Македонија
Интегративните процеси од особена важност за стабилноста на регионот – порака од средбите на министерката Петровска со колегите од Црна Гора, Босна и Херцеговина и Косово
Министерската за одбрана Славјанка Петровска во рамки на состанокот на министри за одбрана на Иницијативата САД-Јадранска повелба денеска оствари одвоени средби со Драган Краповиќ, министер за одбрана на Црна Гора, Славен Галиќ, заменик-министер за одбрана на Босна и Херцеговина и Ејуп Маќедонци, министер за одбрана на Косово кое е земја-набљудувач во рамки на оваа Иницијатива.
На средбите Петровска истакна дека земјите од Западниот Балкан заслужуваат да бидат дел од Европската Унија и ја потенцираше важноста на интегративните процеси за безбедноста, стабилноста и просперитетот на регионот.
На новопоставениот црногорски министер за одбрана, Драган Краповиќ, министерката му посака успешен мандат и порача дека двете земји имаат одлични одбранбени односи како две сојузнички земји во НАТО, а заедно се посветени и на регионалните иницијативи како САД – Јадранската повелба.
„Овој состанок ја потврди посветеноста на регионот кон безбедноста. А5 е една успешна приказна која треба да послужи како пример за одлична регионална соработка. Билатерално имаме одлична одбранбена соработка која целосно ја поддржувам зашто денеска сме дел од Алијанса која ја трасира иднината“, рече министерката.
Министерот Краповиќ порача дека блиските односи помеѓу Северна Македонија и Црна Гора се приказ за трајното пријателство и отвореноста за уште поблиска соработка. Краповиќ се заблагодари за можноста за реализација на обуки за црногорските вооружени сили на Криволак, како и за школувањето на питомци за потребите на вооружените сили на Црна Гора на Воената академија во Скопје.
Министрите разговараа и за заедничкиот придонес на Северна Македонија во мултинационалните сили на НАТО во источното крило, што е приказ за заедничката посветеност на зацврстувањето на колективната одбрана на Алијансата.
На средбата со заменик министерот за одбрана на Босна и Херцеговина, Галиќ, Петровска порача дека Северна Македонија високо ја цени билатералната одбранбена соработка и е подготвена да ги пренесе искуствата на БиХ во евроатлантските интегративни процеси.
„Уверена сум дека денешната средба ќе придонесе за интензивирање на билатералната одбранбена соработка меѓу нашите две пријателски земји. Ја поддржуваме Босна и Херцеговина и подготвени сме да ги пренесеме нашите искуства во евроинтегративниот процес“, рече Петровска.
Министерката изрази задоволство што Северна Македонија придонесува во рамките на ЕУ операцијата „АЛТЕА“ во Босна и Херцеговина која е фактор на стабилност во земјата и во регионот.
Петровска и Галиќ разговараа и за можностите за унапредување на билатералната соработка преку потпишување на билатерален договор за соработка за што имаа целосна поддршка.
Министерката Петровска упати честитки и му посака успех и на новопоставениот косовски колега, Ејуп Маќедонци и истакна дека овие средби се показател за одличните односи помеѓу двете земји.
Петровска потенцираше дека од најголема важност е сигурен, стабилен и просперитетен регион и дека Северна Македонија секогаш дава приоритет на политичкиот дијалог за отворените прашања.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Простор за разговор“ во Охрид
Вечерва со почеток во 20 часот, ХЕРА – Асоцијација за здравствена едукација и истражување во соработка со Интерарт културниот центар организира настан „Простор за разговор“ во Младинскиот центар во Охрид, за зајакнување на родовата еднаквост.
Настанот е дел од проектот „Простор за разговор“ со кој преку уметност, танц, театар и филм сплотени во еден перформанс целта е да се зајакне чувството на припадност кон заедницата, да се искоренат стереотипите и да се зајакнат младите, маргинализираните и лицата во социјален ризик.
„Простор за разговор“ се состои од краток филм и танцов перформанс, кои претставуваат уметничка рефлексија на темата и ќе бидат изведени од танчерите на Скопје танцовиот театар. По перформансот ќе има разговор на темата за родова еднаквост со публиката, со цел справување на проблемите на младите. Поканети се социолози, активисти и психолози, кои ќе говорат за тоа, каде сме и што треба понатаму да направиме во однос на социјалната положба и родовата еднаквост.
На 4. јуни (вторник) настанoт се одржува во Струга во Домот на културата во 12 часот, со што завршуваат низата перформанси што се одржаа изминатите 10 дена во шест градови низ државата.
