Македонија
Спасовски: Вие студентите сте силата која ќе ја влече државата кон подобра иднина во Европската Унија
![](https://makfax.com.mk/wp-content/uploads/2023/12/spasovski-3-2.jpg)
Mинистерот за внатрешни работи Оливер Спасовски во рамките на проектот „Отворен кабинет“ како дел од концептот „МВР за ГРАЃАНИТЕ“, беше домаќин на студентите од Институтот за безбедност, одбрана и мир од Филозофскиот факултет при Универзитетот Св. „Кирил и Методиј“ во Скопје.
Студентите имаа можност да за запознаат со дел од функционирањето на Министерството за внатрешни работи, при што ја посетија новоотворената зграда на Одделот за форензички испитувања, најголемиот Форензички центар во регионот, каде се запознаа со процесите и начините на прибирање и анализа на доказен материјал од криминалистички истражувања.
За време на посетата, студентите беа примени и во салата за состаноци која се наоѓа во зградата каде што е сместен Кабинетот на министерот за внатрешни работи. Таму студентите беа пречекани од министерот Спасовски, кој изрази огромна благодарност за нивната посета, појаснувајќи дека во салата заедно со раководството на МВР и БЈБ се одржуваат состаноци, но и средби со министри од други ресори, амбасадори, странски делегации итн.
„Колку сме пообјективни, колку сме потранспарентни кон јавноста, толку е тоа подобро за сите нас. Демократските системи и општества носат транспарентност. Безбедноста најдобро функционира кога имате систем на хиерархија. Ако има ред и дисциплина, ако се знае кој што прави ќе имате и успех“, им посочи министерот Спасовски на студентите, поканувајќи ги во неговиот кабинет, да ја почувствуваат работната атмосфера на министерот за внатрешни работи, каде упати отворена покана за сите кои сакаат да волонтираат за време на студирањето во МВР, а по завршувањето на нивните студии очекува министерството да биде збогатено со стручни и професионални кадри како нив.
„Вие студентите сте силата која ќе ја влече државата кон подобра иднина во Европската Унија. Според мене, најважната работа е да се има добар тим. Ако имате добар тим, луѓе кои што се професионалци во својата област, работите ќе одат малку полесно. Во Република Северна Македонија нема нарушување на безбедноста од било кој аспект и нема индиции за нејзино нарушување“, истакна министерот Спасовски упатувајќи охрабрувачки пораки да продолжат да бидат добри студенти, а МВР чека на нив како професионалци.
Професорката Марина Митревска, изразувајќи благодарност до министерот за тоа што дозволи и го отвори практично својот кабинет за нејзините студенти, рече дека ова е исклучителна можност да се почувствуваат секојдневните работни обврски на министерот и на неговиот тим.
„Овие студенти се иднината на безбедносните институции. Ќе продолжиме сигурно и посветено да се грижиме за нивното високо образование, за тие да прераснат во вистински професионалци во својата област“, додаде професорката Митревска.
Министерот за внатрешни работи Спасовски на студентите пред нивното заминување од неговиот кабинет им додели и пригодни подароци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Спасовски: Мицкоски го смени ставот за Преспанскиот договор, а програмата на Владата е далеку од ветувањата
![](https://makfax.com.mk/wp-content/uploads/2024/06/spasovski-sobranie.jpg)
Програмата на Владата и концептите на партиите кои се дел од мнозинството се различни од ветувањата коишто беа дадени пред граѓаните, а прашањата кои беа отворени во минатото на манипулативен начин и се наметнуваа во јавноста ги нема воопшто, рече пратеникот на СДСМ и координатор на пратеничката група Оливер Спасовски денеска во македонското Собрание во расправата за избор на Влада.
„Првиот основен приоритет, нашето членство во Европската унија во програмата е со сосема различен концепт од оној што го застапуваше како опозиција во изминатите 8 години и во времето на предизборието, како што е почитувањето на Преспанскиот договор, Договорот со Бугарија и Преговарачката рамка. Факт е дека нема ниту збор за укинување на Преспанскиот договор, ниту збор за укинување на Договорот со Бугарија и факт е дека нема план за тоа како ќе ја промените преговарачката рамка за којашто зборувавте со години наназад дека нема да ја прифатите“, рече Спасовски.
Деновиве се гледа и промената на личниот став на Мицкоски за Преспанскиот договор, потенцираше Спасовски.
„Ако ги погледнете изјавите од пред изборите, во коишто најавувате дека нема да го користите уставното име или дека нема да ја користите придавката денеска најавивте дека тоа ќе го направите. Тоа ли е новиот концепт? Ако е така чесно е да биде тоа кажано пред граѓаните. Затоа што едно е пред граѓаните да речете дури и мандатот ако треба нека ми го одземат јас нема да ја користам придавката на името а денеска овде пред македонското Собрание зборувате како мандатар најавувате почитување на Преспанскиот договор и уставното име на државата“, рече Спасовски.
