Свет
Хамас го отфрли најновиот план за примирје: „Тоа е американски диктат“
Палестинското движење Хамас го отфрли новиот нацрт-договор за прекин на огнот во Појасот Газа, велејќи дека е постигнат под американски диктат.
По повеќе од десет месеци војна, во четвртокот и петокот во Доха беа одржани разговори за прекин на огнот во Газа меѓу Израел и посредниците – САД, Катар и Египет, на крајот на кој беше претставен ревидиран предлог договор, предложен од САД, главниот сојузник на Израел.
Покрената како одговор на нападот на палестинскиот Хамас врз Израел на 7 октомври, израелската офанзива во Газа не попушти или запре за време на повеќето рунди преговори во Доха, во кои Хамас одби директно да учествува.
За Соединетите Држави, прекинот на огнот во Газа ќе помогне да се избегне регионална воена ескалација по заканите од Иран и неговите сојузници дека ќе се одмаздат за атентатот на 31 јули, припишан на Израел, на лидерот на Хамас, Исмаил Ханије, во Техеран и убиството на воениот лидер на либанскиот Хезболах – убиен неколку часа претходно во израелски напад во близина на Бејрут.
Исламистичкото движење Хамас одбива понатамошни преговори и сака да го спроведе планот што на 31 мај го објави американскиот претседател Џо Бајден.
Овој план предвидува во првата фаза шестнеделно примирје пропратено со израелско повлекување од густо населените области на Газа и ослободување на заложниците киднапирани на 7 октомври, а во втората фаза целосно повлекување на Израел од Газа.
Хамас го отфрли последниот ревидиран предлог, осудувајќи го како „американски диктат“ и зборувајќи за „илузија на примирје“.
„Да се каже дека се приближуваме до договор за прекин на огнот е илузија“, рече висок претставник на Хамас во саботата, откако американскиот претседател Џо Бајден најави дека договорот никогаш не бил толку блиску до постигнување примирје и ослободување на заложниците.
„Не се соочуваме со договор или вистински преговори, туку со наметнување американски диктат“, рече членот на политичката канцеларија на Хамас, Сами Абу Зохри во изјава за АФП, коментирајќи го предлогот како голем чекор наназад.
Хамас го обвинува Израел дека додал нови услови во текстот.
Преговорите за прекин на огнот треба да продолжат следната недела во Каиро.
Во меѓувреме, американскиот државен секретар, Ентони Блинкен лета за Израел, откако висок американски функционер предупреди дека Иран ќе се соочи со катаклизмични последици доколку го нападне Израел.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Лидерот на Хезболах: Непријателот ги премина сите црвени линии, сакаа да убијат 4.000 луѓе одеднаш
За време на телевизиско обраќање, лидерот на Хезболах, Хасан Насралах, детонирањето на пејџери и воки-токи низ Либан го нарече „терористички чин“ и изјави дека „непријателот на Израел ги преминал сите црвени линии“ со намера да убие 4.000 луѓе во еден момент.
Тој призна дека на Хезболах му бил зададен тежок удар, но подвлече дека тоа „нема да го скрши“ отпорот и дека операциите во јужен Либан нема да престанат додека не заврши војната во Газа.
Насралах на почетокот рече дека настаните во изминатите два дена го навеле да го одржи говорот. Тој објасни дека планирал да ја претстави својата анализа и извештај за борбите во изминатата година на 7 октомври, но дека она што се случило во изминатите 48 часа „ја барало оваа порака“.
Тој им изрази сочувство на паднатите на фронтот во јужен Либан и на загинатите како последица на експлозиите, а на повредените им посака брзо закрепнување. Тој им се заблагодари на лекарите, официјалните лица и на сите кои помогнаа во лекувањето на жртвите од нападот и на луѓето кои даруваа крв за повредените и ја поздрави солидарноста и единството на народот во земјата.
Тој подвлече дека експлозиите се случиле во болниците бидејќи пејџерите ги користеле и медицинските работници, како и во аптеките, маркетите, продавниците, куќите, автомобилите и на улиците каде што имало многу цивили.
Насралах изјави дека Израел имал за цел да убие „4.000 луѓе одеднаш“.
