Свет
Руските пранкери го насамарија Дејвид Камерон: британскиот министер зборуваше за Трамп и Путин
![](https://makfax.com.mk/wp-content/uploads/2023/11/677z381_kameron-2.jpg)
Руските пранкери кои често целат кон политичари од интерес на руската држава денеска објавија видео од видео повик со британскиот министер за надворешни работи Дејвид Камерон во кој го убедија дека разговара со поранешниот украински претседател, Порошенко.
Британското Министерство за надворешни работи на почетокот на овој месец соопшти дека Камерон остварил видео повик со некој кој се претставил како поранешниот украински претседател Петро Порошенко пред да сфати дека е жртва на измама.
Повикот во траење од околу 15 минути, во кој Камерон може да се види како разговара на мобилен телефон некаде надвор, облечен во неформална облека, е дело на руските пранкери кои ги користат прекарите „Вован и Лексус“.
Двајцата станаа познати во Русија откако измамија голем број политичари во изминатите неколку години, вклучително и експремиерот, Зоран Заев.
Воксан и Лексус во минатото ги негираа обвинувањата од западните земји дека имаат врски со руските разузнавачки служби, иако често на своите жртви им поставуваат прашања кои би биле од политички интерес за руската држава.
Лобирање на Трамп
На снимката, Камерон може да се слушне како зборува за приватната вечера што ја имал со американскиот претседателски кандидат Доналд Трамп во април, за време на која лобирал Трамп да им дозволи на републиканците да гласаат за американската воена помош за Украина.
Се слуша како Камерон вели дека Републиканската партија е поделена околу Украина и му кажува на Трамп дека не е во право ако мисли дека Путин го сака само Крим, кој Русија го анектираше во 2014 година, како и регионот Донбас, кој се состои од Доњецк и Луганск, два од четирите украински региони кои Москва ги присвои како руска територија.
„Вашингтон пост“ во април објави дека Трамп приватно разговарал за опцијата да му дозволи на Путин да ги задржи Крим и Донбас во замена за мир, нешто што кампањата на Трамп не го потврди. Се слуша како Камерон вели дека таквата идеја пропаднала.
„Трамп е убеден дека може да се постигне договор, но тоа не е така бидејќи Путин сака многу повеќе“
„Трамп е убеден дека може да се постигне договор, но тоа не е така затоа што Путин сака многу повеќе“, вели Камерон и додава дека мисли оти Трамп, доколку победи на изборите, ќе ја поддржи победничката страна на првата линија и затоа летните битки се толку важни.
Камерон, исто така, вели дека Украина нема да биде поканета на самитот на НАТО следниот месец, бидејќи Вашингтон се противи на идејата. Камерон понатаму вели дека не мисли оти потенцијалниот француски план за испраќање војници во Украина е вистинскиот пристап бидејќи таа војска би станала цел на Путин.
Тој потсетува и на средбата со министерот за надворешни работи на Казахстан во април. Вели дека министерот му рекол оти централноазиската нација се плаши дека Русија „сака парче“ од северен Казахстан, кој е дом на многу етнички Руси.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Свет
Нетанјаху: Ослободувањето на директорот на болницата „Ал Шифа“ во Газа е сериозна грешка
![](https://makfax.com.mk/wp-content/uploads/2023/11/netanjahu6.jpg)
Израелскиот премиер Бенјамин Нетанјаху изјави дека ослободувањето на уапсениот директор на болницата „Ал Шифа“ во Газа е „сериозна грешка и етички неуспех“.
Израелските министри и високите безбедносни функционери си ја префрлаат вината еден на друг, тврдејќи дека не се одговорни за ослободувањето на директорот на најголемата болница во Појасот Газа.
„Тој човек, под чија одговорност беа чувани и убиени нашите заложници, треба да биде во затвор“, рече Нетанјаху во изјавата, пренесоа израелските медиуми.
Тој нареди истрага како се случило директорот на болницата Мухамед Абу Селмија да биде пуштен на слобода.
Шефот на израелската служба за безбедност Ронен Бар утре ќе му ги презентира на Нетанјаху резултатите од истрагата, соопштија од кабинетот на премиерот.
Израелскиот лидер нагласи дека одлуката за ослободување на Абу Селмија е донесена без знаење на политичкиот ешалон и шефовите на безбедносните агенции.
Премиерот на Израел формира меѓуагенциско тело составено од Министерството за одбрана, израелската армија, Службата за безбедност и Советот за национална безбедност, кое ќе служи за одобрување на ослободување на затворениците чија истрага е завршена.
Абу Селмија, лекар во болницата, беше уапсен од израелски војници во ноември под сомнение дека му дозволил на Хамас да ја користи болницата во главниот град Газа како центар на операции.
Тој беше уапсен додека се обидуваше да се евакуира на југот на Појасот Газа преку хуманитарниот коридор контролиран од војската и беше одведен на сослушување во службата за безбедност Шин Бет, пренесуваат светските медиуми.
