Македонија
Одбележани 25 години од основањето на Здружението на јавните обвинители

Наша обврска, на која континуирано работиме сите овие години, е да ги зајакнеме самостојноста на јавните обвинители во постапувањето, професионалните и етичките стандарди во нашата фела, а со тоа да ја вратиме довербата на граѓаните во нашата работа, истакна претседателот на Здружението, јавниот обвинител Елвин Вели на одбележувањето на 25-годишнината од формирањето на оваа организација.
Тој потсети на проектите и активностите со кои Здружението континуирано се залага за унапредување на состојбите во јавното обвинителство и ја застапува улогата на јавните обвинители во јакнењето на принципите на правната држава и владеењето на правото.
„Здружението денес е отворено за сите јавни обвинители, но и за стручните јавнообвинителски службеници кои преку својот личен професионален ангажман и идеи сакаат да се вложат во подобрување на состојбите во јавнообвинителската организација. Нашата поддршка за јакнење на независноста, но и на одговорноста во постапувањето на јавните обвинители останува силна и недвосмислена. Како Здружение инициравме измени со кои Етичкиот кодекс на јавните обвинители се усогласи со забелешките од скринингот на ЕУ и со препораките на ГРЕКО. Организираме обуки и работилници, работиме на научни трудови и законски решенија, со кои се залагаме за јакнење на стандардите, но и на условите во кои работиме“, рече Вели.
Цели 25 години, Здружението на јавните обвинители го одразува нашето професионално единство и нашата визија за улогата на јавниот обвинител во правниот систем, потенцираше Јавниот обвинител на Република Северна Македонија Љупчо Коцевски, кој и самиот извесен период во својата кариера бил дел од Извршниот одбор на Здружението.
„Во единството е силата“, порача тој и ги повика јавните обвинители да бидат уште поединствени и посплотени, активни, гласни и мотивирани, да предлагаат и да учествуваат во реализација на проектите и во следните 25 години, па и потоа.
„Од многу причини, кои не би сакал во оваа свечена прилика повторно да ги истакнувам, јавнообвинителската организација е се помалубројна, а очекувањата од нас се огромни. Ние мора да останеме доследни на задачата што ни е доверена. Затоа важен е придонесот на секој поединец и секоја една визија што ја вградуваме во обвинителството“, рече Коцевски.
Во четвртина век постоење, за Здружението на јавните обвинители, како и за самите јавни обвинители, исклучително важна беше поддршката од многу домашни и меѓународни организации, партнери и поединци, без која оваа организација немаше да може да ги реализира проектите и идеите за кои се залага и со кои ја дели визијата за јакнење на системот на владеење на правото и за подобрување на позицијата на јавните обвинители и на јавното обвинителство како институција.
За нивниот особен придонес за долгогодишна успешна соработка и поддршка, претседателот на Здружението на јавните обвинители Вели додели плакети на: Мисијата на ОБСЕ во Скопје, Канцеларијата за развој, помош и обука на обвинителствата во странски држави – ОПДАТ при американското Министерство за правда, Делегацијата на Европската унија во Северна Македонија, Проектот „Поддршка на ЕУ за владеење на правото“, ДЦАФ – Женевскиот центар за управување со безбедносниот сектор, Проектот на УНДП „Поддршка на ЕУ за градење доверба на Западен Балкан“, Академијата за судии и јавни обвинители „Павел Шатев“, Адвокатската комора на Република Северна Македонија, Центарот за правни истражувања и анализи, Институтот за судска медицина и криминалистика, како и на Асоцијацијата за корпоративна безбедност.
Здружението на јавните обвинители е формирано на 30 јуни во манастирот Лешок, во Тетово, а за прв претседател беше избран вишиот јавен обвинител д-р Тодор Витларов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.
Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.