Македонија
Маричиќ – Фајон: Северна Македонија и Словенија го зацврстуваат пријателството со потпишувањето на договорите за долгорочна и стратешка соработка
Вицепремиерот задолжен за европски прашања, Бојан Маричиќ, денес одржа важна билатерална средба и потпишување на меморандумот за меѓународна развојна соработка за периодот 2023 – 2024 година меѓу вицепремиерот за европски прашања на Република Северна Македонија, Маричиќ, во име на Владата и вицепремиерот и министер за надворешни и европски работи на Република Словенија, Тања Фајон, во име на словенечката влада.
На прес-конференцијата одржана по повод потпишувањето на меморандумот за соработка помеѓу Северна Македонија и Словенија вицепремиерот Маричиќ истакна дека државите прават уште еден голем чекор напред во зацврстувањето на традиционалното пријателство и заемната поддршка што ја негуваме со целосно внимание од осамостојувањето на нашите двете земји.
„Односите меѓу Северна Македонија и Словенија се изградени на солидните темели на заемното длабоко познавање и на меѓусебна почит меѓу нашите народи.
Нашето пријателство го зацврстивме со договори за долгорочна и стратешка соработка, каков што е договорот за развојна соработка од 2004 година.
Вицепремиеот рече дека меморандумот за меѓународна развојна соработка за периодот 2023 – 2024 година предвидува околу два милиона и сто илјади евра (2.079.889 евра) словенечки средства за развој, кои ќе ни бидат ставени на располагање за финансирање проекти на пет инфраструктурни проекти во пет општини во нашата земја.
„Владата на Словенија со 1,3 милион евра ќе ја помогне изградбата на системот за прочистување отпадни води во сливното подрачје на Дојранското Езеро. Со 225.000 евра, пак, ќе ја поддржи изградбата на хидроцентрала ‘Б’ на браната Кнежево во општина Кратово, а чиј вкупен буџет изнесува 450.000 евра. Граѓаните на Словенија со 224 илјади евра ќе ја помогнат изградбата на системот за намалување на загубата на вода во општина Кочани, а вкупниот буџет на овој проект изнесува 448 илјади евра.
Со развојни средства во износ од 100.000 евра Словенија ќе го кофинансира енергетското реновирање на зградата на градинката и ќе учествува во подигање на еколошката свест кај децата во општина Штип.
Петтиот проект опфатен со овој меморандум е инвестицијата за поставување соларни панели во општина Крива Паланка, проект вреден 102.982 евра, во кој Република Словенија учествува со 51.500 евра.
Станува збор за проекти што ќе им донесат сериозни директни придобивки на граѓаните на овие пет македонски општини, но и на целата држава.
Дотолку повеќе, добрите искуства во подготовката и евалуацијата на проектите ќе се пренесат и во наредниот циклус. Уште на почетокот на 2024 година ќе почнеме со координација на нови проекти за следниот меморандум за разбирање 2025 – 2026 година“.
Секретаријатот за европски прашања дополнително ќе ја интензивира соработката со Амбасадата на Република Словенија во дефинирањето на приоритетните активности што произлегуваат од нашата агенда, која е тесно поврзана со приоритетите за усогласување со стандардите на Европската Унија, додаде Маричиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ЕСМ назначи тројца нови директори на подружниците за парно греење
АД ЕСМ објави дека назначи нови тројца директори на филијалите, односно фирмите-ќерки, што претставуваат системи за топловодно загревање.
Според одлуката на Управниот одбор, Марјан Милошевски, дипломиран машински инженер, е именуван за директор на подружница Енергетика.
Али Исмаиљ, дипломиран инженер по компјутерски науки, ќе раководи со ЕСМ Снабдување со топлина.
Александар Мирчевски, електроинженер, е поставен за директор на ЕСМ Топлификација Битола.
Македонија
Министерот Мисајловски на состанок на Северноатлатнскиот совет на НАТО, на ниво на министри за одбрана
Министерот за одбрана Владо Мисајловски од денеска учествува на дводневениот состанок на Северноатлантскиот совет на НАТО, на ниво на министри за одбрана, во Брисел.