Тој утрово беше вратен во Газа со уште 54 палестински затвореници.
Абу Селмија беше ослободен без обвинение и судење, а Нетанјаху рече дека одлуката за негово ослободување е донесена по петиција на организација за човекови права.
Тие организации тврдеа дека центарот за притвор бил преполн и дека Палестинците биле малтретирани таму, пренесува „Асошиејтед прес“. Ова ја натера владата да префрли поголем дел од палестинските затвореници во други затвори и да ослободи некои.
Директорот на болницата Шифа рече дека бил држен во тешки услови и мачен. Тој и другите палестински здравствени службеници ги негираа израелските обвинувања.
Болницата Шифа беше нападната од Израел двапати од почетокот на војната против Хамас во Газа на 7 октомври минатата година.
„Кој од затворениците ќе биде ослободен, независно одлучуваат безбедносните службеници, врз основа на професионални проценки“, напиша Нетанјаху во повикот за истрага.
Абу Селмија на прес-конференцијата по неговото ослободување рече дека мачењето било речиси секојдневно и дека биле мачени и други палестински затвореници.
Свет
„Горд сум што сум Американец“: Трамп ја поздрави одлуката на Врховниот суд за неговиот делумен имунитет
![](https://makfax.com.mk/wp-content/uploads/2023/11/tramp.jpg)
Поранешниот американски претседател Доналд Трамп ја поздрави денешната одлука на Врховниот суд на САД, која му овозможи да бара имунитет од гонење за некои од дејствијата што ги презеде за време на неговото претседателствување за да ги поништи резултатите од претседателските избори во 2020 година.
Трамп одлуката на Врховниот суд ја окарактеризира како голема победа за Уставот и демократијата.
– Голема победа за нашиот Устав и демократија. Горд сум што сум Американец – напиша Трамп во објава на неговата платформа „Truth Social“.
Оваа одлука на Врховниот суд ја поништи одлуката на федералниот апелационен суд донесена во февруари оваа година, со која беше утврдено дека Трамп не ужива имунитет за наводните злосторства што ги направил за време на неговиот претседателски мандат за поништување на резултатите од изборите во 2020 година.
Трамп инсистираше на тоа дека не може да му се суди за дејствија кои датираат од неговото време како претседател на САД, вклучително и обвиненијата поврзани со нападот на Капитол на 6 јануари 2021 година од страна на неговите поддржувачи во обид да го спречи Конгресот да ја потврди победата на неговиот демократски ривал, Џо Бајден на претседателските избори.
Свет
(Видео ) Авион принудно слетал поради силни турбуленци во Бразил: повредени најмалку 30 лица, патниците го снимиле хаосот
![](https://makfax.com.mk/wp-content/uploads/2023/05/avion.jpg)
Патничкиот авион „Боинг 787-9 Дримлајнер“ на Ер Европа принудно слета во Бразил поради силни турбуленции во кои се повредени 30 лица, јавува Би-би-си.
Авионот летал од Мадрид кон Монтевидео кога се случил инцидентот, соопшти авиокомпанијата.
El vuelo de @AirEuropa ux045 que sufrió turbulencias de aire claro pic.twitter.com/7ud1plk0uZ
— Nelson (@NblancoNelson) July 1, 2024
Летот UX045 беше пренасочен кон аеродромот Натал во североисточен Бразил на пат кон главниот град на Уругвај, објави шпанската компанија на X.
Оттаму додаваат дека повредените патници „примаат помош“.
Varios heridos en vuelo de Air Europa UX045 desde Madrid con destino a Montevideo. Debió aterrizar de emergencia en Natal, Brasil. Asisten bomberos y emergencias medicas. #aireuropa pic.twitter.com/MAQMziXIdV
— Pichi Pastosa (@pichipastoso) July 1, 2024
Авионот, кој превезуваше 325 патници, наиде на турбуленции над Атлантикот додека се приближуваше до бразилскиот брег, изјави портпаролот на Ер Европа.
Авионот слетал нормално и го пречекале голем број амбулантни возила.
Аеродромските власти соопштија дека на некои патници им била потребна медицинска помош и биле пренесени во најблиската болница.
Локален медицински тим за бразилските медиуми изјавил дека лекувале најмалку 30 патници од различни националности и дека 10 од нив биле пренесени во болница.
Пациентите се здобиле со повреди на главата за време на турбуленциите, вклучувајќи фрактури на черепот и исекотини на лицето, додаде тимот.
Инцидентот се случи неколку недели откако лет на „Сингапур ерлајнс“ беше погоден од силни турбуленции над Мјанмар, што доведе до повреди на неколку луѓе и смрт на еден Британец.
Тешките турбуленции се ретки, но неодамнешните студии покажаа дека климатските промени може да го зголемат ризикот.