Свет
Во тек е голема размена на затвореници меѓу Русија и Западот
Турција потврди дека во Анкара е извршена најголемата операција на размена на затвореници во последниве години. Во размената со посредство на турската разузнувачка служба биле вклучени 26 лица од седум различни земји.
Шпекулации за претстојна голема размена на затвореници меѓу Русија и Западот имаше веќе неколку дена. Сега Турција потврди дека во Анкара ја координирала размената на 26 затвореници од Русија и повеќе западни земји. Кабинетот на турскиот претседател по извештаите во медиумите дека е во тек голема размена на затвореници меѓу Русија и САД излезе со соопштение во кои нагласи:
„МИТ (турската разузнавачка служба) ја спроведе во Анкара најголемата операција за размена на затвореници во последно време, која вклучуваше размена на 26 лица од затвори во седум земји (САД, Германија, Полска, Словенија, Норвешка, Русија и Белорусија)“, соопшти турското претседателство, прецизирајќи дека во транспортот на затвореници учествувале седум авиони, пренесе „Дојче веле“.
Како што се наведува во соопштението, 10 разменети лица, од кои две малолетни, ќе заминат во Руската Федерација, 13 во Германија и три во САД.
Меѓу нив се и Американци за кои САД веруваат дека се незаконски притворени во Русија, вклучувајќи ги и новинарите на Волстрит журнал Еван Гершкович и Пол Вилан, поранешен маринец и извршен директор за корпоративна безбедност од Мичиген.
Како што соопшти претседателскиот кабинет во Турција меѓу ослободените исто така е и Германецот Рико К., кој беше осуден во Белорусија на смртна казна па помилуван. Ослободен е и таканаречениот убиец од Тиргартен, Вадим Красиков. Рускиот претседател Путин е особено заинтересиран за човекот кој во декември 2021 година беше осуден за убиство на чеченски дисидент во паркот Клајнер Тиергартен во Берлин. Експерти за безбедносни прашања сметаат дека Красиков го извршил злосторството по налог на руските државни органи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Велика Британија ги повика граѓаните веднаш да го напуштат Либан
Британскиот министер за надворешни работи Дејвид Лами изрази длабока загриженост за зголемените тензии во Либан, повикувајќи ги британските граѓани да ја напуштат земјата.
Во телефонски разговор со либанскиот премиер Наџиб Микати, Лами ја изрази својата длабока загриженост поради растечките тензии и цивилните жртви во Либан.
Британскиот министер за надворешни работи рече дека разговарале за потребата од преговори за изнаоѓање решение за враќање на стабилноста и безбедноста преку Сината линија.
Лами исто така ги повика британските граѓани да го напуштат Либан, наведувајќи ги како причина зголемените тензии во регионот.
„Тензиите се високи и ситуацијата може брзо да се влоши“, напиша Лами на платформата X.
Во вторникот и средата во различни делови на Либан се случија експлозии на пејџери и радио уреди (воки-токи).
Во експлозиите загинаа најмалку 37 лица, а неколку илјади беа повредени.
Либанската влада и Хезболах го обвинија Израел дека го извршил нападот, а Хезболах вети одмазда.
Регион
Хрватска се подготвува за поплави: Се поставуваат насипи, службите на терен
Источна и централна Европа беа тешко погодени од поплавите, 16 лица загинаа, илјадници останаа без покрив над главата, а вкупната штета се брои во стотици милиони евра.
Циклонот „Борис“ продолжува да се заканува, реките надојдоа. Хрватска е во опасност поради Дунав. Другите реки се помалку проблематични, пренесуваат хрватските медиуми.
„Имаме мапи за ризик и опасност од поплави. Сигурно ова е една од петте најголеми во историјата. Ова може да се спореди со 2013 година. Но сите ние се бориме против тоа и неуморно работевме, дење и ноќе. Сега има повеќе од 300 луѓе на терен, а пратени се повеќе од 10.000 вреќи, изјави генералниот директор на „Хрватски води“, Зоран Ѓуроковиќ, коментирајќи ја можноста од поплави и водостојот на реките.
