Вчеравечер, Александар Томовски ја отвори својата изложба на уметнички фотографии „Голо.Ти.Ја“ во „Јавна соба“. Се работи за фото-есеј од неколку поглавја каде што во еден хармоничен и провокативен баланс коегзистираат грациозноста и ранливоста на женското тело.

Фотографиите, преку деликатна интеракција на светлина, сенки и емоции, ги покануваат гледачите во еден приватен дијалог помеѓу авторот и субјектот. Се чини како секоја фотографија да ја открива моќта и мекоста на женственоста, користејќи пози, осветлување и кадри кои ги истакнуваат нијансите на формата и текстурата кои се чувствуваат безвременски, а сепак лични.

„Голо. Ти. Ја.“ навестува длабоко интимно и сирово истражување на женската форма.

Ова е шеста изложба на Александар Томовски, која ќе трае до крајот на месец октомври.

Започнува првата ликовна колонија во Кисела Вода, која ќе се одржи овој викенд, 11, 12 и 13 октомври во Домот на култура во Драчево.

„Со оваа манифестација која за првпат се одржува, имаме за цел да го збогатиме културниот капацитет и потенцијал на општината и истата ќе биде збогатена со дела од реномирани автори од Македонија и регионот кои ќе бидат изложени во културните домови во Кисела Вода.

Во петок, во 10 часот се тргнува со организиран превоз од собирно место пред паркингот кај општината, а потоа следува прошетка до црквата Свети Ѓорѓија и легендарната „чешма” според која е настаната Кисела Вода, месноста Пеленица и други локации во Драчево. Пристигнување во домот во Драчево околу 12 часот и творење до 16 часот, па враќање дома.

Сабота: тргнување со организиран превоз од пред паркингот кај општината во 11 часот; Недела: тргнување со организиран превоз од пред паркингот кај општината во 11 часот“, рече градоначалникот Орце Ѓорѓиевски.

„Им посакувам успех на сите учесници и нека оваа ликовна колонија прерасне во традиција“, додаде Ѓорѓиевски.

На денот на Народното востание на македонскиот народ, 11 октомври, ќе се реализира 14 издание на фестивалот на нова музика „Здраво млади” во организација на Младинскиот културен центар –Скопје.

Во рамките на програмата, публиката ќе има можност да погледне 17 различни музички артисти од 6 земји од Европа. Оваа година, програмата претставува вистинско изобилство од музички артисти кои пленат со своите настапи во живо, претставувајќи сериозна музичка разгледница од светот.

Во рамките на програмата селектирана од младата издавачка куќа и колектив “Гола планина / Мртов коњ”, публиката ќе има можност да ги чуе младата дарквејв артистка “ATA” (MKD), енергичните “KLOTLJUDI” (SRB), дрон/фолк артистот “СТОЈ, ПОСЛЕ!” (MKD), панк-рок изведувачот “DIMISH” (МКД), инди составот “ZANADU” (MKD), психоделичните “VAGINA CORPORATION” (MKD) како и диџеите Пепи и Шабан.

Оваа година, Младинскиот културен центар оствари тесна соработка со Холандската амбасада во Скопје, каде со нивна организациска и финансиска поддршка, како и поддршката од партнерите од европската мрежа “Liveurope”, ќе се реализира музчката програма насловена како “Liveurope & NL” селекција. Во неа, публиката ќе ги проследи настапите на иновативните “VELOCITY MADE GOOD” (NL), експлозивното трио “HOUSEPAINTERS” (NL), соло проектот и хрватскиот хит “IDEM” (HR), панк изведувачот “TANDARA” (HR) како и полските џез експериментатори “KOSMONAUCI” (PL).

Во соработка пак со холандската издавачка куќа “YUGOFUTURISM”, „Здраво млади“ ќе ги угости интензивното нојз трио “TEXOPRINT” (NL), андерграунд нојз- поп сензацијата “SØWT” (NL),кантавторката “EERIE WANDA” (NL/HR), како и диџеј сет на независниот промотер, агент и менаџер на издавачката куќа “YUGOFUTURISM”, Кун Хегде или диџеј VIKENDICA.

Свој диџеј сет ќе има и резидентниот диџеј на Здраво Млади уште од своето прво издание, Диџеј Фиц од Ирска.

Програмата е финансиски поддржана од Министерството за култура и туризам, Холандската
амбасада во Скопје и мрежата “Liveurope”.

Влезот на 14. издание на ЗДРАВО МЛАДИ е слободен, додека програмата ќе започне во 19 часот.