Македонија
Џафери, Османи и Маричиќ во мобилната станица за патни исправи во Брисел: „Работиме на нови олеснувања“
Министерот за надворешни работи, Бујар Османи, во придружба на премиерот Талат Џафери и вицепремиерот за евроинтеграции, Бојан Маричиќ, за време на престојот во Брисел, денес, ја посети македонската амбасада, каде што, покрај другите конзуларни услуги за нашите државјани, преку мобилната станица се врши фотографирање и земање биометриски податоци за издавање патни исправи.
„Амбасадата во Брисел и сите други дипломатско-конзуларни претставништва на Северна Македонија целосно ја реорганизираа својата работа во делот на конзуларната проблематика со цел излегување во пресрет на интересите и потребите на нашите граѓани што живеат и работат во странство. Секое барање од наш државјанин значи обврска за сите нас, особено за дипломатите во претставништвата, со цел давање брз, ефикасен и квалитетен одговор. Ова е период кога сите ние сме дополнително посветени за соочување со овој предизвик наметнат од енормното зголемување на барањата за конзуларни услуги, особено во делот на патните исправи“, истакна Османи запознавајќи се одблиску со актуелната состојба во Амбасадата поврзано за оваа проблематика.
Џафери, Маричиќ и Османи разговараа со наши државјани, кои се наоѓаа во просториите на Амбасадата, и ги уверија дека се прават максимални напори итие да не се соочуваат со никаков проблем во државата во која живеат поради обврската за обновување на личните документи, која произлегува од договорот од Преспа.
„Издавање на патните листови без надомест за сите државјани што живеат во странство и имаат потреба да се вратат во земјата за да извадат нови патни исправи, како и достава на патниот лист преку брза пошта онаму каде што нема дипломатско-конзуларни претставништва се само дел од решенијата. Следува организирање конзуларни денови и други видови олеснувања за граѓаните во странство за кои нашите претставништва беа инструирани и набргу ќе едува објава на планот“, информира министерот.
Османи ги брифира нашите државјани дека времетраењето на изработката на пасоши, кое е многу подолго од вообичаените рокови што постоеја до неодамна, е главната причина зошто периодот за врачување на изготвените пасоши во нашите претставништва е значително подолг од досегашната пракса, која имаше просек од 30 дена.
Министерството за надворешни работи располага со ограничен број базни и мобилни станици. Една од мобилните станици е токму во Амбасадата во Брисел, која во координација и соработка со амбасадите во Хаг и Париз врши услуги за фотографирање и земање биометриски податоци и за нашите државјани во Холандија и Франција.
Инаку, во текот на 2023 година Амбасадата во Брисел има обработено вкупно 2.488 предмети, од кои 1.127 издадени патни исправи и 523 патни листа; во Париз се обработени 1.083 предмети, меѓу кои 390 патни исправи и 242 патни листа; а во Хаг вкупно 1.076, со 340 патни исправи и 72 патни листа.
Во нашата Амбасада во Брисел беше оставрена средба и со добитникот на „МКартата“ во Белгија, со цел нејзино врачување. Министерот Османи изрази благодарност за покажаниот интерес за проектот „МКарта“ како значајно вмрежување на нашите најдобри претставници од дијаспората во светот и одличен пример за врската на овие личности со нашата земја.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
На покана на ЕИБ, Анѓушев говореше за поставување батерии на фотоволтаични електрани во Штип
Кредити од Европската инвестициска банка (ЕИБ) за македонските фирми да постават батерии на фотонапонските електрани, инсталирани на покривите на индустриските објекти, е поволноста со која европската финансиска институција ќе го поттикнува македонското стопанство да биде енергетски ефикасно.
Пред штипските фирми, во салата на општина Штип, консултантите на Европската Банка, Ловре Ристевски и проф. Даме Димитровски, порачаа дека има потреба ефикасно да се искористува електричната енергија од обновливи извори, наместо во значаен дел таа да се губи.
На претставувањето во Штип, бизнисменот Кочо Анѓушев, сопственик на енергетската компанија ФРОИНВЕСТ, говореше за батериските системи како единствено решение во моментот за справување со вишокот електрична енергија произведена од фотоволтаици, кој вишок производителот не може да го потроши, а електричната мрежа не може да го прими.
Анѓушев ги запозна штипските фирми за важноста на тоа дека секој кој инвестира во обновливи извори, без оглед на големината, потребно е да оди на интегрирано и комплетно решение за да има најбрз поврат на инвестицијата, и оптимало работење на електраната и на батеријата.
Поволните кредити на Европската инвестициска банка (ЕИБ) ќе бидат достапни преку македонските банки, по услови пропишани од ЕИБ.
Македонија
Околу 14.000 македонски граѓани останаа без денар вложувајќи пари преку Конти
Граѓаните да внимаваат со потенцијалните инвестиции преку различни апликации, апелираше денес министерот за внатрешни работи Панче Тошковски и информира дека досега не е поднесена ниту една кривична пријава поврзани со апликацијата Конти која остави без денар околу 14.000 македонски граѓани кои вложувале пари преку Конти, а биле членови на група на Телеграм.
Според Тошковски, оние што учествувале како жртви во овој, како што рече, потенцијално кривично-правен настан, да се обратат до МВР за да се истражат случаите и соодветно да се реагира.
„Според информациите од утринава, кривична пријава официјално не е поднесена, но изразувам оргомна загриженост за ваков пирамидален инвестициски финансиски потенцијален криминал што се случува по не знам кој пат во земјава. Од службите бев информиран дека многу слична апликација за измама била констатирана и во 2022 година. И тогаш е упатен апел граѓаните особено да внимаваат кога станува збор за вакви потенцијални инвестиции кои најчесто завршуваат како класични измами. И сега апелирам, граѓаните особено да внимаваат на вакви инвестициски вложувања, да се консултираат со експерти од областа, да се обратат и до МВР каде исто така има експерти кои првично може да проценат дали станува збор за потенцијална измама, а оние што учествувале како жртви во овој потенцијален кривично-правен настан, да се обратат до МВР за да истражиме и соодветно да постапиме“, истакна министерот по прес-конференцијата по повод 100 дена од работата на Владата.
Македонија
Околу 36 килограми марихуана запленила Царинската управа пред два дена
Директорот на Царинската управа, Бобан Николовски, на денешниот настан за реконструкција на граничниот премин Деве Баир, објави дека пред два дена Царинската управа запленила 36.4 килограми опојна дрога марихуана на граничниот премин Блаце, додека вчера на Jажинце бил спречен шверц на голема количина лекови.
„Од 1 јули до 30 септември годинава или за последното тримесечје, за 70 отсто е зголемен бројот на случаи на заплени, споредено со истиот период 2023 година, лани во тој период биле 54, со 73.631 запленето парче, додека годинава бележат 92 заплени, со 396.592 парчиња. Тоа значи дека за она што се бориме, а тоа е професионално врешење на работата на царинските службеници, тоа и се забележува, резултатите се видливи и мерливи, и од аспект на финансии, полнење на буџетот, но и од аспект на нашето оперативно работење. Со реконструкцијата на управната зграда ќе добиеме нови помодерни услови, современи услови за работа на царинските но и на полициските службеници, но се создаваат и услови за подобро оперативно работење, што за нас како службеници е многу битно, со фокус на квалитет, што значи откривање и спречување на недозволената трговија со забранети стоки“, рече Николовски, објавувајќи ја големата заплена од пред два дена на Блаце.