Свет
Трговски брод погоден со проектил кај Јемен
Трговски брод извести дека бил погоден со проектил и претрпел штета на 140 километри западно од јеменскиот пристаништен град Ал Худејда, соопштија Организацијата за поморски трговски операции на Обединетото Кралство и британската безбедносна фирма „Амбри“.
„Бродот претрпе одредена штета. Екипажот е безбеден и бродот продолжува кон следното пристаниште“, соопшти Организацијата за поморски трговски операции. ‘Амбри’ исто така извести дека бродот претрпел штета и нема повредени. Организацијата за поморски трговски операции соопшти дека друг брод, на 93 километри југозападно од Ал Худајда, пријавил дека проектили го надлетале бродот и експлодирале во далечина.
„Командантот пријави дека два проектила летале над бродот и слушнал два силни удара од далечина. Бродот не пријавил никаква штета и екипажот е безбеден. Бродот продолжува кон следното пристаниште“, се вели во соопштението.
Американската војска доцна синоќа соопшти дека Хутите истрелале две противбродски балистички ракети од Јемен кон Аденскиот Залив и два проектила кон Црвеното Море, но нема извештаи за повредени или оштетувања на бродови на САД или на коалицијата.
Централната команда на американската војска соопшти дека уништила девет противбродски проектили и две беспилотни летала во областите во Јемен контролирани од Хутите.
Хутите повеќепати лансираа беспилотни летала и проектили врз меѓународни комерцијални бродови во Аденскиот Залив од средината на ноември велејќи дека тие дејствуваат во знак на солидарност со Палестинците против израелските воени дејства во Газа.
Нивните напади на Црвеното Море го нарушија глобалниот транспорт принудувајќи ги компаниите да прават подолги и поскапи патувања низ Јужна Африка. Како одговор, САД и Велика Британија почнаа напади врз цели на Хутите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Египет ги повика Хамас и Израел да покажат флексибилност и да постигнат договор за прекин на огнот во Газа што е можно поскоро
Египет апелираше до Хамас и Израел да покажат флексибилност за што поскоро да се постигне прекин на огнот во борбите во Газа, соопшти утрово египетското Министерство за надворешни работи. Египет смета дека преговорите во Каиро не доведоа до прекин на огнот. Тие во моментов се во „деликатна фаза“, а делегациите на Хамас и Израел го напуштија главниот град на Египет, се наведува во соопштението.
Во телефонски разговор со американскиот државен секретар Ентони Блинкен, египетскиот министер за надворешни работи Самех Шукри ја нагласи „важноста да се повикаат страните да покажат флексибилност и да ги направат сите неопходни напори за постигнување договор за прекин на огнот и на тој начин да се стави крај на хуманитарната трагедија во Газа. соопшти Министерството.
Каиро стравува од опасноста, израелската операција во Рафах да ја загрози стабилноста и безбедноста на регионот, се додава во соопштението на египетската дипломатија.
Блинкен потврди дека Соединетите Американски Држави се против голема воена операција во Рафах и какво било принудно раселување на Палестинците од Газа, изјави неговиот портпарол Метју Милер.
Израелската армија во вторникот распореди тенкови во Рафах и ја презеде контролата на граничниот премин со Египет, блокирајќи го главниот премин за конвои со хуманитарна помош кон опколената палестинска територија.
Свет
Десетици илјади Палестинци бегаат од Рафах
Десетици илјади раселени Палестинци ги спакуваа своите шатори и други работи и бегаат од Рафах во други делови на Појасот Газа поради израелската закана од инвазија, пишува АП.
Израел постојано се закануваше дека ќе го нападне Рафах, каде засолниште побараа околу 1,3 милиони Палестинци, повеќе од половина од населението на Газа.
Еден од раселените рече дека не знае каде да оди.
Израелскиот премиер Бенјамин Нетанјаху денеска изјави дека американската закана дека нема да достави одредено оружје нема да го спречи Израел да продолжи со офанзивата во Појасот Газа.
Во текот на оваа недела израелските сили започнаа ограничена операција при која го зазедоа граничниот премин Рафах од палестинска страна и го блокираа влезот на хуманитарна помош.
ОН објавија дека северот на Појасот Газа веќе е во состојба на „тотален глад“.
Израел смета дека Рафах е последното упориште на борците на палестинското движење Хамас и дека армијата мора да влезе во тој град за да го уништи тоа движење и да ги врати заложниците кои беа киднапирани на 7 октомври.
Европа
Украина: Русите го нападнаа Харков, уништени се згради, меѓу повредените има и дете
Украина ги уништи сите 10 беспилотни летала во руски напад во текот на ноќта, но две лица се повредени, а станбени згради во регионот Харков беа зафатени од пожар, соопштија денеска украинските власти.
Воздухопловните сили на Телеграм соопштија дека Русија лансирала и две противвоздушни наведувани ракети. Портпаролот на украинските воздухопловни сили во телевизиски пренос изјави дека руските ракети најверојатно биле насочени кон североисточниот град Харков.
Гувернерот на регионот Харков, Олех Синехубов, рече дека три станбени куќи биле запалени, а десетици биле оштетени како резултат на рускиот напад, чија цел, според него, била и инфраструктурата и станбените области. На фотографиите што ги објави Синехубов на Телеграм, се гледаат големи пламени јазици од станбените згради.
„Две лица, меѓу кои и едно 11-годишно дете, се ранети во нападот и се на медицинска помош“, рече Синехубов на апликацијата Телеграм.
Ројтерс сè уште не ја потврди независно оваа вест. Москва негира дека цели на цивили во овие „легитимни напади врз воената, енергетската и транспортната инфраструктура на Украина“.