Македонија
Лукаревска: Имаме јасен план за модернизација и на образованието и на здравството, зашто сакаме сигурна иднина и благосостојба за сите граѓани
Нашата определба е европска Македонија, зашто сакаме европско образование и европско здравство за сите граѓани. Доброто образование е гаранција за добра, перспективна иднина на секој подинец и на државата и затоа, подигнувањето на квалитетот на образованието на сите нивоа и прилагодувањето на потребите на пазарот на трудот е стратешки приоритет на СДСМ, рече носителката во третата изборна единица, Сања Лукаревска.
-Со добро образование насочено кон развојот на потенцијалот и вештините кај младите луѓе, до поголема конкурентност , подобри работни места и подобар живот за сите, тоа е нашата цел, тоа им треба на младите, од тоа зависи нивната иднина и идниот развој на државата. Затоа го унапредивме и ќе продолжиме да го унапредуваме ученичкиот и студентскиот стандард со поголем број и повисоки стипендии, субвенциониран студентски оброк-зголемување на износот за студентски оброк на 200 денари, укинување на таксата за пријавување на испит.
Лукаревска рече дека заложба е да се задржат најдобрите студенти и се повеќе млади лица да бидат ангажирани во високообразовните и во научните установи во државата.
-Ќе вложуваме повеќе во талентираните ученици, во континуирана поддршка на учениците со попреченост, но и во наставниот кадар, нивната работа и посветеност ни е најважна во остварувањето на целите за уште подобро и помодерно образование.
Се фокусираме и на модернизирање на здравствениот систем, рече Лукаревска.
-Политиката на СДСМ е јасна и конзистентна. Вкупните примања на лекарите специјалисти се повеќе од двојно зголемени. Во следниот мандат се обрзуваме дека платите за специјалистите ќе се зголемат во терциерното здравство до 180.000 денари, во секундарното здравство до 140.000 денари, за општите лекари до 120.000, за медицинските сестри со висока школа до 90.000 денари, а на оние со средна 60.000 денари. Специјализантите ќе ги остваруваат сите права во текот на својот стаж, преку целосно вкупно здравствено осигурување и ќе добиваат основен месечен надоместок од почетни 60 000 денари.
За секој доктор кој ќе се врати во државата, веднаш ќе се обезбеди работно место и ќе се доделат средства за стимулација. Целосно ќе се укине партиципацијата од 20% за услугите во јавното здравство. Јавното здравство да биде бесплатно за сите осигуреници. Нема одложување на потребата од зајакнување на системот на јавното здравство, зашто здравјето е најважно.
Имаме јасен план за развивање, унапредување и модернизација и на образованието и на здравството, зашто сакаме сигурна иднина и благосостојба во европска Македонија за сите граѓани, рече Лукаревска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на министерот Муцунски со шефот на Мисијата на ОБСЕ во Скопје, Вал
Министерот за надворешни работи и надворешна трговија, Тимчо Муцунски, денеска оствари средба со шефот на Мисијата на ОБСЕ во Скопје, амбасадорот Килиан Вал. На средбата беше потврдена долгогодишната соработка со ОБСЕ во различни области, при што беше изразена поддршка за напорите на Организацијата насочени кон зајакнување на соработката и одржување на мирот во регионот на ОБСЕ, извести МНР.
Двајцата соговорници изразија задоволство од досегашната соработка помеѓу ОБСЕ и македонските институции, и ја потврдија подготвеноста за нејзино продолжување. Тие разменија мислења и за тековните активности на Мисијата и заеднички ја реафирмираа посветеноста на продолжување на проектите кои ги поддржуваат реформските процеси на новата Влада.
Македонија
ЛДП со реакција за изјавата градоначалникот на Кисела Вода: Сепак има надеж
ЛДП реагираше на изјавите на Орце Ѓорѓиевски во врска со можноста за отповикување на градоначалници, нагласувајќи дека оваа иницијатива не е нова, туку е дел од нивните заложби кои претходно не биле поддржани ниту јавно ниту во Собранието.
