Свет
Британскиот премиер: Бев шокиран од веста дека кралот Чарлс има рак
![](https://makfax.com.mk/wp-content/uploads/2024/02/sunak-charls.jpg)
Британскиот премиер, Риши Сунак, рече дека е шокиран од веста дека на кралот Чарлс му бил дијагностициран рак и се надева дека монархот брзо ќе закрепне бидејќи болеста е рано откриена.
Бакингемската палата во понеделникот објави дека 75-годишниот Чарлс, кој дојде на тронот по смртта на неговата мајка, кралицата Елизабета Втора, ќе ги одложи јавните ангажмани откако му беше дијагностициран облик на рак.
Неговиот помлад син, принцот Хари, кој е отуѓен од кралското семејство, наскоро би требало да пристигне во Британија. Неговиот постар брат, престолонаследникот Вилијам, се очекува да преземе некои должности како монарх.
Сунак изјави за радио Би-Би-Си дека е шокиран и тажен од веста. „Сите наши мисли се со него и неговото семејство. Знаете, за среќа, ова беше рано откриено“, рече тој.
Чарлс планира да продолжи да врши голем дел од неговата приватна работа како монарх, што ја вклучува неговата неделна аудиенција со премиерот. Сунак рече дека е во редовен контакт со кралот.
„Секако дека ќе продолжи нормално, продолжуваме со се“, рече тој.
Чарлс ја помина ноќта дома во понеделникот, откако започна третман за „еден облик на рак“, соопшти Бакингемската палата.
Освен потврдата дека не се работи за рак на простата, од палатата не откриваат други детали.
Дијагнозата на кралот доминираше во британскиот печат во вторникот. „Шок на нацијата кога почнува третманот“, беше насловот на таблоидот „Сан“. Тоа е последниот удар за Чарлс за една и пол година на тронот.
На почетокот на минатата година, Хари ја објави својата автобиографија „Резервата“, во која ги прозва татко му и постариот брат. Кралот се соочи и со обвинувања против неговиот брат принцот Ендру во врска со покојниот сексуален престапник Џефри Епштајн.
Се очекува Хари да се врати во Велика Британија од Калифорнија каде живее со сопругата Меган и двете деца, откако се повлече од кралските должности во 2020 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Регион
Брнабиќ: Јавноста не е свесна за опасноста по животот на Александар Вучиќ
![](https://makfax.com.mk/wp-content/uploads/2023/05/бенабиќ.jpg)
Претседателката на српското Собрание Ана Брнабиќ денеска во интервју за телевизијата Хепи изјави дека „јавноста не е свесна за опасноста по животот на Александар Вучиќ“, пренесува Нова.рс.
Нејзината изјава уследи по објавувањето на наводната преписка на осомничените членови на нарко-картел во Црна Гора.
Брнабиќ истакна дека „Александар Вучиќ е единствената бариера за таа мафија“.
„Заканата по животот на Александар Вучиќ постои се додека Радоје Звицер е на слобода“, предупреди таа.
Звицер е водач на озлогласениот Kавачки клан.
Тој е поврзан со бројни убиства, продажба на дрога и други злосторства. Во мај 2020 година, Звицер беше застрелан среде бел ден додека џогирал во близина на неговиот стан во Киев. Двајца вооружени напаѓачи испукале десетина истрели, од кои пет го погодиле.
Тој е во бегство од февруари 2021 година, кога во Белград беа уапсени членовите на групата на Вељко Беливук. Во септември 2022 година се појави информација дека е убиен во Панама, но подоцна беше демантирана.
Брнабиќ истакна дека Вучиќ „не е само бариера за спречување на организираниот криминал и мафијата да ги заземат Србија и регионот, туку и гаранција за безбедноста“. Како пример таа наведе дека, според податоците на Народната банка на Србија, до 10 јуни во Србија пристигнале „над две милијарди евра приливи на директни странски инвестиции“.
Регион
„Фајненшл тајмс“: Србија го добива најголемиот рудник за литиум во Европа
![](https://makfax.com.mk/wp-content/uploads/2024/06/Screenshot-2024-06-17-120015.jpg)
Српскиот претседател Александар Вучиќ се подготвува да ѝ даде зелено светло на британско-австралиската компанија „Рио Тинто“ за развој на најголемиот рудник за литиум во Европа две години откако Белград се откажа од проектот, објави „Фајненшл тајмс“ (ФТ).
Вучиќ изјави за ФТ дека новите гаранции од глобалниот рударски гигант и од Европската Унија изгледа одговориле на загриженоста на Србија за тоа дали ќе бидат исполнети потребните еколошки стандарди на наоѓалиштето Јадар на западот од земјата.
„Веруваме дека проектот за Јадар има потенцијал да биде средство од светска класа, што може да дејствува како катализатор за развој на синџирот на електрични возила во Србија“, изјавија од компанијата „Рио Тинто“ за „Ројтерс“.
Литиумот, кој се смета за критичен материјал во ЕУ и во САД, се користи во батериите за електрични возила и мобилни уреди.
„Ако исполниме сè, рудникот би можел да биде отворен во 2028 година“, изјави Вучиќ за ФТ додавајќи дека се очекува рудникот да произведува 58.000 тони литиум годишно. „Тоа би било доволно за 17 отсто од производството на електрични возила во Европа, приближно 1,1 милион автомобили“, рече претседателот на Србија.
Во 2022 година Белград ги откажа лиценците за проектот „Јадар“, вреден 2,4 милијарди долари, по големите еколошки протести. Доколку биде завршен, проектот би можел да задоволи 90 отсто од тековните европски потреби за литиум и да помогне компанијата да стане водечки производител на литиум.
Во текот на 2021 и 2022 година српските екологисти собраа 30.000 потписи на петиција, со која се бараше парламентот да усвои закон за запирање на истражувањето на литиум во земјата.
Свет
Аеродромот во Хонг Конг беше затворен поради итно слетување авион, одложени 186 лета
![](https://makfax.com.mk/wp-content/uploads/2024/06/мк.jpg)
Меѓународниот аеродром во Хонг Конг е повторно отворен откако утрово пистата беше затворена по итно слетување на товарниот авион на „Атлас ер“, соопштија од аеродромот.
Пистата е повторно отворена откога бил отстранет авионот, кој бил оштетен при слетувањето, јавува „Ројтерс“.
Авионот не можеше да се движи неколку часа поради неговиот хидрауличен систем.
Одложени беа 186 лета.