Општина Центар продолжува со уредување на јавниот простор и подобрување на условите за рекреација и игра на центарци. Во изминативе денови, поставени се нови детски реквизити и урбана опрема од канти и клупи на неколку локации низ општината, соопшти градоначалникот, Горан Герасимовски.

Во училишниот двор на ООУ „Јохан Хајнрих Песталоци“ се поставени нови детски реквизити, нови кошаркарски табли, клупи и канти, обезбедувајќи безбедно и пријатно катче за игра и спорт за учениците и децата од околината. Во населеното место Мало Курило е уредено детското игралиште со нови реквизити и опрема. Нови табли за баскет се поставени во населбата Пролет, на спортското игралиште кај Зеленото пазарче и на детското игралиште близу Градската болница кај поранешен Јукан, кадешто покрај кошаркарска табла поставени се и нови реквизити за игра.

„Како локална самоуправа вложуваме во простори кои го поттикнуваат здравиот развој на децата и младите, но и создаваат услови за дружење и активен живот во заедницата. Со овие мали, но значајни интервенции, покажуваме дека грижата за секој дел од Центар е приоритет“, вели Герасимовски.

Една година Влада на ВМРО-ДПМНЕ, стабилизирање и раст на економијата, зголемување на плати и пензии, Стратешки договор со Велика Британија, изградба на патишта, велат од владејачката партија.

„Една година Влада предводена од ВМРО-ДПМНЕ, една година посветена работа во интерес на државата и граѓаните. Година на големи предизвици со наследена економија фрлена на колена, држава на раб на банкрот, уништени институции. Не беше лесно, но со посветена и макотрпна работа, ВМРО-ДПМНЕ покажа како се работи кога приоритет ти се државата и граѓаните. Прво што се направи, се запре слободниот пад на економија и со добро осмислени мерки и политики, за три последователни квартали забележуваме раст на ДБП од три или на 3%. Со цел поддршка и поттикнување инвестициски циклус, како и реализација на капитални проекти на располагање на стопанството и општините се ставија 500 милиони евра“, велат од ВМРО-ДПМНЕ.

Според нив, инатата 2024 година завршила со историски највисок износ на странски директни инвестиции од милијарда и 255 милиони евра.

„Се преземаа конкретни мерки за подобрува на животниот стандард на граѓаните и се покажа за најсуштинските сектори во државата како здравство, образование, безбедност. Пензиите се зголемија за 5.000 денари линеарно за сите пензионери, а за 10 проценти покачување на платите добија вработените безбедносниот сектор. Се постигна историски договор со синдикатите во здравство и образование, така што за прв пат раст на платите добија сите вработени во јавно здравствените и образовни установи. До сега, платите во образованието се зголемија за 12 проценти, а до крајот на мандатот предвидено е да пораснат до 46%, додека во здравство до сега платите на сите вработени се зголемени за 15 проценти а до крај на мандатот истите ќе пораснат за над 40%.“, пишува во соопштението.

После долги години, додаваат, се прошири позитивната листа на лекови, а матичните лекари и гинеколози добија покачување на капитациониот бод од 33%, односно од 75 на 100 денари, додека кај стоматолозите од 23 проценти, од 61 на 75 денари.

Во земјоделството, додаваат од ВМРО-ДПМНЕ, следи редовна и навремена исплата на субвенциите на земјоделците така што, до сега се исплатени рекордни 9 милијарди денари.

„Освен средувањето на пустошот којшто го остави СДС, првата година од Владата предводена од ВМРО-ДПМНЕ, инфраструктурно се градеше и развиваше Македонија. Во употреба се пуштија два експресни патишта, Страцин – Крива Паланка и Градско Дреново, како и голем број регионални патишта. Интензивно се работи и на изградба на автопатите дел од Коридорот 8 и 10Д, како и на автопатот Кичево- Охрид од кој во употреба се пушти и првата делница Подмоље до македонскиот туристички центар. Не изостана ниту железничкиот сообраќај, така што во употреба се пушти пругата Куманово-Бељаковце во должина од 31 километар, а интензивно се работи и на втората делница до Крива Паланка. Дополнително, со помош на историскиот стратешки Договор со Обединетото Кралство, ќе се гради и брзата товарна и патничка пруга од Табановце до Гевгелија, што Македонија ќе ја поврзе со Србија и Грција. Стратешкиот договор со ОК ја потврдува и дипломатската посветеноста на Владата, Македонија да ја позиционира на европската и меѓународна сцена како сигурен и доверлив партнер. Овој договор, освен што отвара инвестициски циклус од 6 милијарди евра, тој претставува и дипломатска победа за државата, затоа што покрај со САД, Македонија станува стратешки партнер и со втората најмоќна држава во светот“, се вели во соопштението.

По една година од новата влада, состојбата со македонската економија е алармантна. Македонија економски е понижена, обвинија од СДС.

„Живеачката на луѓето e сè потешка од ден во ден, стандардот е уништен, граѓаните се оставени сами на ударот од енормните поскапувања, додека постојано го чувствуваат падот на куповната моќ гледаат како власта аздисува и се луксузира. Растот на платите е целосно закочен, цените на основните производи расте. Народот едвај врзува крај со крај. Додека народот живее на раб на егзистенција, функционерите на власта се расфрлаат со луксуз – летаат со приватни авиони, трошат на скапа храна, папаја, манго, уживаат во хотели од соништата. Тоа е тажната реалност денеска после една година Влада. ВМРО-ДПМНЕ, ВЛЕН и ЗНАМ ја втурнаа државата во длабока економска нестабилност“, велат од СДСМ.

Иако власта упорно сака да уверува дека економијата расте, додаваат од СДСМ, фактите говорат поинаку.

„Инфлацијата изнесува речиси 4.5%, а економскиот раст едвај достигнува 2.6%. Земјата за првпат има негативен економски резултат полош и од воената 2001 година. Владата живее во паралелна реалност, убедувајќи дека сме „економски тигар“ и дека куповната моќ е поголема од европската, додека реалноста покажува сосема спротивно Македонија е на дното во Европа и по висина на плати и по животен стандард, како економски глушец. Ова не се политички конструкции, туку податоци од најреномираните европски институции, кои потврдуваат дека Македонија се движи во погрешна насока. Наместо горди работници со европски плати со владата на ВМРО-ДПМНЕ имаме понижени работници со најниски плати во Европа“, велат од СДСМ.