„ЛДП ја истакна потребата за воспоставување на механизам за отповикување на градоначалници преку референдум, со цел поголема отчетност и одговорност на локалните лидери. Оваа иницијатива, која партијата ја поддржува подолг период, се заснова на примери од европските земји како Обединетото Кралство, Полска и Молдавија, каде ваквите механизми веќе се применуваат.
Според нив состојбата во која градоначалниците можат да ги поминат своите мандати без да одговараат за несработеното, ги оштетува општините и граѓаните. Иницијативата за отповикување на градоначалници се споменува како начин за подобрување на транспарентноста и одговорноста на локалната власт кон оние кои ја избрале“, велат од ЛДП.
Од партијата потсетија дека уште изминатата година кога ја пласираа идејата за доверба или отповикување на градоначалник истата беше отфрлена.
„Воедно минатата недела поднесовме амандман на измените во законот за локална самоуправа, кој за жал не беше поддржан во Собранието. Но, добро е што само по неколку дена доаѓаат позитивни реакции и изјави по однос на нашата заложба. Подаваме рака да го изработиме предлогот и да го усвоиме сите заедно во интерес на граѓаните“, истакнуваат од ЛДП.
ЛДП почнува серијал на јавни трибини со сите засегнати страни, а пред се со граѓаните затоа што предлогот ги има нив во фокусот: да добијат отчетни институции кои ќе им служат лично нив, а не на сопствените и партиски интереси. Институции исклучиво по европски стандарди и хармонизација со европското законодавство. ЛДП го повикува претседателот на ЗЕЛС и Министерот за локална самоуправа да се приклучат на оваа иницијатива.
Македонија
Претседателката Сиљановска Давкова се обрати на дискусијата „Младите и внатрепартиската демократија“
Претседателката Гордана Сиљановска Давкова се обрати на дискусијата „Младите и внатрепартиската демократија“, што се одржа во Кабинетот на Претседателот по повод 15 септември – Меѓународниот ден на демократијата.
Во дискусијата учествуваа подмладоци од политичките партии во земјава кои ги претставија своите погледи и искуства за улогата и положбата на младите во политичките партии кадешто членуваат и разменија идеи и препораки за подобрување на внатрепартиската демократија и за поттикнување на младинскиот ангажман во политиката.
Претседателката Сиљановска Давкова во обраќањето пред политичките подмладоци посочи дека демократизацијата на политичките партии е клучна за демократизацијата на политиката. Таа се осврна на процесите на внатрепартиското одлучување, на процесите на кандидирање и избор на партиските функционери, посочувајќи дека е неопходна децентрализираност на партиите, почитување на различни тенденции и мислења внатре во партиите и поавтентичен настап на локалните партиски организации.
Во таа насока, таа говореше за потребата од одговорност внатре во партијата, неопходноста од реформи, партиципативна политичка култура и промени во пристапот и комуникацијата на партиите со јавноста.
Претседателката во своето обраќање се осврна и на структурата на партиите и нивното претставување од аспект на родовата застапеност, истовремено посочувајќи дека дејствувањето на политичките партии во голема мера зависи од етичкиот капацитет на водството и на лидерот.
Претседателката ја поддржа потребата од поголема вклученост на младите во носењето на партиските одлуки, истакнувајќи дека тие треба да бидат најсубверзивниот елемент којшто ќе влијае на демократизацијата на овие процеси и на партиското одлучување.
Истакнувајќи ја важноста на внатрепартиската демократија, младите ги разгледаа можностите и начините за нивно поголемо влијание врз политичките процеси, преку активно учество и инклузија во партиските структури.
Политичките подмладоци како генератори на идното партиско лидерство ја истакнаа важноста од едукација и сензибилизирање за демократијата и нејзините сфаќања помеѓу младите.