Македонија
Митрески – Јуратовиќ: Силна поддршка од германскиот Бундестаг за македонскиот пат кон ЕУ
Претседателот на Собранието, Јован Митрески, денеска, оствари средба со делегација на Бундестагот на Сојузна Република Германија, предводена од Јосип Јуратовиќ, претседател на парламентарната група за Југоисточна Европа (ЈИЕ). На средбата присуствуваа и генералната секретарка на Собранието на РСМ, Цветанка Иванова, како и германските пратеници Томас Хакер, заменик-претседател, и Штефан Браднер, член на групата за ЈИЕ во Бундестагот, и амбасадорката на Германија во земјата, Петра Декслер.
Митрески изрази задоволство од посетата на претставниците на Бундестагот, кои се во посета на некои од земјите од регионот и се заблагодари за поддршката од Германија на сите полиња, а особено на патот на Северна Македонија кон Европската Унија и за полноправното членство во НАТО. Тој истакна дека Германија е меѓу најголемите трговски партнери на Северна Македонија и дека односите меѓу двете земји ги карактеризира долгогодишно пријателство и соработка. Беше искажана длабока и посебна благодарност за неодамна донесената резолуција во Бундестагот, со која се поддржува европската иднина на Северна Македонија и се оддава посебно признание на македонската култура, идентитет и јазик. Пратеникот Томас Хакер, како еден од иницијаторите на резолуцијата, истакна дека ова е редок случај кога Бундестагот издвојува на ваков начин една земја на посебно ниво, што јасно ја демонстрира силната поддршка за европската иднина на нашата земја.
Од германска страна беше особено потенцирана важноста од внатрешен парламентарен дијалог и национален конзесус, особено за прашања од стратешки интерес, како што е членството во евро-атлантските институции. Во тој контекст претседателот Митрески изрази очекување дека Северна Македонија до 2030 година ќе обезбеди полноправно членство во ЕУ. Тој посочи дека во изминатите години земјата се соочуваше со повеќе предизвици и блокади, но и дека покажа подготвеност за реформи и за исполнување на критериумите за членство во НАТО и за отворање на преговорите со ЕУ.
На средбата беа разменети мислења за Берлинскиот процес, кој годинава го одбележува својот 10-годишен јубилеј. Општ став беше дека со вклучувањето на парламентите во него се подига нивото на политичка соработка, со истовремено подобрување на информираноста на парламентарците за предностите содржани во потпишаните договори, кои потоа треба да се ратификуваат во националните парламенти.
Осврнувајќи се на поинтензивната парламентарната соработка на ниво на служби, генералната секретарка Иванова се заблагодари за помошта од Бундестагот за независно внатрешно собраниско обезбедување. На овој проект, кој е во рамките на Програмата за парламентарна поддршка на Швајцарската Конфедерација, веќе има предлози за конкретни законски решенија и ќе биде доставена донација на опрема за негова целосна реализација. На крајот, изрази очекување дека соработката ќе продолжи и во други области од заемен интерес.
Претседателот Митрески ги информира присутните и за обврските и надлежностите на Собранието во однос на претстојните парламентарни и претседателски избори во земјата.
На крајот на средбата, пратеникот Јуратовиќ, истакнувајќи дека Германија и натаму ќе ја поддржува Северна Македонија на сите полиња на патот кон ЕУ, посака мирен изборен процес во земјата, со, како што рече, полна одговорност кон македонските граѓани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на министерот Муцунски со шефот на Мисијата на ОБСЕ во Скопје, Вал
Министерот за надворешни работи и надворешна трговија, Тимчо Муцунски, денеска оствари средба со шефот на Мисијата на ОБСЕ во Скопје, амбасадорот Килиан Вал. На средбата беше потврдена долгогодишната соработка со ОБСЕ во различни области, при што беше изразена поддршка за напорите на Организацијата насочени кон зајакнување на соработката и одржување на мирот во регионот на ОБСЕ, извести МНР.
Двајцата соговорници изразија задоволство од досегашната соработка помеѓу ОБСЕ и македонските институции, и ја потврдија подготвеноста за нејзино продолжување. Тие разменија мислења и за тековните активности на Мисијата и заеднички ја реафирмираа посветеноста на продолжување на проектите кои ги поддржуваат реформските процеси на новата Влада.
