Македонија
Левица: Дивоградбите во Чаир ја докажаа нефункционалноста на легализацијата донесена од СДС и ДПМНЕ

„Дивоградбите во Општина Чаир, кои се градени во последните пет години, а се легализирани како да се градени пред март 2011 година, се доказ за штетноста и можностите за манипулација кои ги нуди Законот за легализација на бесправно изградени објекти“, велат од Левица.
„Како што објавија медиумите, според повеќе решенија за легализација на бесправно изградени станбени згради во Општина Чаир, барањата за тие легализации се поднесени на датум кога објектите воопшто не биле почнати да се градат. Секако, ова не е можно без целосно непостоечки градежен инспекторат на општината, во која се издадени вкупно осум градежни дозволи за период од пет години, а се изградени стотици објекти и илјадници станови. Но, главното прашање е зошто всушност се опасни дивоградбите, покрај изигрувањето на правниот систем?
Затоа што дивоградбите не поминуваат низ филтрите на регуларните објекти, односно најпрвин воопшто не се во склад со Деталните урбанистички планови и не зависат од нив. Самата градба не е подложна на мислење од Институтот за земјотресно инженерство и сеизмика; ниту добиваат мислења за време на градбата (МИС1 и МИС2); не поминуваат за мислење низ Дирекцијата за заштита и спасување за нивната противпожарност; ниту имаат Потврда за енергетска ефикасност и генерално не постои никаква потврда за нивна безбедност. Не постои ниту Извештај од надзорен инженер за технички прием на објектот.
Единствен документациски траг е геодетскиот елаборат за да се впишат во Агенцијата за катастар на недвижности, а со нивно впишување вредносно ги изедначуваме со објектите кои поминале регуларна постапка. Со отворањето на Пандорината кутија да се дозволи легализација на секаков вид на објект, дополнително се стимулираат дивоградбите.
Доколку Законот за легализација се носеше од стручни и реални, а не популистички побуди и за да задоволи дивеење во градежништвото за лесен и брз профит, легализацијата требаше да се врши само на објекти кои не отстапуваат од Деталните урбанистички планови, а процедурата да содржи целокупна проектна документација, со проекти елаборати и докази за носивоста и безбедноста на објектот, и само такви објекти би требало да се разгледуваат како подобни за легализација.
Потсетуваме дека во март 2021 година, со 72 гласа ЗА, пратениците од СДС и ДПМНЕ заеднички го усвоија штетниот Закон за легализација на дивоградби, со што уште еднаш се ставија на страната на неправото и корупцијата“, соопшти Левица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Дел од Карпош и Аеродром денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 08.30 до 15.30 часот, корисниците од улицата Франце Прешерн, општина Карпош;
– во периодот од 09.00 до 13.00 часот, корисниците од улиците Симеон Кавраков, Петар Ацев и Анастас Митрев, општина Аеродром.
Македонија
Сончево со умерена облачност, попладне нестабилно со пороен дожд и грмежи

Сончево со мала до умерена облачност. Ќе дува умерен, а во северните делови засилен северен ветер, кој ќе предизвика опаѓање на дневната температура за 3 до 5 степени. Попладне ќе има локален развој на нестабилна облачност со пороен дожд и грмежи. Минималната температура ќе биде во интервал од 12 до 19, а максималната ќе достигне од 27 до 36 степени.
Во Скопје, сончево со мала до умерена облачност. Ќе дува умерен, а попладне засилен северен ветер. Минималната температура ќе се спушти до 17, а максималната ќе достигне до 32 степена.
Времето во наредните денови
Од денеска до среда во попладневните часови ќе има развој на нестабилна облачност со локален пороен дожд и грмежи. Потоа ќе преовладува претежно стабилно време, а дневните температури ќе бидат без промени.
Македонија
(Фото) Успешна евакуација на повредено лице со хеликоптер на Армијата

Вчера, во попладневните часови, по добиено барање од Центарот за управување со кризи (ЦУК), Армијата на Република Северна Македонија, поради сериозноста на повредите и непристапниот терен, изврши итна медицинска евакуација со хеликоптер од вВИНГ, на лице кое паднало во провалија во близина на Ливадичко Езеро, Шар Планина.
Повреденото лице, при падот, се здобило со скршеници на раката, ногата и колкот, како и со обилно крварење, поради што било во критична состојба. На лице место интервенираше екипаж- тим на парамедици, кои и покрај непристапниот терен успешно го извлекоа и имобилизираа повредениот.
„Армијата во координација со ЦУК и здравствените установи изврши успешна медицинска евакуација и го предаде повреденото лице на екипа од итната медицинска помош, по што истото беше транспортирано на понатамошен болнички третман.
Армијата на Република Северна Македонија, заедно со останатите институции во државата продолжува да дејствува во интерес на граѓаните, обезбедувајќи навремена и професионална поддршка“, се наведува во соопштението на Генералштабот на Армијата