Македонија
Гаши – Бомгартнер: Ја имате целокупната француска поддршка на вашиот пат кон Европската Унија

Претседателот на Собранието Африм Гаши денес оствари средба со Амбасадорот на Француската Република во Република Северна Македонија, Н.Е. Сирил Бомгартнер. На средбата присуствуваше и Жаклина Поп- Ангелова, Шеф на Кабинетот на Амбасадорот.
Посакувајќи му топло добредојде на Амбасадорот, Претседателот Гаши недвојбено ги потврди одличните билатерални односи меѓу двете држави и двата парламента, истовремено заблагодарувајќи се за француската поддршка на сите нивоа на власт за членството во НАТО и на нашиот пат кон полноправно членство во Европската Унија. Ја поздрави досегашната активна заложба за унапредување на односите од страна на француските сенатори и пратеници, особено пратениците Лилиана Танги и Бертран Сор, нивната недвосмислена поддршка за нашиот процес на евроинтеграции. Како прв приоритет во неговиот мандат, го издвои членството во Европската Унија и напорите кои ќе ги вложи за што поскоро остварување на оваа наша стратешка цел и определба на мнозинството наши граѓани.
Амбасадорот Бомгартнер, честитајќи му го изборот за Претседател на Собранието во име на француските власти и во негово лично име, ја пренесе целокупната поддршка на Француската Република во извршувањето на неговата функција како Претседател на Собранието. Беше согласен за позитивниот тренд на динамична парламентарна соработка меѓу пратениците од Собранието на Република Северна Македонија и Националното собрание и Сенатот на Француската Република, особено меѓу групите за соработка и во рамките на Секциите во Парламентарното собрание на Франкофонијата. Амбасадорот ја искористи приликата уште еднаш да го поздрави одржувањето на втората едукативна активност во Собранието “Имам став- Млад франкофонски парламент”, во рамките на одбележувањето на месецот март – месец на Франкофонијата, кој им дава можност на учениците франкофони од средните училипшта на еден ден да бидат пратеници и да одлучуваат за значајни теми кои ги засегаат младите. Во однос на евроинтеграциите, Амбасадорот Бомгартнер ја истакна важноста од градењето на над-партиски консензус за прашањата поврзани со членството во Европската Унија, особено за донесувањето на законодавство кое налага обезбедување на дво-третинско мнозинство во Собранието, како клучен чекор во овј процес.
Двајцата соговорници разменија мислења за претстојните собраниски активности во актуелниот парламентарен состав и за случувањата во Француската Република во одржувањето на европските избори. Беше заклучено дека е потребно што поскоро основање на групите за пријателство во двата парламента по завршувањето на изборите и продолжување на интензивната парламентарната соработка во периодот што следи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Земјотресот на Света Гора почувствуван и во Македонија

Силниот земјотрес на Света Гора почувствуван и во југоисточниот дел на Македонија.
„Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, денес 7 јуни 2025 година регистрираа серија на земјотреси чии епицентри потекнуваат од соседна Република Грција.
Според досегашните податоци со кои располага опсерваторијата, почувствуван е земјотресот во 14 часот и 46 минути чиј епицентар се наоѓа 290 km југоисточно од Скопје, со Рихтерова локална магнитуда M L 5.2.
Земјотресот беше почувствуван во југоисточниот дел на Републиката со интензитет од III степени според Европската макросеизмичка скала“, известија од Сеизмолошката опсерваторија.
Македонија
АХВ го одбележа 7 Јуни – Светски ден на безбедна храна

Aгенцијата за храна и ветеринарство и оваа година се приклучи и ја поддржува глобалната иницијатива и го одбележа 7 јуни, Светски ден на безбедна храна. Со едукативен и спортско рекреативен настан наменет за граѓаните и децата, денес, во паркот Авионче во скопската населба Ново Лисиче на присутните им беа поделени едукативни флаери за безбедноста на храната, а за најмалите се одржаа спортско-рекреативни игри преку кои се афирмираше безбедноста на храната и нејзиното значење.
На 10 јуни, во вторник, со поддршка и во соработка со Европската агенција за безбедност на храната – ЕФСА, Агенцијата за храна и ветеринарство ќе одржи настан за подигнување на јавната свест за безбедноста на храната на која ќе учествуваат реномирани претстставници од EFSA, од научните и други институции поврзани со прашпања кои се однесуваат на производството на храна и нејзината безбедност.
Годинашното мото на Светскиот ден на безбедна храна – 7 јуни е „Науката во акција“ и тоа денес не потсетува на важноста на науката како основна алка од синџирот на безбедна храна. Едноставно, тоа е дел без кој не се може и кој ги создава основите за креирање на политиките за безбедност на храната од страна на институциите, како што е и Агенцијата за храна и ветеринарство.
Преку едукативниот спортско рекреативен настан кој се одржа денес и настанот кој во соработка со EFSA ќе се одржи во вторник, АХВ и годинава активно работи на подигнување на свеста на граѓаните за важноста на безбедноста на храната и за превенирање и управување со ризиците со цел унапредување на нивното здравје.
Македонија
(Видео) Василевски: Нула нови градинки за 4 години во Аеродром, околу 700 деца чекаат за запишување секоја година

Изминаа речиси 4 години откако ВМРО-ДПМНЕ ја освои локалната власт. И По 4 години, ВМРО-ДПМНЕ во Општина Аеродром не изгради ниту една од ветените 4 нови градинки, рече денеска на прес-конференција Бојан Василевски, ОО СДСМ Аеродром.
„Овиe градинки беа првиот од 7-те топ приоритети на Муцунски и Митески во програмата со кои ја освоија довербата на нашите сограѓани од Аеродром. Митески и Муцунски ветија целосно нови градинки во Острово, Мичурин, Лисиче и Долно Лисиче, но еве, четири години подоцна, ниту една од овие ветени градинки до денес не е ни започната со градба“, вели Василевски.
Според него, околу 700 дечиња годишно се на листа за чекање за упис во градинка, заради недостатокот на места во градинките во Аеродром.
„ВМРО-ДПМНЕ во Аеродром покажа целосна незаинтересираност за решавање на овој проблем. Единствениот објект на градинка кој се гради во моментов во Стар Аеродром е со 70.000.000 денари, средства обезбедени од Владата на СДСМ во 2024 година. Само за споредба, кога со Општина Аеродром управуваше СДСМ се изградија 2 нови градинки со вкупен капацитет од 400 деца. Целосно нов објект Црвенкапа во Стар Аеродром со капацитет од 200 деца и целосно нов објект Буба Мара во Ново Лисиче со капацитет од исто така 200 деца“, кажа Василевски.