Свет
Началникот на израелската армија вели дека земјата мора да биде подготвена за офанзива против Либан

Армијата на Израел е сè поподготвена решително да ја прошири својата борба против шиитската милиција Хезболах во Либан.
„Денеска одобривме различни планови за иднината и мора да бидеме подготвени за офанзива доколку е потребно“, рече началникот на Генералштабот Херзи Халеви за време на посетата на воениот штаб во северниот израелски град Сафед. Израелските одбранбени сили „и во нив Северната команда се на многу високо ниво на подготвеност“, додаде тој.
Израелската армија е ангажирана во постојани борби со единиците на Хезболах во јужен Либан, откако исламистичкиот Хамас со седиште во Газа ја нападна граничната област во јужен Израел на 7 октомври.
Хезболах вчера истрела ракети врз израелскиот пограничен град Кирјат Шмона, а израелската полиција соопшти дека се оштетени неколку згради. Никој не беше повреден.
На почетокот на војната во Газа, властите од безбедносни причини преместија десетици илјади жители од северниот регион во внатрешноста на земјата.
Три лица, меѓу кои и еден борец на Хезболах, беа убиени вчера во израелски напади врз позиции на Хезболах во јужен Либан, јави либанската новинска агенција ННА.
Овие битки од почетокот на октомври претставуваат најсериозен воен конфликт од втората либанска војна во 2006 година.
Но, набљудувачите велат дека двете страни сè уште следат одредени неизговорени правила, бидејќи досега избегнуваа понатамошна ескалација.
Хезболах, кој е поддржан од Иран, ја контролира владата во Либан и има арсенал на ракети кои претставуваат закана за Израел.
Израел, од друга страна, е воено способна да му нанесе неизмерна штета на Либан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Белата куќа објави детали за средбата Трамп-Путин

Средбата меѓу американскиот и рускиот претседател Доналд Трамп и Владимир Путин ќе се одржи во петок, во Енкориџ, Алјаска, објави Белата куќа.
Портпаролката Каролин Ливит на прес-конференција изјави дека Трамп ќе отпатува за Енкориџ во петок наутро. Средбата ќе биде еден на еден, додаде таа.
Ливит додаде дека средбата ќе биде „вежба за слушање“ за претседателот Трамп. Таа наговести дека има планови Трамп да ја посети Русија во иднина.
Кремљ и Белата куќа претходно објавија дека Путин и Трамп ќе се сретнат во Алјаска на 15 август.
Украинскиот претседател Володимир Зеленски рече дека самитот е „лична победа“ за Путин. „Прво, тој (Путин) ќе има состанок на американска почва, што го сметам за негова лична победа“, им рече Зеленски на новинарите, додавајќи дека состанокот ќе го извади рускиот претседател од „изолација“ и ќе ги одложи можните санкции на САД против Москва.
Ливит појасни дека Трамп се надева на трилатерален состанок со Зеленски во иднина.
Одговарајќи на новинарските прашања за тоа зошто Володимир Зеленски не беше поканет на разговорите, Ливит истакна дека состанокот се одржал на барање на руската страна.
„Овој состанок се случи затоа што претседателот на Русија го замоли претседателот на Соединетите Американски Држави да се сретне преку неговиот специјален претставник, Стив Виткоф“, рече таа.
Таа нагласи дека Трамп ја прифатил поканата токму врз основа на таа иницијатива. „Претседателот се согласува со овој состанок на барање на претседателот Путин“, додаде Ливит. Според портпаролката, примарната цел на состанокот е Трамп и Путин да си заминат „со подобро разбирање за тоа како може да се заврши оваа војна“.
Фото: ЕПА
Регион
Црна Гора го прогласи 14 август за Ден на жалост поради смртта на војникот

Владата на телефонска седница одлучи задутре, 14 август, да го прогласи за Ден на жалост поради смртта на војникот, кој денес загина при превртување на цистерна додека помагаше во гаснење пожар.
Помладиот водник Дејан Божовиќ од Даниловград загина, а водникот Марко Иковиќ се здоби со тешки повреди при гаснење пожар во областа Кучи, во Црна Гора, објави Министерството за одбрана на Црна Гора.
Војската на Црна Гора, во соработка со надлежните органи, спроведува истрага за да се утврди причината и околностите на несреќата.
Свет
Орбан: Русија ја доби војната

Русија ја доби војната со Украина, изјави унгарскиот премиер Виктор Орбан пред состанокот меѓу претседателите на САД и Русија во Алјаска во петок.
Унгарскиот премиер, кој одржува блиски врски со рускиот претседател Владимир Путин и покрај руската агресија во Украина, беше единствениот лидер на ЕУ кој не ја поддржа заедничката изјава во која се нагласува дека Украина мора да има право сама да одлучува за својата иднина.
„Сега зборуваме како да е ова неизвесна воена ситуација, но не е. Украинците ја загубија војната. Русија ја доби“, рече Орбан во интервју за YouTube каналот „Патриот“. „Единственото прашање е кога и под кои околности Западот, кој стои зад Украинците, ќе признае дека ова се случило и какви ќе бидат последиците“, додаде тој.
Унгарија, која добива најголем дел од својата енергија од Русија, одби да ѝ помогне на Украина со оружје, а Орбан е исто така силно против патот на Украина кон ЕУ.
Унгарскиот премиер тврди дека Европската Унија ја пропуштила можноста да преговара со Путин за време на мандатот на последниот, демократски американски претседател Џо Бајден, па сега е загрозена дека други ја обликуваат нејзината иднина.
„Ако не сте на преговарачката маса, сте на менито“, рече Орбан, додавајќи дека Будимпешта се спротивставила на заедничката изјава бидејќи Европа во неа изгледа „смешна и мизерна“.
„Кога двајцата лидери ќе седнат на преговори, Американците и Русите… а вие не сте поканети таму, тогаш не брзајте кон телефонот, не трчајте наоколу, не викајте однадвор“, рече Орбан.
Фото: ЕПА