Свет
Израел: Напаѓачите што убија луѓе на автобуска постојка во Ерусалим се членови на Хамас
![](https://makfax.com.mk/wp-content/uploads/2023/11/izrael-brzapomosh.jpg)
Израелскиот министер за национална безбедност, Итамар Бен Гвир, изјави дека двајцата напаѓачи во Ерусалим, кои пукаа во цивили на автобуската станица, се членови на милитантната група Хамас, кои живееле во источниот дел на Ерусалим.
„Ова се очигледно оперативци на Хамас. Хамас има два гласа – едниот заговара прекин на огнот, а другиот терор. Овој инцидент уште еднаш докажува дека не смееме да покажеме слабост и дека со Хамас мора да разговараме само преку акции, само преку војна“, рече Гвир.
Полицијата утрово уби двајца вооружени Палестинци кога почнале да пукаат на автобуска станица во Ерусалим, соопштија израелските власти. Во нападот загинаа тројца цивили, една 24-годишна жена, еден маж на 70-годишна возраст и една постара жена. Надлежните велат дека поради повредите, во болница се пренесени уште пет лица, од кои тројца се во тешка состојба, пишува Би-би-си.
Нападот се случил покрај главниот автопат на периферијата на градот за време на шпицот, околу 7.40 часот по локално време, според израелската полиција. „Двајца терористи пристигнале на местото на настанот со возило и почнале да пукаат на автобуската станица. Тие биле неутрализирани од безбедносните сили и од цивилите што биле во близина“, соопшти полицијата.
Флер Хасан-Нахум, заменик-градоначалникот, рече дека напаѓачите биле застрелани од израелски цивили. „Терористите се од источен Ерусалим. Тие беа вооружени со пушка „М16“ и со пиштол. Пристигнаа со автомобил и почнаа да пукаат во цивилите“, изјави началникот на полицијата, Дорон Тургеман.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Регион
Во Белград наврнаа 80 литри дожд, пожарникарите спасуваа на 40 локации
![](https://makfax.com.mk/wp-content/uploads/2024/06/hjhjhjj.jpg)
Невремето што синоќа го зафати Белград донесе многу проблеми. Пожарникарите-спасувачи во текот на ноќта беа ангажирани на повеќе од 40 локации на територијата на градот.
Во Белград синоќа наврнаа повеќе од 80 литри дожд на метар квадратен, што предизвика големи проблеми. Најголемата е што канализацијата не можеше да прими толкава количина на вода, па остана во сите вдлабнатини, подвозници, засеци. Невремето прво ги зафати населбите Сремчица и Подавла, потоа центарот на градот и Баново брдо.
Водата однесе бројни капаци од шахти, па десетина возила беа оштетени додека минуваа низ водата. Сите комунални служби се на терен и ги санираат последиците од поплавите. Милан Коциќ од Одделението за вонредни состојби за РТС изјави дека во Белград се уште се врши испумпување на водата.
Утрово избувна пожар во магацин на Петлово брдо покрај Ибарската магистрала. Според првичните информации нема повредени, во гаснењето учествувале 12 возила и 30 пожарникари кои успеале да го локализираат пожарот.
На повеќе од 40 локации на територијата на Белград поради обилни врнежи во текот на ноќта биле ангажирани припадници на Одделението за вонредни состојби, а најголем број интервенции имало во окрузите Колубара и Расин, соопшти полицијата.
Свет
Се урна покривот на аеродромот во Њу Делхи, едно лице загина
![](https://makfax.com.mk/wp-content/uploads/2024/06/fg-3.jpg)
Едно лице загина при уривање на покривот на аеродромот во Њу Делхи поради обилните врнежи и ветрови.
Поради несреќата, која се случи утринава во 5:00 часот, официјалните лица ги откажаа летовите до 14:00 часот, пренесува Reuters.
Локалните медиуми јавија дека три лица се повредени, а едно лице е заробено под урнатиот покрив.
Регион
Македонец пронајде девојче од Србија кое се загуби во Грција, неговиот апел повеќе од 3.000 пати беше споделен на мрежите
![](https://makfax.com.mk/wp-content/uploads/2024/06/4484809484242827239249284468203260149373999n.jpg)
Србија синоќа ја крена на нозе веста дека девојче (3) исчезнало за време на нејзиниот одмор во Грција. Ја пронашол Сашко Радуловиќ, Македонец од Скопје и ја споделил веста на Фејсбук.
„Најдовме 3-годишно девојче изгубено во Неа Флогита кај Филатеки, ве молиме да не известите дали некој ги знае родителите“, напиша Сашко во групата Грција инфо, а заедно со објавата објави и слика од девојчето.
Објавата беше споделена повеќе од 3.000 пати, беа оставени повеќе од 1800 коментари, а контактирани се безброј луѓе, се со надеж дека девојчето ќе биде вратено кај родителите што е можно поскоро. Сашко повикал полиција, која дошла повеќе од еден час по објавата и го однела девојчето во полициската станица во Неа Мудања.
За тоа време Србија ги бараше родителите на исчезнатото девојче, а додека многумина зборуваа само за неа, Стефан и Валентина Спасиќ ги пронашле родителите на девојчето и ги однеле во полициска станица во соседниот град да си го земат детето.
„Девојчето е добро, полицијата ја привела и ја однела во станицата Неа Мудања за да се увери дека е безбедно. Разбирливо беше вознемирена, но сето тоа на крајот се исплатеше. Родителите живеат во еден од нашите станови што го изнајмуваме, па беше лесно да се дојде до нив штом го видовме и препознавме девојчето на социјалните мрежи“, изјави Стефан Спасиќ во моментот кога девојчето и нејзините родители беа вратени во апартманот.
Стефан откри и дека родителите се малку во шок, но се добро.
„Тие беа во шок да бидам искрен, но сега се добро штом дознаа дека пред се девојчето е добро и на безбедно место“, изјави Стефан.
Девојчето било пронајдено околу 23 часот.