„Тоа беше намерата на непријателот и ова е обемот на нивниот криминал. Како да го наречеме овој вид криминална активност? Дали е тоа голема операција? Дали е тоа геноцид? Дали е тоа масакр?“, рече тој.
Тој призна дека на Хезболах му бил зададен „многу тежок“ удар, опишувајќи ги нападите како „невидени“ во Либан. Тој рече дека се формирани истражни комисии кои ќе проучат како се случиле експлозиите и дека ќе ги чекаат резултатите од истрагата.
„Претрпевме многу тежок удар. Но, ова е воена состојба“, рече тој.
Тој рече дека неговата група е свесна дека Израел има технолошка предност бидејќи е поддржан од САД и други технолошки суперсили, но храбро ќе се соочи со овој предизвикувачки момент со крената глава.
„Не може да бидеме скршени од овој удар, колку и да е силен. И можам верно и самоуверено да ве уверам дека овој тежок и невиден удар не нè клекна – и нема“, подвлече тој.
„Јасно велам: без разлика какви се последиците, без разлика на жртвите, без разлика на сценаријата, отпорот во Либан нема да престане да го поддржува отпорот во Газа и Западниот Брег и сите повредени на окупираните територии“, рече Насралах.
Тој изјави дека нападите низ Либан биле насочени кон инфраструктурата на Хезболах и дека тоа е обид да се предизвикаат поделби во неа.
„Нека знае непријателот дека тоа што се случи не ја разниша нашата вера, верба, решителност, подготвеност или инфраструктура. Напротив, нè направи порешителни, поробусни и истрајни. Ако целта на Израелците беше да не разделат од она што се случува во Газа, тоа не успеа“, подвлече тој.
Свет
По расправија извадил нож и солзавец, има повредени: тепачка во трговски центар во Германија
Неколку лица се повредени во тепачка што се случила денеска во трговски центар во Ерфурт, Германија, кога еден маж по расправија извадил нож и го расекол мажот.
Полицијата брзо пристигнала на местото на настанот и го евакуирала трговскиот центар, а според полицијата дошло до вербална, а потоа и физичка пресметка меѓу група лица, кои не се по потекло од Германија, пренесуваат германските медиуми.
Се се случило околу 15 часот и 30 минути, а еден од учесниците во тепачката извадил нож. Како што објави „Билд“, мажот (27) бил пренесен во болница поради сериозни повреди на раката, но неговиот живот не е во животна опасност.
Во трговскиот центар бил употребен и солзавец, па лекарска помош побарале и посетителите на центарот. Се пожалиле дека им горат очите и дека имаат проблеми со дишењето.
Полицијата соопшти дека е приведен маж (26), кој е осомничен дека извадил нож и ранил најмалку едно лице.
„Ве уверуваме дека не се работи за напад, немало опасност за граѓаните“, соопштија од полицијата.
Според написите,не се знае зошто дошло до тепачката, ниту точно колку лица се повредени во инцидентот.
Свет
Велика Британија ги повика граѓаните веднаш да го напуштат Либан
Британскиот министер за надворешни работи Дејвид Лами изрази длабока загриженост за зголемените тензии во Либан, повикувајќи ги британските граѓани да ја напуштат земјата.
Во телефонски разговор со либанскиот премиер Наџиб Микати, Лами ја изрази својата длабока загриженост поради растечките тензии и цивилните жртви во Либан.
Британскиот министер за надворешни работи рече дека разговарале за потребата од преговори за изнаоѓање решение за враќање на стабилноста и безбедноста преку Сината линија.
Лами исто така ги повика британските граѓани да го напуштат Либан, наведувајќи ги како причина зголемените тензии во регионот.
„Тензиите се високи и ситуацијата може брзо да се влоши“, напиша Лами на платформата X.
Во вторникот и средата во различни делови на Либан се случија експлозии на пејџери и радио уреди (воки-токи).
Во експлозиите загинаа најмалку 37 лица, а неколку илјади беа повредени.
Либанската влада и Хезболах го обвинија Израел дека го извршил нападот, а Хезболах вети одмазда.