Македонија
Уставните измени не се единствениот услов за Македонија – бугарската министерка тврди дека не постои билатерален проблем
Не се само уставните измени услов за Скопје, туку и договорот за добрососедство и двата протокола. Ова го истакна шефицата на бугарската дипломатија, Марија Габриел.
„Ние имаме три заемно сврзани инструменти, кои се дел од таканаречниот компромис од јули 2022 година. Уште повеќе, пак, ние имаме и многу јасна позиција на Народното собрание“, рече Габриел прашана што се случува со преговарачкиот процес на Македонија за присоединување со ЕУ, дали земјата го почитува тоа што е побарано од неа и каков е ставот на Бугарија.
Габриел го даде одговорот на седница на собраниската комисија за прашања на Европската Унија, шенген-зоната и еврозоната.
„Ако има тешкотии со уставните измени, каков е напредокот по другите теми? Вистината е дека направивме две технички средби – една во јули во Софија, една во октомври во Скопје – и, за жал, утврдуваме дека по нив нема напредок“, рече Габриел.
Габриел наведе дека Бугарија изразила многу јасна позиција пред целата Европска Унија и дека заштитата на малцинствата е критериум за почеток на преговорите на исто рамниште со критериумите за административна и судска реформа.
„Кога сакаш да бидеш член на ЕУ, треба да ги исполниш обврските што ти самиот си ги презел“, наведе Габриел додавајќи дека Бугарија немала билатерален проблем со Северна Македонија, туку во име на заедничкиот европски интерес му укажувала на Скопје што значи да сакаш да бидеш членка на ЕУ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Променливо облачно време со сончеви периоди
Времето ќе биде променливо облачно со сончеви периоди. Наместа ќе има услови за слаб локален дожд. Ќе дува слаб до умерен ветер од јужен правец. Минималната температура ќе биде во интервал од 2 до 13, а максималната ќе достигне од 16 до 20 степени.
Во Скопје променливо облачно со сончеви периоди. Ќе дува слаб до умерен ветер од југоисточен правец. Минималната температура ќе се спушти до 8, а максималната ќе достигне до 20 степени.
Во деновите од викендот ќе се задржи променливо облачно и посвежо време со услови за слаб локален дожд. Потоа следува период на стабилно и тивко време со ниски утрински температури. По одделни котлини ќе има услови за појава на утринска магла.
Македонија
ЕСМ назначи тројца нови директори на подружниците за парно греење
АД ЕСМ објави дека назначи нови тројца директори на филијалите, односно фирмите-ќерки, што претставуваат системи за топловодно загревање.
Според одлуката на Управниот одбор, Марјан Милошевски, дипломиран машински инженер, е именуван за директор на подружница Енергетика.
Али Исмаиљ, дипломиран инженер по компјутерски науки, ќе раководи со ЕСМ Снабдување со топлина.
Александар Мирчевски, електроинженер, е поставен за директор на ЕСМ Топлификација Битола.
Македонија
Министерот Мисајловски на состанок на Северноатлатнскиот совет на НАТО, на ниво на министри за одбрана
Министерот за одбрана Владо Мисајловски од денеска учествува на дводневениот состанок на Северноатлантскиот совет на НАТО, на ниво на министри за одбрана, во Брисел.
Ова е прв состанок на НАТО на високо ниво по Самитот во Вашингтон и воедно прв состанок што го води новиот генерален секретар Марк Руте.
На одделните сесии, главни теми за дискусија се: одвраќањето и одбраната на Алијансата, поддршката за Украина, и зајакнувањето на соработката со земјите од Индо-пацификот.
Целта на состанокот е преглед на имплементацијата на одлуките од Самитот во Вашингтон во насока на зајакнување на капацитетите на Алијансата за одговор на растечките закани и предизвици.
Денеска беше оддржан и Состанок на земјите членки на Глобалната коалиција за борба против ИСИС, во организација на САД, со која претседаваше секретарот за одбрана Лојд Остин. Од страна на Министерот Мисајловски беше потенцирано дека справувањето со тероризмот останува од суштинско значење за колективната одбрана, во рамките на која македонската Влада ќе продолжи да соработува со своите сојузници.
На сесијата со глобалните партнери, покрај висок претставник на Европската Унија, за прв пат се поканети и министрите за одбрана на Австралија, Јапонија, Нов Зеланд и Република Кореја, на која се разговараше за тековните предизвици и неделивоста на глобалната безбедност.
Посебна сесија е посветена на јакнењето на соработката со Украина и јакнењето на глобалните партнерства. Во присуство на претседателот Володимир Зеленски и министерот за одбрана Рустем Умеров, ќе се разговара за новата НАТО Команда за координација на помош и обука за Украина, финансиската поддршка и за другите иницијативи што ќе овомзможат долгорочна помош.
На маргините на состаноците, министерот Мисајловски оствари одделни билатерални состаноци со своите колеги од Албанија, Норвешка и Словенија, и се заложи за понатамошно зајакнување на билатералната соработка во областа на одбраната.