Македонија
Деспотовски: Битола е желна за промени – гласни барања за раскрстување со досегашните политики и начин на избор на кадровски решенија во СДСМ
Пред преполна сала во општинската организација во Битола, кандидатот за претседател на Социјалдемократскиот сојуз на Македонија, Јован Деспотовски, ја презентира програмата „Нов почеток за нов СДСМ“, со што се предвидуваат суштински реформи во партијата и зајакнување на општинските организации и нивен удел во носењето одлуки и креирањето политики.
„Битола е желна за промени. Членството бара радикален дисконтинуитет со досегашните политики и кадровски политики. Партиските другари се погласно бараат ново раѓање на партијата. Нашата програма е напишана токму со таква цел. Имавме одлична дебата и слушнавме многу конструктивни предлози, особено за тоа како да ги активираме младите и како повторно да им се слуша гласот, но и како секој од нас постарите членови, особено оние кои биле маргинализирани во последниве години, може да придонесе во реформа и напредок на партијата“, изјави Деспотовски.
За таа цел, се предвидува формирање норум и совет на искусните. Во ова тело ќе членува широк круг на поранешни партиски и функционери на централно и локално ниво и ќе заседава најмалку еднаш годишно. Членовите на форумот ќе се избираат така наречен совет на искусните, кој ќе заседава на редовни месечни средби (по потреба и почесто), особено во периоди пред избори или пред донесување битни и стратегиски одлуки.
Советодавната улога на ова тело ќе се однесува во прв ред кон раководството на партијата и ќе формира и свои оперативни тела, составени од членови на советот или други членови на партијата, а тие тела на советот ќе ја помагаат работата на раководството на партијата и на претседател.
„Нашата партија има долга традиција и најголемо искуство на политичката сцена во државата. Тоа искуство е драгоцено и не смее да биде занемарено. Напротив, од искусните личности во партијата се очекува да преземат водечка улога во градење стратегии и правци на дејствување на партијата“, рече Деспотовски.
Деспотовски пред членовите повторно нагласи дека во трката влегува до крај, без пазарење и дека негов грб е членството.
„Ако успееме да го истераме внатрепартискиот процес чист до крај, тоа ќе ни биде првата победа по изборниот пораз. Тоа што ве има овде во толкав број и што дојдовте со конструктивни идеи и прашања за тоа како понатаму, ме охрабрува дека навистина има луѓе што веруваат во шансата за нов почеток за оваа наша заедничка партија“, порача Деспотовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Меџити на средба со Агелер: Испораката на правдата мора да биде неселективна
Министерот за животна средина и просторно планирање и прв заменик на Претседателот на Владата и на Република Северна Македонија, Изет Меџити оствари средба со амбасадорката на САД во нашата држава Ангела Агелер.
На средбата Меџити ги истакна клучните приоритети и стратешки определби на новата Влада и упати уверување до амбасадорката Агелер дека како владеачко мнозинство, Владата останува и понатаму максимално посветена на продлабочување на меѓусебните односи со најголемиот стратешки партнер и силен сојузник – Соединетите Американски Држави, а дека евроатлантската определба и полноправното членство во Европската Унија остануваат врвен приоритет.
Како прв Заменик на Претседателот на Владата на средбата, Меџити изрази искрена благодарност за поддршката и безрезервната помош што САД во континуитет ја пружаат во насока на реформирање на институциите и зацврстување на демократските капацитети и демократскиот амбиент во нашата држава. Заеднички беше ставот дека се потребни резултати во борбата против политичката корупција која е навлезена длабоко во порите на многу институции. Испораката на правдата мора да биде неселективна и согласно највисоките стандарди на владеење на правото. За да се случи ова, потребни се реформи во правосудниот систем и Владата е решителна оваа борба да ја спроведе до крај.
Двете страни се согласија дека прашањето на политичкиот легитимитет на новата Влада е затворено прашање. Периодот пред што предстои ќе биде искористен за спроведување на успешна транзиција и консолидирање на институциите во државата. Во овој процес од исклучително значење е поддршката на меѓународните партнери, пред се` на Соединетите Американски Држави.
