Свет
Објавени податоци: Бајден има многу повеќе пари во кампањата, Трамп троши многу повеќе
Откако собра пари во јануари, Доналд Трамп е уште подалеку зад Џо Бајден финансиски бидејќи потрошил повеќе на реклами и други трошоци отколку што собрал од донатори, покажуваат документите.
Трамп имаше нешто повеќе од 30 милиони долари на крајот на минатиот месец по успешните републикански прелиминарни избори во Ајова и Њу Хемпшир, што е помалку од речиси 33 милиони долари еден месец претходно, соопшти неговиот изборен штаб во поднесоците до Федералната изборна комисија.
Бајден, кој води полесна трка за номинација на Демократската партија, во документите доставени до Комитетот рече дека јануари го завршил со 56 милиони долари наспроти 46 милиони долари во декември минатата година.
Кампањата на Трамп објави дека собрала 8,8 милиони долари во јануари и потрошила повеќе од единаесет милиони, вклучително и повеќе од 5 милиони долари за реклами и пораки.
Кампањата на Бајден собра 15 милиони долари во јануари и потроши нешто помалку од 6 милиони долари. Кога сметките за кампањата се комбинираат со други изборни сметки во Демократската партија, Бајден собра вкупно 130 милиони долари.
Трамп и претходно покажа дека може да победи на изборите и кога неговите ривали трошат повеќе од него, како што беше случајот со Хилари Клинтон во 2016. Според националните анкети, Трамп и Бајден се во тесна трка и се очекуваат неизвесни избори во ноември.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Зеленски се обрати до нацијата: Се браниме кај Харков, во Доњецк е исклучително тешко
Украинските сили продолжуваат со одбранбените операции околу северните погранични населби во регионот Харков, изјави украинскиот претседател, Володимир Зеленски во вечерното обраќање до нацијата.
„Нашите сили извршуваат контранапади и ја штитат украинската територија веќе втор ден“, рече Зеленски.
Украинската војска претходно соопшти дека руските сили се задржани во пограничните села во „сивата зона“, додека Русија објави дека зазела пет локални населби.
Ситуацијата, рече Зеленски, е особено напната во регионот на Доњецк, поточно во правец на Покровское, кај селата Семенивка и Нетаилова.
Зеленски додаде дека попречувањето на руските офанзивни акции сега е задача број еден.
Свет
Макрон: Се надевам дека Французите нема да мора да се борат во Украина
Францускиот претседател Емануел Макрон уште еднаш не ја исклучи можноста за интервенција на француската армија во Украина, но истовремено изрази надеж дека неговата земја нема да мора да војува и да испраќа свои војници во војна.
Како што пренесува „Украинска правда“, Емануел Макрон рече дека во одреден момент Европејците треба да бидат подготвени да ја спречат Русија да напредува понатаму во Украина, но тој најискрено се надева дека нема да мора да се борат.
„Ако сакаме мир, мораме да го заштитиме. Затоа треба да се вооружиме и затоа треба да бидеме средство за одвраќање и убедување. Ако одите предалеку и ги загрозувате нашите интереси и нашата безбедност, тогаш јас не исклучувам интервенци во конфликтот“, рече Макрон.
Тој нагласи дека украинскиот суверенитет и територијалниот интегритет се под закана, но истовремено владеењето на правото и општите правила се под закана.
„И ако оставиме сè како што е во Украина, тогаш ќе победи правото на посилниот. И не можеме да бидеме сигурни бидејќи тоа се случува на 1.500 километри. Значи, во Украина нашата иднина и нашата безбедност се во прашање“, заклучи францускиот претседател.
Свет
Големи пропалестински протести во Малме пред евровизиското финале, се бара исклучување на Израел од натпреварот
Денеска во центарот на Малме, Шведска се одржува масовен пропалестински протест поради учеството на Израел на овогодинешното натпреварување.
Голем број луѓе почнаа да се собираат на главниот плоштад во Малме од 16 часот.
Протестот почна на главниот плоштад во Малме, а насобраните од ова место се упатија кон арената Малме, каде што се одржува Евровизија.
Во четвртокот, кога претставничката на Израел настапи во втората полуфинална вечер, на улиците на Малме протестираа повеќе од 30.000 луѓе, според проценките на шведската полиција.
Барањата се исти – бојкот на Евровизија и исклучување на Израел од натпреварувањето.