Македонија
(Видео) Ангелов: Дали треба да чекаме некој да загине за да се реши проблемот со мостот кај Визбегово
Директорот на Центарот за управување со кризи, Стојанче Ангелов, го посети мостот кај Визбегово Скопско, а ЦУК упати повторно известување и покана до дел од надлежните институции за координативна работна средба во ЦУК за небезбедноста на конкретниот мостот, надвозник, со нагласување дека, со оглед на фактите дека опасноста не е надмината, присуството на претставник од раководниот кадар на повиканите институции е задолжително.
Ангелов, по разгледувањето на мостот, директно од самото место упати повик и апел до дел од надлежните институции за отстранување на опасностите од мостот за граѓаните што поминуваат по него, а особено за граѓаните што со возила поминуваат под него.
„По пријава на неколку граѓани, повторно сме на мостот кај Визбегово, Скопско. Би рекол стар и небезбеден мост, преку кој има голема фреквенција на сообраќај. Но, не е наша работа да испитуваме дали овој мост е безбеден и колку е безбеден бидејќи информациите што ги имаме зборуваат дека тој ќе биде срушен во следните неколку години. На овој мост се јавува една опасност за граѓаните, која се провлекува, би рекол, повеќе од една година. Тоа се овие коцки (камени гранитни коцки од патот). Овие коцки, кои се расфрлани овде, најверојатно, излегуваат од самиот пат. И покрај моето укажување во повеќе наврати, повторно можам да ги забележам на самиот раб од мостот. Возилата што се движат по овој мост прават силни вибрации. Кога минуваат камиони, мостот буквално вибрира под моите нозе. Оваа коцка е само на 30-40 сантиметри од работ на мостот и може да падне долу на улицата. Доколку оваа коцка падне врз возило што минува под овој мост, некој може да биде убиен. Дали треба да чекаме некој да биде убиен, да загине,да биде тешко повреден или изваден од памет доколку коцката падне на совозачкото седиште, па излета со автомобилот и удри во ѕидовите на мостот бидејќи кога вакво нешто би удрило во шофершајбната на возилото, кој било возач ќе реагира. Но, не е само оваа коцка, еве овде имаме друга коцка, трета, четврта…“, вели Ангелов.
„Коцките постојано излегуваат од патот. Од страна на Град Скопје или Општината Бутел, по нашата прва пријава, веднаш беа преземени мерки и веднаш беше ставена ограда, која во најмала рака ја гарантира безбедноста на пешаците да не одат по тротоарот, кој во меѓувреме го снема. Од овие арматури висеа бетонски плочки, кои се извадени, а за тоа сме благодарни – сепак нешто е преземено. Но, апелирам, алармирам, Град Скопје, Општина Бутел, нека седнат заедно, нека се договорат – кој е одговорен за овој мост!? Нека не си ја префрлаат надлежноста едни на други. Нека седнат заедно и нека дојдат да го решат овој проблем… Да не си играме со човечките животи и со човечкото здравје бидејќи овој мост е исклучително фреквентен и ако може да се забележи од самите возила, додека ја давам оваа кратка изјава, поминаа десетици, а под моите нозе мостот буквално вибрира многу силно…
Пред извесно време побаравме да дојдат во ЦУК претставници на Општина Бутел и на Град Скопје, но не дојдоа… Затоа повикувам: Нека дојдат! Јас, не знам по кој пат, ќе отстранам неколку коцки – но, ова не е решение!… Отстранувањето на овие неколку коцки не е решение, постојано и постојано доаѓаат нови и нови…“, додаде Ангелов.
Инаку, ЦУК во барањето за координативна работна средба за небезбедноста на мостот кај Визбегово, Скопско, посочи:
„Центарот за управување со кризи во повеќе наврати во 2022 и 2023 година, врз основа на дојави од граѓани добиени преку Европскиот систем за итни повици Е-112, ве извести за опасностите од користењето на надвозникот на вкрстувањето на стариот качанички пат и ‘Јадранската магистрала’ во Скопје и побара известување за вашите досегашни и плански активности, за отстранување на камените гранитни коцки на надвозникот, што секојдневно ги загрозуваат, пред сè, корисниците на поранешната ‘Јадранската магистрала’ под мостот подвозник. Со оглед на фактите дека опасноста не е надмината, повторно ве известуваме и ве повикуваме на координативна работна средба во Центарот за управување со кризи в четврток. Темата на работната средба е: „Зајакнување на безбедноста на учесниците во сообраќајот, кои го користат надвозникот на стариот качанички пат над ‘Јадранската магистрала’. Присуството на претставник од раководниот кадар на вашата институција е задолжително“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Верувам дека нема да зборувам за 61 пратеник, туку за 62 пратеници
Претседателот на ВМРО-ДПМНЕ и иден мандатар Христијан Мицкоски денеска најави водење принципиелна политика со соседите. Како идна Влада, како што рече, на денешното одбележување на годишнината од Разловечкото востание, коалицијата „Твоја Македонија“ ќе се залага за принципот „своето не го даваме, туѓото не го сакаме“, потенцирајки дека нема да се прават избрзани чекори, кои можат „многу“ да ја чинат државата.
