Свет
Воен аналитичар: Израел може да го искорени Хамас само на еден начин
Воениот аналитичар Маринко Огорец за хрватската Н1 ги коментира ситуацијата на Блискиот Исток и четиридневното примирје меѓу Израел и Хамас, кое стапи во сила утрово.
„Тоа примирје може да биде чекор кон стабилизација на таа област доколку тоа, воопшто, е можно“, рече Огорец.
Израел на самиот почеток на своите операции изјави дека сака да го искорени Хамас, но се уште се разговара која е крајната цел на Израел и дали е навистина можно целосно да се уништи Хамас.
„Ќе биде многу тешко да се уништи Хамас. Видовме како цивилите од Газа се гордеат што дале добар отпор, тие се горди на луѓето што се бореле. Идејата што Хамас ја посеал е тешко да се искорени. Можете да ги убиете луѓето што го сочинуваат Хамас сега, но ќе дојдат други“, тврди тој.
Огорец наведува дека искоренувањето на Хамас е практично невозможно. „Тогаш би морале да го убијат целиот народ, сите Палестинци во таа област“. Сепак, тој наведува дека Израел му нанел голем удар на Хамас, особено со влегувањето во тунелите, на кои Хамас многу се потпирал.
Тој додава дека посредувањето на Катар во оваа ситуација било доста успешно. „Израел го смета Хамас за терористичка организација и нема преговори со терористите. Катар одигра квалитетна улога и верувам дека тивката дипломатија дури сега почнува да работи со полна брзина. Мислам на сите актери вклучени во преговорите. САД се вклучени во тоа, веројатно да. Има повеќе актери и важно е овие преговори да останат тивки и да ги решат проблемите“.
Тој се осврна и на летоците што беа пуштени во Газа во пресрет на примирјето, а кои беа порака до Палестинците да не се враќаат во своите домови на север. Сепак, Огорец не верува дека таквата порака сугерира дека Израел сака да го окупира тој дел од енклавата.
„Не гледам дека би било во интерес на Израел да го окупира тој дел од Газа. Тоа не би имало ни добар одговор во меѓународната заедница. Тоа некако би го дискредитирало сето она што досега го постигнале во оваа операција“, вели воениот аналитичар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Турист во Италија уништил фрески стари речиси 2000 години
Холандски турист уништил ѕид со фрески во античка римска куќа во Херкуланеум, во близина на Неапол, оштетувајќи ја зградата што ја преживеала вулканската ерупција на Везув во 79 година од нашата ера, соопшти денеска италијанската полиција.
Во соопштението на полицијата се вели дека 27-годишниот турист бил брзо идентификуван откако вработените во археолошкиот локалитет откриле графити исцртани со црн, неизбришлив фломастер на бел дел од насликан ѕид.
Полицијата соопшти дека тоа е потпис на маж кој сега се соочува со обвинение за оштетување на уметничкото дело.
Помалиот град од неговиот попознат сосед Помпеја, Херкуланеум бил покриен со подлабок слој пепел, кој ги заштитил неговите урнатини од крадци и оставил особено добро сочувани остатоци.
Како одговор на зголемениот вандализам, Италија оваа година воведе построги казни за оние кои ги оштетуваат спомениците и културните места, одредувајќи казни до 40.000 евра.
Свет
Кристоферсен: НАТО има две до три години да се подготви за одбрана од Русија
Началникот на Генералштабот на норвешката армија, генерал Еирик Кристоферсен денеска изјави дека НАТО има две до три години да се подготви за одбрана пред Русија повторно да биде во можност да изврши конвенционален напад.
„Во еден момент некој рече дека ќе ни требаат 10 години, но мислам дека се работи за помалку од 10 години поради индустриската база што сега постои во Русија“, рече генералот Кристоферсен, пренесе Блумберг.
Тој посочи дека ќе биде потребно „некое време“ за спроведување на овој план, кој им дава простор на сојузниците на НАТО да ги обноват своите сили и резерви во следните две до три години, истовремено поддржувајќи ја Украина.
„Норвешка, членка на НАТО од 1949 година, не забележа значителна промена во однесувањето на Русија на својата граница во последната година, вклучувајќи ги нуклеарните сили и нејзината северна флота, но руските копнени сили на полуостровот Кола беа десеткувани по големите загуби во Украина“, рече тој.
Норвешкиот парламент допрва треба да одобри план со кој речиси ќе се удвои распределбата за одбранбениот систем во следните 12 години со цел да се прилагоди на заканите, со фокус на поморската и воздушната одбрана, пренесува Танјуг.
Свет
Уапсени 18 лица во Полска: планирале непријателски активности во име на Русија, вклучувајќи и убиство на Зеленски
Полските власти уапсија 18 лица под сомнение дека планирале непријателски активности и саботажи во име на Русија и Белорусија, вклучувајќи го и убиството на украинскиот претседател Володимир Зеленски, соопшти денеска министерот за внатрешни работи Томаш Сјемоњак.
Полските власти поврзаа некои неодамнешни подметнати пожари или обиди за подметнување пожари со агенти спонзорирани од Русија. Меѓу уапсените во последните месеци има државјани на Полска, Белорусија и Украина, се наведува во соопштението на Агенцијата за внатрешна безбедност.
Семењак рече дека актите на саботажа се јасно дел од поширок план кој вклучува сајбер напади, притискање на мигрантите да преминат од Белорусија во Полска и загрозување на нејзината безбедност, бидејќи ја поддржува Украина во нејзината одбрана од инвазијата на Русија.
Полјак беше уапсен во април под обвинение дека е подготвен да шпионира за руското воено разузнавање и да учествува во наводен заговор за убиство на Зеленски, соопштија полските обвинители.
Тој, наводно, побарал контакт со Руси директно вклучени во војната во Украина и се очекувало да пренесе детални информации за стратешкиот аеродром во југоисточна Полска, во близина на границата со Украина.