестинци во Газа

Израел денеска ги врати телата на 15 Палестинци во Газа, со што вкупниот број на вратени лица се искачи на 135, соопшти денеска Министерството за здравство на Појасот управуван од Хамас.
Според договорот за прекин на огнот постигнат со посредство на американскиот претседател Доналд Трамп, Израел требаше да ги врати телата на 15 Палестинци за секој вратен починат израелски заложник, објави „Тајмс оф Израел“.
Претходно денеска, канцеларијата на израелскиот премиер Бенјамин Нетанјаху соопшти дека Хамас мора да го почитува договорот и да ги врати останките од преостанатите 18 убиени заложници кои сè уште се наоѓаат во Појасот Газа.
Израелската војска (ИДФ) претходно го информираше семејството на убиениот Елијаху Маргалит дека Хамас го вратил неговото тело во Израел синоќа.
ИДФ соопшти дека, според разузнавачките информации, Елијаху (75) бил убиен на 7 октомври 2023 година, а неговото тело подоцна било однесено во Појасот Газа од кибуцот Нир Оз.
Смртта на Елијаху Маргалит беше потврдена од израелската војска во декември 2023 година.
Свет
Милиони Американци би можеле да останат без купони за храна

Околу 42 милиони Американци би можеле да останат без купони за храна во ноември поради тековниот прекин на работата на федералната влада, предупреди министерката за земјоделство Брук Ролинс.
Програмата за дополнителна помош во исхраната (SNAP), позната и како купони за храна, е дел од клучната национална мрежа за безбедност на храната и обезбедува просечен месечен надомест од 188 долари по лице, пишува Си-Ен-Ен.
Ролинс рече дека средствата за програмата ќе бидат исцрпени во рок од две недели и ги обвини демократите за блокадата на финансирањето.
Свет
Десетици илјади евакуирани на Филипините, се приближува ураган

Десетици илјади луѓе на Филипините се евакуирани денеска од своите домови на брегот на Пацификот поради опасност од поплави во момент кога тропската бура „Феншен“ го зафати регионот, јавија светските агенции.
Бурата попладнево со брзина на ветрот до 80 км на час ја погоди општина Губат, на југоисточниот врв на главниот остров Лузон, соопшти државната метеоролошка служба.
Откако жителите беа евакуирани од крајбрежните и другите ризични области, локалните власти соопштија дека нема извештаи за сериозни штети или жртви.
„Имаше обилни дождови и силни налети на ветер, иако не толку силни“, изјави Рајан Естреладо, спасувач во Губат.
Ураганот вечер треба да помине во близина на островот Катандуанес, кој има население од 270.000 жители, со брзина на ветер до 90 км/ч. Се очекува „Феншен“ да се засили пред да стигне до копното по втор пат во централен Лузон, соопшти националната метеоролошка служба.