Многу од проектите коишто се дел од Програмата немаат рокови за реализација, нема финансиска конструкција како и на кој начин ќе се дојде до реализација, а не се зборува ништо ниту за задолжувањето од 1 милијарда коешто се најавуваше во јавноста, дополни Спасовски.
„Има дел во програмата коишто сте ги ставиле како големи достигнувања а веќе постојат и функционираат. Тоа зборува за една програма за работа којашто е напишана со цел само колку да кажете дека нешто ќе правите во иднина. На пример во делот на безбедноста и одбраната сте навеле дека ќе воспоставите систем за видео надзор на граничните премини. А таков систем функционира веќе 30 години на сите гранични премини. И тоа не е еден систем туку два, и на Царинската управа и на МВР“, рече Спасовски.
Иако се најавуваше многу во делот на инфраструктурата освен доградба и довршување на проектите кои веќе се започнати, нема нови проекти, додаде тој.
-Дури и толку напаѓаниот од Ваша страна проект за коридорите, кој се работи од страна на Бехтен и Енка, тој договор за којшто велевте дека е криминален гледам дека со задоволство е прифатен и ставен во програмата на Владата, рече Спасовски.
Македонија
Мицкоски од Собранието: Државата е во клиничка смрт, не барам сто дена меден месец туку најавувам инвестиции и реформи
![](https://makfax.com.mk/wp-content/uploads/2024/06/mickoski-sobranie.jpg)
Од она што го дознаваме за состојбите во државата, ситуацијата е рамна на клиничка смрт во повеќе клучни области, девастирана до мера на непрепознатливост каде институциите се доведени пред буквална пропаст и незапаметена нефункционалност. И за се ќе биде известена јавноста, изјави претседателот на ВМРО-ДПМНЕ, Христијан Мицкоски во експозето како мандатар за новата влада на денешната собраниска седница.
Мицкоски додаде дека ова не го говори како изговор туку дека одлучно ќе се одговори, затоа што оваа генерација нема опција за неуспех и заедно ќе мора да направиме големи чекори напред.
– И затоа нема да барам никакви 100 дена меден месец, туку најавувам фуриозен почеток на проекти и нови инвестиции веднаш. Впрочем немавме ниту една секунда изминатиов период. Веќе во вторник најавувам нова инвестиција над 400 милиони евра, потоа ќе ги намалиме даноците, покачиме пензиите, ќе обезбедиме пари за капитални проекти. Доста времето се трошеше на измислени теми, и етнички прашања, време е да се засукаат ракавите решат проблемите и ова да биде влада на економија и развој. Тоа го сакаат сите, истакна Мицкоски.
Мицкоски потенцираше дека носечка цел е да се обнови довербата во институциите на државна власт, да се елиминира корупцијата и да се обезбеди владеење на правото.
Централно место во нашата животна мисија е економското заживување. Ќе започнеме нов силен циклус на економски раст, поттикнат од стабилни јавни финансии. Поддршка за конкурентен приватен сектор и значајни инвестиции во иновациите и во информатичката технологија. Нашата цел е да создадеме продуктивни и добро платени работни места, да ја намалиме невработеноста и да поттикнеме средина каде што бизнисите можат да се развиваат, рече Мицкоски.
Македонија
Мицкоски: Денес е историски ден, време е да ги засукаме ракавите
![](https://makfax.com.mk/wp-content/uploads/2024/06/mickoski-1.jpg)
Денес е историски ден. Почнува собраниската дебата која ќе стави крај на периодот на неработење, криминал, лоши вредности и разочарувања, напиша на социјалните мрежи лидерот на ВМРО-ДПМНЕ, Христијан Мицкоски, пред почетокот на седницата за избор на влада.
„Со изборот на новата реформска влада, конечно започнува ново поглавје за нашата земја. Нашите граѓани во минатото се соочуваа со многу предизвици, но секогаш беа лојални кон државата и правеа се’ за таа да биде слободна, независна и просперитетна. Иако имаше разочарувања и предизвици, граѓаните опстојуваа и гордо ги поднесуваа сите случувања“, порача Мицкоски.
Како што додаде, сега е време Македонија да направи повеќе за секој граѓанин. Секој Македонец, Албанец, Турчин, Србин, Ром, Влав, Бошњак и сите останати кои вложија се’ за својата татковина.
Нагласи дека е време да се засукаат ракавите и да ги решат проблемите и повика на единство и заедничка работа.