Еден најпрепознатливи македонски рок-бендови „Мизар“ вчерва ќе одржи концерт во МКЦ со почеток од 20 часот.

Според организаторот „Чув де чув“, скопскиот концерт е најава на поголема активност на „Мизар“, ќе следува концерт и во Белград, а има планови за настап и во регионалните балкански центри во текот на 2025 година.

Групата на вечерашниот концерт ќе настапи со нова постава.

Во основата на бендот се Горазд Чаповски на гитара и Илија Стојановски на бас и процесор, а на нив ќе им се придружат Пеце Китановски (бас-гитара), Принц (клавијатури, придружни вокали), Драган Теодосиев (тапани), Нико Ѓоргиевски (вокал и перкусии) и вокалите од „Хармосини“ Сава Булатовиќ и Христијан Моневски (виола, кларинет, флаута, лира).

На концертот ќе бидат изведени новиот сингл „Псалм 135“, дел од новите песни на бендот, но и веќе химничните теми од претходните албуми, како „Дождот“, „Магла“, „Девојка од бронза“, „Градот е нем“, „Почесна стрелба“, „Златно Сонце“.

На крајот од 2024 во атмосфера на загревање на претпразнично расположение со задоволство ве информираме дека на 16 декември, понеделник, во 19 часот ќе се отвори изложбата на ликовниот уметник и професор Башким Меџити во објектот Чифте амам на Националната Галерија.

Изложбата претставува одбележување на 30-годишното творештво на академскиот сликар Меџити и носи наслов „Патување низ боите – Јубилејни триесет години творештво“. Сликарскиот опус ќе биде претставен со седумдесетина слики изработени во комбинирана техника, акрил на платно.

Творечкото патување на Меџити се одвива низ неколку циклуси, од најраната младост, дипломирањето на Факултетот за ликовна уметност во Приштина, до неговиот сегашен ангажман како редовен професор на Државниот универзитет во Тетово.

За самото отворање ќе биде подготвена соодветна монографија со пригодни осврти за неговиот сликарски пат, изложбата ќе трае до 16.01.2025, а куратор на проектот е Маја Крстевска, виш кустос во Националната галерија.

Декемвриската програма на Кинотеката ја збогатуваат легендарни македонски филмови кои ја обележаа историјата на нашата кинематографија. Со овие проекции публиката има можност повторно да се потсети на овие маестрални дела, кои преку различни наративи и жанрови ја прикажуваат македонската култура, историја и живот.

По повод 20-годишнината од премиерата на „Бубачки“ по сценарио и режија на Игор Иванов Изи, филмот ќе биде прикажан во Кинотеката на 13 декември со почеток во 19.30 часот.

„Бубачки“ е македонски краткометражен игран филм од 2004 година, во продукција на „Сектор Филм Скопје“. Филмот е номиниран за „Златна мечка“ на Берлинскиот филмски фестивал во 2004 година и е добитник на престижниот „Златен леопард“ на фестивалот во Локарно. Бубачки успеа да се пласира помеѓу девет кратки филмови во трката за „Оскар“, но не се здоби со номинација.

Што станува со еден млад човек кој живее целосно во својот свет? Меланхолични и моќни слики ги враќаат спомените од минатото на момчето, додека ја откриваат неговата контемплација за сегашноста.

Улогите ги толкуваат: Ѓорѓи Крстевски, Оливер Митковски, Лабина Митевска, Владимир Јачев и Јелена Богојевиќ.