Македонија
Демири и Клисаровски: Бесплатен скрининг за 2.000 пациенти во ризик од хронично бубрежно заболување
Министерот за здравство, Илир Демири, и генералниот директор на „Дјиаверум“, Димитар Клисаровски, денеска информираа дека е обезбеден бесплатен скрининг за 2.000 пациенти во ризик од хронично бубрежно заболување.
„Како резултат на дел од заклучоците од Првата ренална академија, што се одржа во ноември минатата година на иницијатива на нашето Министерство и шведската амбасада, со цел подигнување на свесноста за бубрежното заболување и неговата рана превенција, заедно со дијализните провајдери ‘Дијаверум’ и ‘Нефроплус’ најавуваме почнување на проектот ‘Скрининг на популација во ризик од хронична бубрежна болест’. Скринингот почнува овој месец, ќе трае четири месеци и ќе опфати вкупно 2.000 пациенти во ризик на територијата на целата држава. Заедничките компетенции и ресурси од областа на бубрежното здравје ќе бидат на располагање за што поширок опфат, превенција и подостапна нега на популацијата, што всушност е дел од годинешното мото на Светскиот ден на бубрегот“, рече Демири.
Клисаровски потенцира дека финансиската реализација на проектот во целост е на здравствените установи „Дијаверум“ и „Нефроплус“, со што прегледите за пациентите ќе бидат бесплатни.
„Идејата за почнување ваков скрининг-проект постоеше од порано согледувајќи ја состојбата на пациентите што почнуваат со дијализа, при што во многу случаи пациентите не биле ни свесни дека имаат хронично бубрежно заболување сè до моментот на почетокот на дијализа, што е последниот стадиум на хроничното бубрежно заболување. Министерството за здравство, Управата за електронско здравство, ние – ‘Дијаверум’ и колегите од ‘Нефроплус’ се вложивме максимално зса да може да се изведе овој проект за бесплатен скрининг на популација во ризик од бубрежни заболувања достапна за пациентите“, изјави Клисаровски.
На граѓаните што се во ризик за развој на хронично бубрежно заболување ќе им се јават од страна на здравствените установи и ќе бидат повикани на бесплатен преглед. Скринингот ќе ги опфати следните градови: Тетово, Гостивар, Кичево, Струга, Охрид, Дебар, Битола, Прилеп, Кавадарци, Велес, Железара, Визбегово, Делчево, Гевгелија, Штип, Кочани, Струмица, Куманово и Крива Паланка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Владата за состојбата во хируршките клиники: Да се замени опремата на централната компресорска станица со нова, замена на инсталацијата и дислокација на централната компресорска станица
Министерството за здравство информира дека на денешната седница, Владата ја разгледа и ја усвои Информација за состојбата во хируршките клиники при Универзитетски Клинички центар „Мајка Тереза“ Скопје во врска со проблемот со компресорската станица, како и за досега преземените активности и мерки со цел надминување на истите.
На седницата, беа донесени следните заклучоци:
– Се укажува, јавните установи од областа на здравството за потребите на јавните здравствени установи, универзитетски клиники, завод и Ургентен центар Скопје да спроведе замена на опремата на централната компресорска станица со нова опрема, како и замена на инсталацијата и дислокација на централната компресорска станица;
– Се укажува, јавните установи од областа на здравството за потребите на јавните здравствени установи, универзитетски клиники, завод и ургентен центар Скопје во рок од една недела да достави до Владата на Република Северна Македонија оперативен план за спроведување на активностите.
Пред три дена, во понеделникот заменик министерката д-р Манолева донесе и наредба универзитетските клиники кои се сместени во зградата на хируршки клиники во Клиничкиот центар операционите сали да отпочнат со работа со користење на надворешни компресори и дополнително со садови со компримиран воздух. Министерството за здравство ќе укаже до клиниките да набават надворешни компресори со цел функционирање на установите со итен и елективен програм.
Македонија
Средба на претседателката Сиљановска Давкова со шведската амбасадорка Ами Ларсон Џеин
Претседателката Гордана Сиљановска Давкова денеска ја прими амбасадорката на Кралството Шведска, Ами Ларсон Џеин.
На средбата беа разменети мислења за развојот на севкупните билатерални односи, за перспективите за продлабочување на развојната соработка, како и за македонскиот евроинтегративен процес, напредокот во реформите и исполнување на копенхагенските критериуми.
Двете соговорнички ги поздравија традиционално добрите политички односи меѓу двете земји, при што претседателката Сиљановска Давкова изрази интерес за јакнење на севкупните контакти и интензивирање, односно поактивен политички дијалог со Шведска на највисоко ниво.
Претседателката Сиљановска Давкова изрази благодарност за континуираната и доследна поддршка од Шведска на македонските еврoинтеграции, како и за севкупната досегашна техничка помош на пристапниот процес во Европската Унија и изрази очекување за натамошна соработка во однос на македонските стратешки цели.
Во таа насока беше изразено задоволство од континуираната развојна соработка со Шведска со цел споделување на искуства и јакнење на капацитетите на македонските институции, особено во полето на демократијата, почитувањето на човековите права и владеењето на правото.
На средбата претседателката Сиљановска Давкова упати честитки по повод Националниот ден на Шведска и ја истакна својата подготвеност за натамошно продлабочување на соработката во сите области во кои постојат потенцијали.
Скопје
Поништена е одлуката за изградба на 12 габаритни згради во Црниче, рече Ѓорѓиевски
Стопирана е иницијативата за измена на ДУП реон Ј, градска четврт Ј20, блок Ј20.03, со која во времето на претходниот градоначалник на општина Кисела Вода, се предвидуваше изградба на 12 згради, извести градоначалникот Орце Ѓорѓиевски.
-Ја стопиравме иницијативата за измена на ДУП реон Ј, градска четврт Ј20, блок Ј20.03, со која во времето на мојот претходник, се предвидуваше изградба на 12 згради! Како што ветив и ги исполнив своите ветувања за Расадник, како што ја донесовме и целосно ја спроведуваме одлуката за забрана за изградба на станбени објекти со повеќе од 4 станбени единици во Пржино и Црниче, од денес е во сила и оваа одлука и наместо гигантски зданија, на посочената локација во Црниче, на сопственикот ќе му биде дозволена само реконструкција на објектот, старата печатница и тоа во постоечкиот габарит, кажа градоначалникот Орце Ѓорѓиевски.
„Воедно, сакам да инфомирам дека скалите кои со измената на ДУП-от требаше да бидат отстранети, ќе останат и ќе бидат надополнети со пропратна урбана опрема, онака како што бараа нашите жители.
Одговорно тврдам дека нови одобренија за изградба на згради во Пржино и Црниче нема да има, како што е зацртано во мојата одлука, која што е поддржана и од страна на Советот на општината, а и од сите жители од овој дел на градот.
Во Пржино и Црниче ќе можат да се градат само куќи, кои што можат да имаат максимум 4 станбени единици!
Времето во кое што под маската на А1 – куќи се градеа габаритни згради е завршено!
Ова е ново време во кое живее општина Кисела Вода.
Нема да дозволам поради лични интереси на поединци мојот народ во Црниче и Пржино да се гуши и тие прекрасни населби под срцето на Скопје, Водно, да се бетонизираат.
Испишуваме нова приказна, заедно и според вашите потреби“, изјави градоначалникот Орце Ѓорѓиевски.