Свет
Врховниот суд на САД го одби барањето за одложување на изрекувањето на казната на Трамп
Врховниот суд на САД го отфрли барањето на сојузната држава Мисури за одложување на изрекувањето на казната на Доналд Трамп по пресудата на судот во Њујорк за плаќање пари на порно ѕвезда и ја потврди забраната за републиканскиот претседателски кандидат да го коментира случајот, до периодот по изборите на 5 ноември.
Одлуката на судиите доаѓа како одговор на тужбата поднесена од државата Мисури во која се тврди дека случајот против Трамп го нарушува уставното право на гласачите да ја слушнат неговата страна додека тој се обидува повторно да ја освои Белата куќа.
Државниот обвинител од Мисури, републиканец, Ендрју Бејли, поднесе тужба против државата Њујорк на 3 јули барајќи од Врховниот суд да го запре изрекувањето на казната за Трамп и да ја поништи пресудата на њујоршкиот судија Хуан Мерчан дека Трамп не може јавно да коментира за неговиот случај.
Одлуката на Врховниот суд не е потпишана. Конзервативните судии Кларенс Томас и Самуел Алито претходно посочија дека ќе водат сослушување за барањето на Мисури.
Трамп беше прогласен за виновен во мај за фалсификување деловни досиеја за да се прикрие уплата од 130.000 долари на порно ѕвездата Сторми Даниелс пред претседателските избори во САД во 2016 година во замена за нејзиното молчење за сексуалниот однос со Трамп.
Трамп, републиканскиот кандидат на овогодинешните избори, негираше дека имал секс со Даниелс и рече дека ќе поднесе жалба на пресудата по изрекувањето на казната закажано за септември.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Германија го суспендираше новиот извоз на воено оружје во Израел
Германија го суспендираше новиот извоз на оружје за Израел додека се справува со правните предизвици, според анализата на податоците на Ројтерс и извор близок до Министерството за економија.
Извор близок до министерството цитираше висок владин функционер дека работата за одобрување дозволи за извоз на оружје во Израел е стопирана поради правниот и политичкиот притисок од правните случаи кои тврдат дека таквиот извоз од Германија го прекршува хуманитарното право.
Министерството за економија соопшти дека нема и нема да има забрана за извоз на оружје во Израел, а одлуките се носат од случај до случај по внимателно разгледување, додавајќи дека меѓународното право, надворешната и безбедносната политика се клучни фактори во нивните оценки.
– Нема бојкот на германскиот извоз на оружје против Израел – изјави владиниот портпарол во средата, коментирајќи го извештајот.
Минатата година Германија одобри извоз на оружје за Израел во вредност од 326,5 милиони евра, вклучувајќи воена опрема и воено оружје, што е десеткратно зголемување во споредба со 2022 година, покажуваат податоците на Министерството за економија, кое одобрува извозни дозволи.
Но, годинава одобренијата паднаа, а од јануари до 21 август се дадени само 14,5 милиони евра, покажуваат податоците на Министерството за економија како одговор на пратеничко прашање.
Регион
Вархеји: Добра средба со Вучиќ за спроведување на следните чекори, планот за раст во полн ек
Европскиот комесар за соседска политика и проширување Оливер Вархеји денеска изјави дека имал добра средба со српскиот претседател Александар Вучиќ во Брисел за да ги подготви следните чекори во време кога се започнуваат „амбициозните реформи засновани на реформската агенда на Србија“.
Вархеји на социјалната мрежа Х оцени дека новиот План за раст на Западен Балкан вреден шест милијарди евра е во полн ек.
„На маргините на состанокот на лидерите од Западен Балкан, имав добар состанок со претседателот Александар Вучиќ за да ги подготвам следните чекори додека започнуваме амбициозни реформи врз основа на реформската агенда на Србија. Новиот план за раст од 6 милијарди евра е веќе во полн ек. Повеќе реформи, повеќе поддршка!“, рече Вархеји.
Свет
Фолксваген сака да укине до 30.000 работни места во Германија и да ги намали инвестициите
Производителот на автомобили Фолксваген сака да укине до 30.000 работни места во Германија и да ги намали инвестициите, објави германскиот деловен портал Менаџер.
Како што се наведува, поддржувачите на радикалните мерки во менаџментот на Фолксваген очекуваат бројот на работници да се намали од сегашните 130.000 за речиси една четвртина.
Се најавува дека и Фолксваген поради заштеди ќе ги намали инвестициите за речиси 20 милијарди евра, а можни се отпуштања и во одделот за истражување и развој, пренесува Bild.