Лидерот на ВМРО-ДПМНЕ, Христијан Мицкоски изјави дека по прегласувањето на неколку избирачки места во Изборната единица 5 што ќе се одржи во среда, ќе може да каже дека имаат не 61 пратеник, туку 62 пратеници.
„Фокусирајќи се на народот, имаме историска можност како никогаш досега, во овие повеќе од три децении. Треба да ја довршиме задачата, на 22 мај ќе има прегласување во Изборната единица 5, очекуваме уште еден пратеник таму и веќе на следното мое обраќање верувам дека нема да зборувам за 61 пратеник, туку за 62 пратеници“, рече Мицкоски во изјава дадена во делчевското село Разловци, на одбележувањето на Разловечкото востание.
Мицкоски посочи дека е подобро да се придвижуваме за милиметар, но тој чекор да биде цврст.
„Вие сте свесни дека дека против природата не можеме, како народ сме од најмалубројните народи во Европа. Организацијата која што има често и привилегијата да ги брани интересите на еден од најмалобројните народи во Европа – македонскиот народ, треба да е мудра. Не треба да правиме избрзани чекори кои што може да не чинат многу. Подобро да се придвижуваме за милиметар, но тој чекор да биде цврст. Мора да сме трпеливи, мора да сме попаметни, тројно попаметни од сите и помудри, затоа што само така можеме да опстанеме во круг на многу предатори кои што верувајте не сакаат да ја видат Македонија успешна, не сакаат да ја видат Македонија просперитетна, среќна, Македонија полна со граѓани кои што се задоволни. Тоа го видовте уште во првите денови кога ние не бевме се уште разбудени од оној историски резултат на 8 мај, а веќе почнаа страстите да се вжештуваат, но не само наоколу туку и дома“, рече Мицкоски.
Како идна Влада, додаде, победничката коалиција е подготвена сите тие предизвици да ги совлада, како што рече, трпеливо и со паметна политика која како таква политика ќе се води со соседите.
„Ве повикуваме на градење мостови, ги повикуваме сите на заедничка соработка во рамките на овој наш преубав Балкан. Што се однесува до меѓународната политика нема никогаш да не видите како коленичиме, како се вовлекуваме или како се понижуваме самите себе. Имав можност изминативе години да среќавам светски авторитети од Вашингтон преку Брисел и Берлин и останатите светски важни главни градови. Ништо повеќе за мене не е инспиративно отколку овој преубав македонски народ и ова преубава наша македонска држава, така што ќе имаме и кон нив една политика која што ќе се темели на аргументи, бидејќи никогаш не се плашиме да ги вкрстиме нашите аргументи со аргументите на нашите соговорници“, додаде Мицкоски.
Мицкоски отфрли какво било беспотребно иритирање кон соседите, напоменувајќи дека сепак треба да се почитува елементарното човеково право кое е загарантирано.
Македонија
Нестабилно време со дожд и грмежи до среда
По врнежите и невремето по кое во текот на ноќта полавени беа подруми во Охрид, од УХМР најавуваат дека до среда ќе се задржи нестабилно време, претежно во попладневните часови со локален пороен дожд и грмежи.
Во четврток ќе има услови за краткотраен дожд, претежно во планинските подрачја, а преодно стабилизирање на времето се очекува во петок.
Температурите ќе бидат без значителна промена.
Македонија
Делови од Аеродром, Карпош и Ѓорче Петров утре без струја
Без електрична енергија утре ќе останат делови од општините Аеродром, Карпош и Ѓорче Петров.
Како што соопшти РЦУК – Скопје, без струја во периодот од 09:00 до 15:00 часот ќе останат корисниците на дел од село Долно Лисиче, реонот околу чаталот, ул.10 во општина Аеродром, од 10:30 до 14:30 часот дел од улица 16, на патот кон Визбеговово општина Карпош, а од 13:00 до 14:30 часот објектите на градинката Росица, на ул.„Мечкин Камен“, бр.45А. во општина Ѓорче Петров.