Култура
„100 илјади поети за промена“ 14. пат во Струмица
Во сабота, 28 септември 2024 година, глобалното движење „100 Thousand Poets For Change“, во соработка со здружението „Контекст – Струмица“ го реализира 14 издание на поетската манифестација „100 илјади поети за промена“ со почеток во 19:00 часот во НУ Завод за заштита на спомениците од културата и Музеј – Струмица.
Манифестацијата ќе започне со отворање на изложбата на дигитални цртежи „Сенката на звукот“ на проф. Владимир Мартиновски, а потоа со промовирањето на годинешниот зборник „100 Илјади поети за промена“ ќе се одржи поетско читање на дел од застапените поети.
На конкурсот годинава конкурираа повеќе од 200 учесници.
Манифестацијата е поддржана од градоначалникот Костадин Костадинов и Општина Струмица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
„Сенката на звукот“ – изложба на дигитални цртежи на Владимир Мартиновски
Здружението за развој на културата и заштита на културното наследство „Контекст-Струмица“ како дел од годинештното 14 издание на 100 Илјади поети за промена, оваа сабота, 28 септември 2024 година во 19:00 часот во НУ Завод за заштита на спомениците на културата и Музеј на град Струмица ќе ја отворат изложбата на дигитални цртежи насловена „Сенката на звукот“ на проф. Владимир Мартиновски.
„Сенката на звукот“ е негова трета изложба на дигитални цртежи од овој циклус, а се состои од 12 цртежи (дигитален принт) кои тематски ја поврзуваат музиката, поезијата и ликовниот израз на Мартиновски. Под влијание на музичките фестивали кои редовно ги посетува, тој најде инспирација неговите емоции, чувства и размисли визуелно да ги изрази преку создавањето на овој циклус дела. Оваа изложба е своевидна презентација во која се вкрстуваат две негови пасии: музиката и сликарството.
Дигиталните цртежи визуелно го слават чинот на музицирање, во обидот на ликовен начин да се доловат различни мелодиски и ритмички структури. Освен со дигитални цртежи тој се има претставено со уште две изложби, на фотографија и цртеж, во моментот има тековна изложба во Шибеник, Србија, а во тек е подготовката на неговата нова изложба на акрилни дела.
Култура
Ана Василевска во Битола ќе ја промовира книгата „Дискретниот шарм на македонскиот филм“
„Дискретниот шарм на македонскиот филм“ – книгата на македонската филмска критичарка, Ана Василевска, со капучино и пладневна дружба пристигнува во Битола.
Промоцијата на нејзиното дело ќе се одржи денеска во 12 часот во кафулето „Порта џез“, а промотор е критичарот Влатко Галевски.
Книгата којашто е во издание на „Македоника“ е сублимиран приказ на состојбите во нашата кинематографија од осамостојувањето на Македонија до 2021 година, односно опфаќа три децении македонска продукција.
Ана Василевска, родена во Скопје во 1975 година е новинар, филмски теоретичар, критичар. Формалното образование го стекнува на Филолошкиот факултет „Блаже Конески“, како дипломиран филолог по македонски јазик со општа и компаративна книжевност, а магистерските студии по филмска и телевизиска режија, на Факултетот за аудиовизуелна уметност „ЕСРА“, Скопје.
Со професионално новинарство, насочено кон културата, со посебен фокус кон филмот се занимава од 1998 година. Автор е на стотици објави на рецензии, осврти, интервјуа, анализи и критики поврзани со филмот, пласирани во бројни печатени и електронски медиуми. Била уредник на ревијата за филм на првото електронско списание во Македонија, „Блесок“. Селектор и модератор на ревијалната програма „Мак поинт“ на ИФФК „Браќа Манаки“ во периодот од 2016 до 2019 година. Работела и како лице задолжено за односи со јавноста на бројни филмски проекти во македонска продукција.
Иницирала, организирала и модерирала низа тематски трибини за македонскиот филм. Уметнички координатор е на првата манифестација за преглед на годишната филмска продукција, „Златна рамка“, денови на македонски филм 2019- 2023 година. Медиуми во кои работела: Македонска телевизија, Дневник, Форум, Макфакс, Радио Равел, А1 он, Нова ТВ веб и други. „Дискретниот шарм на македонскиот филм“ е нејзина прва објавена книга.
Култура
Почнува 16-тото издание на МТФ „Св. Јоаким Осоговски“, лаурет Никола Ристановски
Со претставата „Љубовна терапија“ на Народниот театар при НУ Центар за култура „Трајко Прокопиев“ од Куманово вечерва започнува 16-то издание на Меѓународниот театарски фестивал „Св. Јоаким Осоговски“ во Крива Паланка.
Театарскиот фестивал годинава ќе се реализира од 27 септември до 5 октомври, а покрај кумановскиот театар, настапуваат: Градско казалиште „Јоза Ивакиќ“, Винковци, Хрватска, Продукција „Златен заб“ со босанскиот актер Драган „Маца“ Маринковиќ, Народен театар „Стерија“, Вршац и Уметничка работилница „Призор Плус“, Белград, Србија , Општински театар Ќустендил, Бугарија, Драмски театар , Македонски народен театар и Народен театар при НУ Центар за култура „Јордан Хаџи Константинов Џинот“ Велес.
Овогодинешен лауреат на МТФ „Свети Јоаким Осоговски“ е македонскиот актер Никола Ристановски, кој се истакнува со бројни улоги и извонредни актерски остварувања во земјава и регионот. Признанието ќе му биде доделено на свеченост која ќе се одржи на 30 септември, со почеток во 13,00 часот, во НУ Центар за култура Крива Паланка.
На оваа свеченост ќе биде промовирана и монографијата „Со театар до Балкан без граници“ , по повод 15 години Интернационален театарски фестивал, од авторот Гоце Ристовски, публицист, театарски критичар, драмски автор, писател и новинар.
Организатори на оваа престижна манифестација се Општина Крива Паланка, Здружението за промоција на театарската уметност „Театарски фестивал“ од Крива Паланка и НУ Центар за култура Крива Паланка.
Како покровители се јавуваат Општина Крива Паланка, компанијата Феникс Фенетрс од Париз, Франција, сопственост на кривопаланечки иселеници и Квазар ДООЕЛ од Скопје.
Сите претстави се играат во салата на НУ Центар за култура Крива Паланка, со почеток во 19,30 часот.
Во изминатите 15 години,признанието лауреат на МТФ „Свети Јоаким Осоговски“ го добиле: Зафир Хаџиманов, Милица Стојанова, Шенка Колозова, Петар Темелковски, Страшко Милошевски, Мето Јовановски, Јордан Плевнеш, Јелена Жугиќ , Гоце Ристовски, Благоја Чоревски, Коле Ангеловски, Гоце Тодоровски, Ѓокица Лукаревски, Драган Спасов – Дац и Билјана Драгиќевиќ Пројковска.