Ова е прв состанок на НАТО на високо ниво по Самитот во Вашингтон и воедно прв состанок што го води новиот генерален секретар Марк Руте.
На одделните сесии, главни теми за дискусија се: одвраќањето и одбраната на Алијансата, поддршката за Украина, и зајакнувањето на соработката со земјите од Индо-пацификот.
Целта на состанокот е преглед на имплементацијата на одлуките од Самитот во Вашингтон во насока на зајакнување на капацитетите на Алијансата за одговор на растечките закани и предизвици.
Денеска беше оддржан и Состанок на земјите членки на Глобалната коалиција за борба против ИСИС, во организација на САД, со која претседаваше секретарот за одбрана Лојд Остин. Од страна на Министерот Мисајловски беше потенцирано дека справувањето со тероризмот останува од суштинско значење за колективната одбрана, во рамките на која македонската Влада ќе продолжи да соработува со своите сојузници.
На сесијата со глобалните партнери, покрај висок претставник на Европската Унија, за прв пат се поканети и министрите за одбрана на Австралија, Јапонија, Нов Зеланд и Република Кореја, на која се разговараше за тековните предизвици и неделивоста на глобалната безбедност.
Посебна сесија е посветена на јакнењето на соработката со Украина и јакнењето на глобалните партнерства. Во присуство на претседателот Володимир Зеленски и министерот за одбрана Рустем Умеров, ќе се разговара за новата НАТО Команда за координација на помош и обука за Украина, финансиската поддршка и за другите иницијативи што ќе овомзможат долгорочна помош.
На маргините на состаноците, министерот Мисајловски оствари одделни билатерални состаноци со своите колеги од Албанија, Норвешка и Словенија, и се заложи за понатамошно зајакнување на билатералната соработка во областа на одбраната.
Македонија
МАНУ: Во Македонија постои само една национална академија
Претседателството на МАНУ укажува дека Академијата никогаш не се занимавала и нема да се занимава со дневнополитички расправи и партиски дискусии, кои ја оптоваруваат редовната дејност на Академијата, односно со работи кои спаѓаат во доменот на Законодавниот дом и на државните институции, се наведува во соопштението од МАНУ во однос на најавите од некои политички партии за основање на академија на етничките Албанци во Македонија.
– Напоменуваме дека во Македонија, како и во земјите во регионот и во светот, постои само една национална академија која ја претставува државата во европската и во други меѓународни асоцијации на академии. Постојат примери во државите во регионот и пошироко за формирање на т.н. струкови академии во рамките на соодветни стручни здруженија (Академија за архитектура, Академија за медицински науки и др.), како и други научно-уметнички друштва во поголемите градови и во регионалните центри, но нема примери за формирање на паралелни национални академии, се подвлекува во соопштението од Претседателство на МАНУ.
„МАНУ секогаш била отворена за сите граѓани кои ги исполнуваат високите научни и уметнички критериуми за членство во неа, независно од етничката, верската и од каква било друга припадност. За политичките партии и нивните влијанија никогаш немало место во неа. Од нејзиното основање до денес, членови во Академијата биле припадници на македонскиот народ, но исто така и на сите етнички заедници. Меѓу другото, во последните петнаесетина години, во составот на МАНУ членуваа четири члена со албанска етничка припадност (од коишто, во трите последователни раководства, еден од нив ја извршуваше функцијата научен секретар, а двајца беа потпретседатели на Академијата, од кои еден и со мандат во актуелното раководство на Академијата), како и четири члена надвор од работниот состав“, посочуваат оттаму.
МАНУ, се наведува во соопштението, претставува најзначајна национална научна и уметничка институција од посебен општествен интерес во нашата држава, формирана во 1967 година, во согласност со највисоките универзални научни и уметнички стандарди и критериуми. Таа, повеќе децении наназад, со својата научно-истражувачка дејност, преку своето творештво и со советодавната улога, претставува столб во градењето и во зачувувањето на идентитетот и на државноста на македонскиот народ и на деловите од другите народи кои живеат во земјата.