Напомена и дека нема недостиг од материјал, ниту од работна сила.
Хрватска, како што рече, е подготвена, без разлика на зголемениот ризик. Исто така, предвидува дека ниту една населена област не треба да биде загрозена.
„Имавме доволно време бидејќи бранот вода патува седум дена до Хрватска. На сите луѓе им беше предложено колкаво ниво на водата може да се очекува, а обезбедивме и луѓе и ресурси. Од недела кога ќе ги завршиме сите активности, главен фокус ќе бидат насипите затоа што не смеат да попуштат“, заклучи Ѓуроковиќ.
Тој одговори и на прашањето како може ситуацијата да се избегне:
„За жал, пред се, придонесоа климатските промени и екстремните хидролошки услови, а тие области имаат поголема населеност, густо се изградени, има и земјоделски површини, а ги стесниле котлинските профили, па можни се природни поплави“ рече тој и продолжи:
„Тешко е да се надградат системите. Традиционално се прават. Проблемот е да се направат десет километри насипи, а само во Хрватска имаме 4.100 километри насипи. Во моментот кога имате најава за екстремни околности не е можно да ги надградиме насипите, ако тоа не беше направено со години пред тоа, да се прилагоди на климатските промени и да се направи се за да се осигура дека дел од водата е безопасна од излевање.
Како ја доживеа одбраната од поплави во Европа? Гледаме дека парламентот во Будимпешта е како остров.
„Унгарија има долга традиција на одбрана од поплави и верувам дека ќе се брани подобро од другите земји. Германија, Австрија, Словенија и Италија имаат големи проблеми. Добро се спротивставуваме досега, без разлика на рекордните водостои на некои реки Ние го прифаќаме сето ова без поголеми последици, но мора да работите, ништо не се случува само по себе.
Свет
Орбан: Ако чекавме Брисел да не спаси, ќе бевме до врат во вода
Унгарскиот претседател Виктор Орбан е скептичен дека неговата земја ќе добие навремена помош од Европската унија по големите поплави што ја погодија централна Европа, пишуваат регионалните медиуми.
„Со сета почит, ако чекаме Брисел да не спаси, ќе бевме до врат во вода“, рече Орбан на конференцијата утринава.
Унгарија е последната земја во низата погодена од поплави. 21 лице загина во Полска, Чешка, Австрија и Романија.
Орбан претходно оваа недела објави дека ги одложил своите меѓународни обврски додека поплавите не стивнат, вклучително и дебатата во Европскиот парламент за унгарското претседателство со Советот.
Тој утрово се осврна на говорот на претседателката на Европската комисија, Урсула фон дер Лајен, која понуди помош.
„Ако се појави ситуација во една земја, постои механизам што може да се активира со еднострано известување. Ние го направивме тоа, што значи дека Брисел почна да испитува дали треба или не треба да се обезбеди некаква помош“, изјави унгарскиот премиер.
„Кога овие комплицирани процедури во Брисел ќе завршат – а ние не сме казнети со тоа што не ја добиваме помошта што ја заслужуваме, бидејќи сето тоа е сомнително во Брисел – тогаш ќе добиеме помош“, додаде тој. Програмата на Европската унија за следење на климатските промени, „Коперник“, пред пет дена почна да испраќа сателитски снимки од поплавените области во Унгарија, на барање на Будимпешта.
Затоа, се претпоставува дека острите забелешки на Орбан може да бидат последица на претходната одлука на Европскиот суд на правдата да ја казни Унгарија со 200 милиони евра поради кршење на европскиот закон за азил, пишува „Politico“.
„Засега, да ја погледнеме позитивната страна на работите и со почит да му се заблагодариме на Брисел што барем мисли на нас“, заклучи Орбан.