Проектот „Простор за разговор“ е поддржан од Германија преку Германското друштво за меѓународна соработка (ГИЗ) во рамки на регионалниот проект за социјално вклучување на ранливи групи во Западен Балкан.
Македонија
Eвропскиот фронт предводен од ДУИ со декларација ќе се жали до меѓународната заедница
Европскиот фронт преводен од ДУИ денеска во Тетово усвои декларација која ја нарече политичка декларација за етничкиот легитимитет што произлегува од изборите.
Од тука најавија дека декларацијата ќе биде испратена до сите локални и меѓународни институции.
Во неа се наведува дека случувањата по изборите го доведуваат во прашање духот на Охридскиот договор. Велат дека непочитувањето на изборниот легитимитет овозможува воспоставување на етничка хегемонија и претставува понижување кон Албанците, Турците, Ромите, Бошњаците и другите.
ВМРО-ДПМНЕ која извои апсолутна победа на изборите во мај, ги исклучи ДУИ од преговорите за новиот владин состав. Наместо нив ВМРО-ДПМНЕ договори коалиција со „Влен“ во која учествуваат политичките партии од албанскиот опозициски блок во земјата. ДУИ која освои повеќе гласови од „Влен“, инсистира на влез во Владата и почитување на правилото „победник со победник“, а ВМРО-ДПМНЕ постојано ги потсетува дека ова правило самите го прекршија во 2016 година кога наместо со нив кои тогаш победија, одлучија да коалицираат со СДСМ и заедно составија Влада. ДУИ сега тврди дека волјата на албанските гласачи е погазена, а Охридскиот договор е прекршен.
„Ако одењето на ДУИ во опозиција е кршење на Рамковниот договор, тогаш и Али Ахмети го прекрши кога реши да ја изостави ВМРО-ДПМНЕ од владата и не го почитуваше резултатот на изборите 2016 година каде победи ВМРО-ДПМНЕ. Што само значи дека почитувањето на Охридскиот договор нема врска со фактот дали ДУИ е власт или опозиција“, велат од ВМРО-ДПМНЕ.
Партијата на Христијан Мицкоски пред неколку дена порача дека ако лидерот на ДУИ, Али Ахмети, мисли дека нови и антидржавни етнички барања преточени во документи и платформи ќе го спасат од одење во опозиција и ќе ги сокријат криминалите на неговата партија, треба да знае само дека тоа забрзано ќе му ја заврши кариерата.
И новоизбраниот претседател на Собранието од Влен, Африм Гаши вели дека Охридскиот рамковен договор не е прекршен.
„На секој човек кој ги знае Рамковниот договор и Уставот, јасно му е дека тоа воопшто не е дел од Рамковниот договор“, вели Гаши.
„Можеби тој заборавил, тоа било „Мајскиот договор“ кој го потпишал со Никола Груевски и кој самиот го прекрши, но таквиот договор никогаш не беше дел од Уставот и не стана и не може да има таков договор во Уставот, затоа што се коси со секое демократско право. Владата се прави со 61 пратеници, со мнозинство, а од друга страна албанската коалиција, Влен доби 107.000 гласови со што потполно го носи легитимитетот на Албанците во ова Собрание“, рече Гаши во интервју за Радио Слободна Европа.
ДУИ во декларацијата до меѓународната заедница ја истакна и нивната целосна посветеност за целосно спроведување на Договорот од Преспа, Договорот за добрососедство и затворање на сите отворени прашања со соседите, како предуслов за продолжување на европскиот пат.
(Обновено)
Македонија
Сиљановска Давкова ги врачи наградите за најуспешните на годинашното издание на „Охрид трчаТ“
Претседателката Гордана Сиљановска Давкова денеска, во Охрид, ги врачи наградите за најдобро пласираните учесници на осмото издание на атлетскиот викенд „Охрид трчаТ“.
Милјана Ристиќ од Македонија во женска и Дарио Ивановски од Македонија во машка конкуренција, се првопласирани на главната трка на 21 километар, а Мирослав Спасов од Бугарија го освои првото место на трката на 5 километри.
Претседателката изрази задоволство од високиот потенцијал и посветеност на годинашните натпреварувачи, кои што несомнено ќе придонесат за нивните идни значајни маратонски подвизи. Особена благодарност упати и до организаторите на годинашниот Охрид трчаТ“, за успешно реализираниот атлетски викенд, со рекордни 2200 учесници од 31 земја.