Од позиција на министер за животна средина и просторно планирање Изет Меџити, ја информираше амбасадорката Агелер за клучните приоритети на Министерството во насока на безкомпромисната борба со загадувачите на амбиенталниот воздух, согласно највисоките европски стандарди и во рамки на планот за чист воздух. Тој изрази уверување дека заеднички ќе се посветиме на градење на обновливи извори на енергија кои што ќе обезбедат повисоки еколошки стандарди и дека како млада држава, имаме потреба од добри искуства и споделување и размена на знаења, а дека поддршката и помошта од страна на САД во нашите напори за подобрување на државните политики за обезбедување здрава животна средина е повеќе од добредојдена.
Меџити уште еднаш искажа уверување до нашиот стратешки партнер дека високо ги цениме сите досегашни инвестиции од САД, како економски, така и во насока на подигање на капацитетот на институциите и општествениот демократски развој.
„Остануваме сигурен гарант дека Република Северна Македонија ќе остане на стратешкиот курс“, истакна Меџити.
Македонија
Филков во посета на КПУ Идризово: Состојбата во затворите е алармантна
Министерот за правда Игор Филков го посети затворот во Идризово по вчерашниот инцидент кој се случи во затвореното одделение Амбуланта каде беа повредени припадници на затворската полиција и затвореници.
Состојбата во затворите е алармантна. Ресоцијализација и рехабилитација со лоши услови во затворите не може да има, се истакнува во информацијата од неговиот кабинет, по посетата на затворот.
Во разговорот со директорот на затворот, Зоран Јовановски, министерот беше информиран за настанот како и за проблемите со кои се соочува установата, пренатрупаноста, немањето соодветни просторни услови за сместување, недостигот на медицински персонал и лица задолжени за ресоцијализација.
„По извршениот претрес во одделението Амбуланта биле пронајдени 37 метални шипки, 21 дрвена рачка, 3 кабли, 12 штрафови, 15 ножеви, 4 штрафцигери, пластичен шприц со 2 игли, ножици, парчиња од скршено стакло и 3 полначи за мобилен телефон.
При физичката пресметка предизвикана е поголема материјална штета.
Во наредниот период потребно е да се донесат конкретни мерки за подобрување на состојбите и условите во затворите“, се истакнува во соопштениетот од кабинетото на министерот за правда.
Македонија
Јотова со порака: Сакаме да бидеме добри соседи, но да го почитуваме нашето заедничко културно наследство
Бугарија не го оспорува суверенитетот и јазикот на современите држави, изјави бугарската потпретседателка Илијана Јотова.
Јотова како што пренесуваат бугарските медиуми, вели дека не спречуваат никого во самоопределувањето, но ќе ги спречат обидите да се припише историјата.
„Ние не спречуваме никого во самоопределувањето ниту во нивниот јазик, но многу ќе ги спречиме токму овие обиди да се припише историјата, на соодветни факти. Сакаме да бидеме добри соседи, но да го почитуваме нашето заедничко културно наследство, бидејќи тоа е клучот за без спорови и конфликти. Науката, истражувањето, штити од искушението да се создаде фиктивна историја, што неминовно води до политички и билатерални или мултилатерални конфликти. Во последните неколку дена, во изјавите на некои политички и владини лидери на соседните земји за жал, токму тоа можеме да го видиме“, истакнува Јотова.
Бугарскиот премер Димитар Главчев е во Брисел. Тој за бугарските медиуми изјави дека Бугарија ќе инсистира Европскиот совет да ги потврди заклучоците за Северна Македонија и да ја повика земјата да ги почитува преземените обврски за да продолжи на својот пат кон ЕУ.
На прашањето дали разговарал со грчкиот колега за некакви заеднички активности во однос на позицијата на Скопје, Главчев одговори:
„Не сум разговарал со колегата од Грција за тоа прашање, но претпоставувам дека и тој нема да остане неактивен. ”