Македонија
Стоилковски: Обезбедувањето што не го спречи упадот во М-НАВ во истиот период добило нов годишен договор
Портпаролот на ВМРО-ДПМНЕ, Наум Стоилковски, објави дека фирмата за обезбедување во М-НАВ, која не ги спречи упадот и насилството во контролната кула, во истиот период од истите директори добила нов годишен договор.
Стоилковски вели дека наместо веднаш, по инцидентот во стратешки државен објект, по ваков напад, да биде прекинат договорот со обезбедување и да биде отворен предмет за улогата на обезбедувањето во нападот, државата има нов договор со истата фирма.
„Кичевската ‘2сс’, е првата фирма за обезбедување, која добива тендер за М-НАВ, а само неколку дена пред бандитизмот на ДУИ во контролната кула има нов договор со старите, сега сменети директори“, рече Стоилковски.
Тој прашува која и колкава е улогата на фирмата во нападот врз стратешкиот објект на државата, зошто не е раскинат договорот, зошто обезбедувањето не реагирало, како и чија е оваа компанија што обезбедува ваков стратешки објект.
„Според сведоштва на присутни, јавно е кажано дека токму ова обезбедување ги отворило двете порти (рампи), а еден обезбедувач, дури и се стрчал да ја отвори вратата од џипот со кој дошле напаѓачите? Почитувани, поминаа две недели, СДС и ДУИ се обидуваат случајот да исчезне од фокусот и да заврши како сите други бандитизми во државата. Ова по дефиниција е меѓународен инцидент со можни животозагрозувачки последици. Компанија што е блиска до ДУИ и на која во време на обезбедувањето на контролата кула ѝ се случува насилство врз контролорите на летање на смена, не е логично да продолжи со обврските“, рече Стоилковски.
Додаде дека обезбедувањето, можен учесник во напад врз контролната кула, добива нов тендер со М-НАВ. Состојбата е пресериозна за да се остави на бандитизмот, рече тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Здружението на судии загрижено за изјавите за Управниот суд: со нив се врши притисок врз судиите и судиското одлучуваљње
Здружението на судии во врска со реакцијата на Управниот суд на РСМ, ја искажува својата загриженост за изјавите на поединци со кои, како што се истакнува во соопштението, директно или индиректно се врши притисок врз судиите и судиското постапување и одлучување.
Како што велат, припадноста кон одредена политичка партија и можноста за идно владеење односно учество во извршната власт, не смее да се користи за коментирање, заканување или влијание врз судиското одлучување.
Оценуваат дека таквите изјави се штетни пред се за политичките субјекти кои ги пласираат во јавноста, а истовремено може да се разберат и како обид да се поткопа непристрасноста и интегритетот на судиите.
„Во однос на неоснованите обвинувања кои беа упатени на адреса на Претседателот на Управниот суд на РСМ, како Здружение на судии даваме целосна поддршка на колегите од именуваниот суд и напоменуваме дека секој избран судија е независен во своето одлучување и таа независност му е Уставно загарантирана. Па во тој правец и при најмал сомнеж за евентуален обид за притисок или влијание врз неговата работа, без разлика од кого доаѓа, е должен да ги извести надлежните судиски инстанци. Воедно, сите останати општествени чинители, а особено претставниците на политичките партии се должни да ја почитуваат загарантираната судиска независност што е во духот и на демократскиот развој и Европскиот просперитет на земјата“, потенцираат од ова здружение.
Македонија
Одбиена тужбата на „Европскиот фронт“ за избирачкото место во Долнени
Управниот суд ја одби како неоснована тужбата од Коалицијата „Европски фронт“ на решението на Државната изборна комисија (ДИК) за прифаќање на приговорот од Коалицијата „Твоја Македонија” за избирачкото место 1470 во Долнени на Парламентарните избори 2024.
„Европскиот фронт“ поднесе седум тужби против решенија на ДИК на Парламентарните избори 2024.
Досега Управниот суд ja одби како неоснована и тужбата за избирачкото место 1194, во Општина Крушево.
Македонија
Мицотакис со предупредување: Ако некои веруваат дека можат да го игнорираат Договорот, треба да разберат дека нивниот пат кон Европа ќе остане затворен
Грчкиот премиер Киријакос Мицотакис уште еднаш ја предупредува Македонија дека прекршувањето на Договорот од Преспа, со кој се реши долгогодишниот спор за името меѓу двата соседа, ќе ги загрози амбициите на балканската земја за членство во ЕУ, пишува грчки „Катимерини“
Говорејќи од градот Верија во северна Грција за време на неговата кампања пред изборите за Европскиот парламент во јуни, Мицотакис изјави дека трите меморандуми за разбирање поврзани со договорот од 2018 година нема да бидат ратификувани од Парламентот се додека новото раководство во Скопје продолжи со прекршување на договорот.
„Ако некои веруваат дека можат да го игнорираат договорот, треба да разберат дека нивниот пат кон Европа ќе остане затворен, а меморандумите нема да бидат ратификувани освен ако не се почитува она што го предвидува договорот“, рече тој.