Македонија
ЛДП со реакција за изјавата градоначалникот на Кисела Вода: Сепак има надеж
ЛДП реагираше на изјавите на Орце Ѓорѓиевски во врска со можноста за отповикување на градоначалници, нагласувајќи дека оваа иницијатива не е нова, туку е дел од нивните заложби кои претходно не биле поддржани ниту јавно ниту во Собранието.
„ЛДП ја истакна потребата за воспоставување на механизам за отповикување на градоначалници преку референдум, со цел поголема отчетност и одговорност на локалните лидери. Оваа иницијатива, која партијата ја поддржува подолг период, се заснова на примери од европските земји како Обединетото Кралство, Полска и Молдавија, каде ваквите механизми веќе се применуваат.
Според нив состојбата во која градоначалниците можат да ги поминат своите мандати без да одговараат за несработеното, ги оштетува општините и граѓаните. Иницијативата за отповикување на градоначалници се споменува како начин за подобрување на транспарентноста и одговорноста на локалната власт кон оние кои ја избрале“, велат од ЛДП.
Од партијата потсетија дека уште изминатата година кога ја пласираа идејата за доверба или отповикување на градоначалник истата беше отфрлена.
„Воедно минатата недела поднесовме амандман на измените во законот за локална самоуправа, кој за жал не беше поддржан во Собранието. Но, добро е што само по неколку дена доаѓаат позитивни реакции и изјави по однос на нашата заложба. Подаваме рака да го изработиме предлогот и да го усвоиме сите заедно во интерес на граѓаните“, истакнуваат од ЛДП.
ЛДП почнува серијал на јавни трибини со сите засегнати страни, а пред се со граѓаните затоа што предлогот ги има нив во фокусот: да добијат отчетни институции кои ќе им служат лично нив, а не на сопствените и партиски интереси. Институции исклучиво по европски стандарди и хармонизација со европското законодавство. ЛДП го повикува претседателот на ЗЕЛС и Министерот за локална самоуправа да се приклучат на оваа иницијатива.
Македонија
Претседателката Сиљановска Давкова се обрати на дискусијата „Младите и внатрепартиската демократија“
Претседателката Гордана Сиљановска Давкова се обрати на дискусијата „Младите и внатрепартиската демократија“, што се одржа во Кабинетот на Претседателот по повод 15 септември – Меѓународниот ден на демократијата.
Во дискусијата учествуваа подмладоци од политичките партии во земјава кои ги претставија своите погледи и искуства за улогата и положбата на младите во политичките партии кадешто членуваат и разменија идеи и препораки за подобрување на внатрепартиската демократија и за поттикнување на младинскиот ангажман во политиката.
Претседателката Сиљановска Давкова во обраќањето пред политичките подмладоци посочи дека демократизацијата на политичките партии е клучна за демократизацијата на политиката. Таа се осврна на процесите на внатрепартиското одлучување, на процесите на кандидирање и избор на партиските функционери, посочувајќи дека е неопходна децентрализираност на партиите, почитување на различни тенденции и мислења внатре во партиите и поавтентичен настап на локалните партиски организации.
Во таа насока, таа говореше за потребата од одговорност внатре во партијата, неопходноста од реформи, партиципативна политичка култура и промени во пристапот и комуникацијата на партиите со јавноста.
Претседателката во своето обраќање се осврна и на структурата на партиите и нивното претставување од аспект на родовата застапеност, истовремено посочувајќи дека дејствувањето на политичките партии во голема мера зависи од етичкиот капацитет на водството и на лидерот.
Претседателката ја поддржа потребата од поголема вклученост на младите во носењето на партиските одлуки, истакнувајќи дека тие треба да бидат најсубверзивниот елемент којшто ќе влијае на демократизацијата на овие процеси и на партиското одлучување.
Истакнувајќи ја важноста на внатрепартиската демократија, младите ги разгледаа можностите и начините за нивно поголемо влијание врз политичките процеси, преку активно учество и инклузија во партиските структури.
Политичките подмладоци како генератори на идното партиско лидерство ја истакнаа важноста од едукација и сензибилизирање за демократијата и нејзините сфаќања помеѓу младите.