Македонија
Попов: Младите се во фокус на делувањето на Владата, очигледна е разликата за само 60 дена
На денешната Трибина за млади, во организација на Унијата на млади сили на ВМРО-ДПМНЕ, своe обраќањe имаше претседателот на УМС и пратеник во македонското собрание, Сергеј Попов, кој што истакна дека младите се во фокус на владата и очигледна е разликата за само 60 дена од формирањето на владата.
Во своето обраќање, Попов истакна дека најголемата промена во владеењето и креирањето политики, е самиот факт што ваква трибина за промоција на успешните политики, се организира на само 60 дена од формирањето на новата влада.
Тој додаде дека во Македонија, конечно се гледа промена и е исцртана јасна дистинкција во владеењето на ВМРО-ДПМНЕ и она на СДСМ и ДУИ.
„Изминатите 7 години, власта не ја интересираа младинските прашања и политики, што се гледа според тоа дека пред ребалансот на буџетот, недостасуваа 600 милиони денари наменети токму за проекти за младите. Новата влада и парламентарното мнозинство, успеа да ги обезбеди средства, со што до крајот на оваа година и во континуитет во наредните, студенскиот оброк и стипендиите ќе стигаат навремено, а потоа ќе се преземаат и мерки со кои овие суми ќе бидат и повисоки”, истакна Попов.
Свое обраќање имаше и Стефан Андоновски, министер за дигитална трансформација кој што ги истакна стратешките приоритети на министерството и важноста на младите да бидат вклучени во институциите.
Министерот Андоновски говореше за стратешките приоритети на неговиот ресор, напоменувајќи колкав е предизвикот да се преводи дигиталната трансформација. Објасни за тековните активности на Министерството, како што е надградување на електронски достапните јавни услуги и одблокирање на учеството на Македонија во проектот дигитална Европа. Потенцираше колку е важно младите да се вклучени во институциите и дека нивното присуство претставува клуч за фукнционални институции и најави повторно воведување на пракса во Министерството за дигитализација.
Свое обраќање имаше и министерот за социјална политика, демографија и млади кој што истакна дека младите се во фокусот на владината политика.
Гоќо Велковски, заменик министер за социјална политика, демографија и млади како поранешен член на УМС потенцираше колку е важно и вредно членувањето во УМС во градењето на успешна покитичка кариера. Ја нагласи постоечката демографска криза во Македонија и дека младите се клуч во надминувањето да истата. Го поздрави фактот дека ресорот млади повеќе нема да биде маргинализиран туку прерасна во посебен ресор каде младите ќе бидат на високо место во владината агенда и дека конечно ќе добијат достоинствен третман од државните институции.
На трибината се обрати и Борко Ристовски, министер за спорт кој што ја нагласи важноста за развивањето на училишните спортови во државата на сите нивоа.
Министерот Ристовски се фокусираше на методи за развивање на состојбите во спортот во Македонија. Зборуваше за нови методи за финансирање на клубовите и федерациите како и развивање на училишните спортови во државата на сите нивоа. Објасни како Министерството за спорт е вложено во подобрување на спортската инфрструктура како што се спортските сали, но и фитнес зоните и отворените спортски игралишта. Потенцираше дека тој и Министерството се сојузници на младите и дека ќе работат во интерес на градење на спортска нација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
За четири месеци во Клиничкиот центар ќе се прават и потешките операции, Таравари го потпиша договорот за нова компресорска станица
Почна да тече рокот за изградба на нова компресорска станица во Клиничкиот центар која ќе овозможи хируршките сали да работат во полн капацитет. Министерот за здравство Арбен Таравари денес извести дека го потпишал договорот со компанијата „Винора“, единствената која се пријави на повторениот оглас.
„Компанијата е сериозна, професионална за оваа работа и се надевам дека, според нив, за четири месеци целиот зафат ќе биде завршен. Договорот го потпишавме завчера. Ако некој се жали во меѓувреме тоа нема да биде добронамерно оти на три повици не се пријави никој“, рече министерот Таравари денес по посетата на Центарот за рехабилитација на патологија на вербалната комуникација.
