Македонија
Средба Коцевски – Гир: Предизвик остануваат дигитализацијата и новиот систем за управување со предметите
Јавниот обвинител на Република Северна Македонија, Љупчо Коцевски, на денешната средба со амбасадорот на ЕУ, Дејвид Гир, и претставници на Делегацијата на ЕУ во земјата, се заблагодари за поддршката што Европската Унија ја дава за Јавното обвинителство и за правосудството во нашата земја.
Тој ги презентира тековните состојби во Јавното обвинителство и приоритетите од програмата за неговиот шестгодишен мандат. Исто така, Коцевски и Гир разговараа за забелешките од последниот извештај на Европската комисија и активностите што веќе ги презема Јавното обвинителство за реализација на дадените препораки. Притоа Коцевски го запозна Гир со напредокот во функционирањето на истражните центри, особено во Основното јавно обвинителство Скопје, јакнењето на капацитетите на Обвинителството за водење финансиски истраги, воспоставената континуирана соработка со Државниот завод за ревизија, како и соработката со Европравда и со Европското јавно обвинителство.
„Предизвик останува дигитализацијата и новиот систем за управување со предметите за кој веќе се испитуваат можностите преку проектот ‘ЕУ – Владеење на правото’. Би сакал да побарам и од вас поддршка во однос на нашите заложби да добиеме функционален систем, кој ќе ги задоволува потребите на ефикасната кривична постапка, но и ќе ја гарантира независноста и самостојноста на јавните обвинители и доверливоста на постапката“, рече Коцевски.
Евроамбасадорот Гир го истакна како позитивен чекор и пракса, која треба да се следи, фактот што Коцевски пред пратениците презентира сопствена програма за активностите што има намера да ги анализира за време на мандатот како државен јавен обвинител. Тој изрази разбирање за тешкотиите со недостиг на финансиски и кадровски ресурси со кои се соочува Обвинителството и кои се нотирани во извештајот на ЕК, со забелешка дека Унијата ќе продолжи да инсистира да се обезбедат сите неопходни услови за непречена работа на Јавното обвинителство.
Коцевски и Гир на средбата дискутираа и за ефектите од последните измени на Кривичниот законик, кои предизвикаа застарување на повеќе предмети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.