Македонија
Спасовски и Паскал од Вашингтон: Заеднички ќе успееме во безвизниот режим
Министерот за внатрешни работи Оливер Спасовски за време на работниот престој во Вашингтон, САД, оствари средба со Боб Паскал, прв заменик-помошник секретар за меѓународни работи во Одделот за внатрешна безбедност на САД.
Истакнувајќи дека средбата е симбол на зајакнатото партнерство и соработка меѓу Република Северна Македонија и Соединетите Американски Држави, во делот на внатрешната безбедност, Спасовски се заблагодари за поддршката и помошта што ја добиваме од Соединетите Американски Држави, од овој оддел, од одделот за правда и од Стејт департментот, особено преку ИЦИТАП-меѓународната програма за помош за обука во криминалистичката истрага.
„Нашиот ангажман за зајакнување на внатрешната безбедност е од суштинско значење за заштита на нашите граѓани и зачувување на демократските вредности. Во таа насока од огромна важност би било спроведувањето заеднички тренинзи, размена на информации и заеднички операции во вид на меморандум за соработка, со цел значително да придонесеме кон справувањето со транснационалниот криминал, тероризмот, сајбер-заканите и другите современи безбедносни предизвици“, рече министерот Спасовски додавајќи дека експертизата, вложените ресурси и искуства од САД се од непроценлива вредност во подобрување на способностите на органите надлежни за спроведување на законите и, генерално, во соработката помеѓу двете земји за која се обврзуваме да ја надградуваме и во иднина.
Од страна на првиот заменик-помошник секретар за меѓународни работи, Боб Паскал, беше истакнато дека САД ги цени партнерствата со трети земји, вклучувајќи ја и Република Северна Македонија.
„Сите ваши напори што ги правите како држава можеме да кажеме дека е во топ-10 земјите што соработуваат со САД во борбата против тероризмот и тоа многу го цениме, тоа е битно за безбедноста на сите граѓани“, рече Паскал.
Двајцата соговорници, Спасовски и Паскал, разговараа и за програмата на САД за безвизен режим, како и за актуелните состојби во делот на илегалната миграција и граничната безбедност, кои се од исклучителна важност за безвизниот режим. Притоа заклучокот од разговорите беше дека заеднички треба да се направи сѐ добрите граѓани безгрижно да патуваат, а на другите да им биде отежнато и оневозможено.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
На свечена церемонија, утре Пендаровски ќе и’ ја предаде функцијата на Силјановска-Давкова
Во Кабинетот на претседателот, утре – 12 мај ќе се одржи официјална церемонија на примопредавање на функцијата Претседател со највисоки државни и воени почести.
По свечената церемонија новоизбраната претседателка Гордана Силјановска Давкова и претседателот Стево Пендаровски предвидено е да остварат тет-а-тет средба.
Државната изборна комисија денеска и’ го издаде уверението за избран претседател на Гордана Силјановска-Давкова. ДИК ќе треба да достави извештајот до Собранието за да биде закажана седница за утрешната инаугурација на Силјановска Давкова. Потоа таа пред пратениците ќе треба да даде свечена изјава по која ќе почне нејзиниот мандат.
Мандатот на Пендаровски истекува утре.
Македонија
Aхмети тврди дека со челниците на „Вреди“ во јануари потпишале декларација дека ќе владеат само со партии што поддржуваат уставни измени
ДУИ тврди дека и првите луѓе на коалицијата „Вреди“ (Влен), со кои ВМРО-ДПМНЕ договара коалицирање во новата Влада, се потписници на декларација во која уверуваат дека ќе владеат заедно само со оние политички партии кои се согласуваат да ги поддржат уставните измени.
Лидерот на ДУИ, Али Ахмети на денешниот собир на претставниците и членството на коалицијата рече дека декларацијата била потпишана во јануари годинава.
Во неа, се наведува дека почетокот на преговорите со Европската Унија (ЕУ) носи стратешки и значајни придобивки за нашата земја, а потписниците со обединет глас се придружуваат да одговорат на итната потреба за решавање и стабилност во земјата.
„За овие цели ние како политички партии изјавуваме: ‘Ние, долупотпишаните политички партии, имајќи ја предвид состобата во која се наоѓа државата и должноста што jа имаме кон граѓаните, чувствуваме обврска да изјавиме дека сме целосно решени, сега и во иднина да соработуваме и да владееме заедно само со оние политички партии кои се согласуваат да ги поддржат уставните измени како услов за продолжуванье на процесот на интеграција на земјата во ЕУ. Потписи на партиски претставници (наредени по азбучен ред): Арбен Таравари, Африм Гаши, Али Ахмети, Билал Касами и Изет Меџити“, стои во документот што го прочита Ахмети.
Претпладнево се случи првата рунда на преговори помеѓу ВМРО-ДПМНЕ и Влен, по којашто партиите соопштија дека ги договориле општите начела за идната Влада, која ќе се базира на три постулати: евроинтеграции, забрзан економски развој, борба против криминалот и корупцијата и владеење на правото.
Од тука додадоа дека двете страни ќе формираат работни групи, на кое ниво ќе продолжат разговорите за коалицирање.
Во изборната кампања, ВМРО-ДПМНЕ и „Вреди“ излегоа со различни ставови за уставните измени, но во повеќе наврати беше потенцирано дека разговорите на таа тема ќе бидат ставени на маса по завршувањето на изборите.
Македонија
„Договорени се општите начела за идната Влада“ – заврши средбата на ВМРО-ДПМНЕ со Влен
Денеска беше остварена средба помеѓу ВМРО-ДПМНЕ и ВЛЕН. Од страна на ВМРО-ДПМНЕ беа присутни претседателот Христијан Мицкоски, потпретседателите Александар Николоски, Владо Мисајловски, Тимчо Муцунски и Гордана Кочоска Димитриеска, како и шефот на кабинет на претседателот Владимир Нелоски, од страна не ВЛЕН беа присутни Арбен Таравари, Изет Меџити, Биљал Касами и Африм Гаши.
„Договорени се општите начела на соработка за идната влада, која ќе се базира на три постулати: евроинтеграции, забрзан економски развој, борба против криминалот и корупцијата и владеење на правото“, објави ВМРО-ДПМНЕ по средбата.
Заклучено е дека двете страни ќе формираат работни групи, на кое ниво ќе продолжат разговорите до нивно финализирање.