Хируршките сали во Клиничкиот центар функционираат со надворешни компресори и со намален интензитет од мај, годинава, кога се појави смрдеа во дистрибутивната мрежа за кислород и компримиран воздух. Потешките операции место во Клиничкиот центар, до декември ќе се прават во Градската општа болница „8 Септември“ и во Универзитетската клиника за хируршки болести „Св. Наум Охридски“.
Македонија
Германија со чартер летови депортира 36 лица до Белград и Скопје, меѓу нив имало осудени криминалци
Првиот чартер лет како дел од најновата офанзива за депортација на германската влада полета пред две недели за Авганистан. Вториот вчера од Хамбург до Белград и Скопје. Според весникот „Билд“, во него имало 36 лица, главно државјани на Србија и Косово, на кои им било одбиено правото на азил или поради некоја друга причина немаат право да останат во Германија. Меѓу нив има и осудени криминалци.
Чартер-летот на полската компанија Ентер Ер го изнајми најсеверната германска сојузна покраина Шлезвиг-Холштајн, па се претпоставува дека депортираните биле регистрирани во таа покраина.
Но, за разлика од чартерот за Кабул на крајот на август, овој лет не е сензација, пишува „Дојче веле“. Додека депортациите во Авганистан се контроверзни бидејќи германската влада нема дипломатски врски со талибанската влада во Кабул и организациите за човекови права укажуваат на лошата ситуација во Авганистан, чартерот во Белград и Скопје се чини дека е прашање на рутина.
На лошата состојба со човековите права, особено кога станува збор за Ромите, предупредуваат и организациите за човекови права во случајот на Западен Балкан, но само во првиот квартал од оваа година германските власти веќе депортирале 795 лица во Србија и Косово. .
Германската влада претходно воведе т.н правило за земјите од Западен Балкан што овозможува полесно вработување на граѓаните на овие земји. Правилото кое бара само договор за вработување од германски работодавач, се покажа како успешно и германската влада го продолжи на неодредено време во јуни оваа година.
По изборните успеси на екстремно левичарските и десничарските партии кои се залагаат за ограничување на нерегуларната миграција, се зголеми притисокот врз федералната влада да го исполни ветувањето за интензивирање на депортацијата на луѓето кои немаат право да останат во Германија. За притисокот придонесе и тоа што напаѓачот што ги нападна посетителите на градскиот фестивал во Солиниген во август, убивајќи три и тешко рани десетина лица, е Сириец кого властите не успеаја да го депортираат во Бугарија.
Одвреме-навреме во германските медиуми се појавуваат приказни за луѓе кои по долги години и повеќекратни депортации во земјата на потекло, се враќаат во Германија за да се обидат да добијат статус на престој.
Последниот медиумски случај е протерувањето на Ром од Србија, кој беше протеран од властите во Вајблинген, јужна Германија, и покрај тоа што неговите пет малолетни ќерки живеат во Германија, од кои четири се германски државјани.
Македонија
Николовски – Азески: Договорени редовни консултации со Стопанска комора, целта зголемување на конкурентноста на македонската економија
Унапредување на соработката со бизнис заедницата преку редовни консултации и заеднички настани, што треба да резултира со зголемување на конкурентноста на македонската економија, е договорено на средбата на директорот на Царинска управа Бобан Николовски и претседателот на Стопанска комора на Македонија, Бранко Азески. Ваквиот начин на соработка ќе биде дефиниран преку нов Меморандум за соработка каде ќе биде дефинирана новата рамка за унапредување и развој на царинско-деловните партнерства.
На средбата двете страни беа согласни дека на овој начин ќе се овозможи доследност, усогласеност, предвидливост и ефикасност на царинските и деловните процеси.
„Унапредување на односите е многу важно за зголемување на перформансите на бизнис заедницата, а со тоа и за економска трансформација на државата како клучен приоритет на Владата“, потенцира Николовски.
Ваквото ниво на соработка е неопходно, при што двете страни ќе работат на воспоставување процес на редовни консултации и партнерство со бизнис заедницата.
„Стопанската комора ја поддржува и охрабрува Царинската управа да го унапредува царинското работење со воведување на нови дигитални услуги и решенија и осовременување на опремата особено на граничните премини, зашто тоа истовремено ќе значи олеснување и забрзување на постапките и поддршка за извозните компании за зголемување на нивната ефикасност и конкурентност“, вели Азески.