Македонија
ВРЕДИ: Бујар Османи кандидат на Фронтот на руските и српските олигарси

„Нашата земја е членка на НАТО. Но, од големо значење е прашањето, кој им ја отвори вратата на нашата држава на руските и српските олигарси? Пратеникот на ДУИ познат како „Пуцко“, Исмаил Јахоски, половина од бензинските пумпи што ги поседува, ги има од Лукоил, големата руска компанија поврзана со Путин. Самиот Пуцко добива речиси половина од тендерите, но заедно со Лукоил тој го добива најголемиот дел од тендерите од јавните институции и од министерствaтa. Прпарим Бајрами од ДУИ, директор на Лотарија, еден од своите бизниси, ресторанот во Куманово го има токму кај Лукоил, на автопат. Бизнисот со казината, кој го штитат и промовираат истакнатите личности од ДУИ, го води српското подземје“, велат од ВРЕДИ.
„Самиот Бујар Османи бил вклучен во лиценцирањето на казината, а за ова има и документ потпишан од него, во лиценцирањето на Мијалков. Фронтот на ДУИ заслужува да се нарекува Фронтот на руските и српските олигарси.
Кога тие велат Не на Русија, Не на Србија и Не на Кина, да потсетиме: Од 2002 година во РСМ влегле повеќе од 70 компании со руски капитал. Годишниот приход на овие компании е над 200 милиони евра. Нормално, се поставуваат прашањата:
– Кој беше на власт и кој дозволи влез на ЛУКОИЛ во РСМ?
– Кој е деловен партнер со ЛУКОИЛ?
– Кој беше на власт и кој дозволи влез на ТЕ-ТО во РСМ?
– Кој беше на власт и кој им го продаде BUCHIM на Русите?
– Кој беше на власт и кој му дозволи на Сергеј Самсоненко (Хотел „Русија“, „Сис инвестмент груп“) да инвестира во РСМ?
– Кој беше на власт и кој му дозволи на рускиот бизнисмен Олег Викторович Бојко, кој е на американската црна листа, (Iute Credit и Forca – брзи кредити) да инвестира во РСМ?
– Кој беше на власт и кој му дозволи на Николај Токарев (MAYA) да инвестира во РСМ?
– Чиј син на висок функционер на ДУИ е претставник на Huawei за Северна Македонија?
– Кој донесе посебен закон во Собранието со цел автопатот Кичево – Охрид да и се даде на кинеската компанија Синохидро?
– Кој го внесе српското подземје во РСМ со бизнисот со казината?
– Кој го лиценцираше српскиот Моцарт?
Одговорите на овие прашања се познати, Фронтот на руските и српските олигарси. За среќа, нивниот мандат истече, времето на ДУИ заврши. Промената доаѓа, промената ВРЕДИ!“, пишуваат од партијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.
Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.